1 Qmang aih, bèn ep clech enh tau ka ƀài bàu hnài baxèm Bàu lem da Chirst, đòeq trùh ta kan gêh geo, pi dùh tàc hlài xàn hnim hòm, aih ìq rameh: cađac ƀài bìac cachìt, lùi Boc Plình, 2 trong hnài ramènh ƀaptem, trong roh tì ta chac wì, trong mangai cachìt rìh hlài, trong hadrah mòeq đòe.

3 Tàng joq Boc Plình lòh, aih èh bèn hi broq ƀài trong aih. 4 Majah qmang aih, ƀài mangai ma khoe jah sreo qngah mòeq yàng, khoe hmaq loq kan am dech enh plình, hadai khoe wiang jah Yiang Hadròeh, 5 loq kan nhim da bàu Boc Plình xam kan itai ta qnhòng atìq, 6 tàng oe tacro, aih pi oe jah broq ka wì haq raxach hlài hòm, majah qmang aih wì haq khoe tiang đình Kon Boc Plình talong pagat ka rađeh mòeq yàng hòm, rai baxep haq dôq mangai hnoq đeh hra. 7 Majah qmang aih, taneh i diac mè yôt men loh long loh nhat, i lòeq ka mangai ma abèq, taneh aih jah xôq ramot enh Boc Plình. 8 Mahaq taneh leq ma hon toq yila, toq cađê, taneh aih èh wì cađac, jah toq bàu ra-òh hamaiq, pulùch èh ep bùh đac.

9 Hnoq nhèn doe qmang aih, yôiq wì oh daq da au, dua nhèn oe tangèh gòm yiniq ma yeo lem ta pì, aih ƀài yiniq aràng pì trùh ta kan jah dèch. 10 Boc Plình ma i ùh taq atoq, haq ùh hèt yiniq broq xam manoh loq waq da oh daq khoe paqnoh ka yiniq haq jò oh daq patìh am ka mangai da haq, trùh manòeq kô dua pì oe raq patìh. 11 Mahaq nhèn ngèh rìm ngai tapì dìq i manoh loq nhet qmang aih đòeq kan tangèh da oh daq jah broq gêh trùh lùch. 12 Qmang aih oh daq ùh hìaq loh ka ra-òeq, mahaq top dua ƀài mangai i manoh lùi xam kan loq kèm men khoe jah waq kùng hang tiaq bàu Chuaq ma khoe tèu am.

13 Jò Boc Plình tèu bàu ka Apraham, pàng pi i qmòe cabô ma yeo haqnhèq loe, dài haq majah patô cla rađeh đòeq hapah ka Apraham. 14 Haq doe rameh: Kô èh Au am ka ìh xôq ramot bàc joq qnàng rai broq ka xinoe ìh jah ha-uang tam ka bàc. 15 Qmang aih, Apraham chìuq àt chìuq gòm, aih men jah bàu ma khoe tèu am ka rađeh. 16 Kon mangai wì yŏc yiniq mangai ma yeo kàn ka rađeh đòeq hu hapah, tàng loq i yiniq tarahen, wì yŏc bàu hapah aih đòeq hu panhìn ka cajap. 17 Boc Plình hadai qmang aih, enh broq ka ƀài mangai majah waq bàu haq ma tèu am loq ka haq ùh tablòq manoh, dài aih haq majah yŏc bàu hapah; 18 đòeq canòm ka baiq yiniq ma ùh jò leq tablòq aih, baiq yiniq aih Boc Plình dìq ùh capoch qnùt, bèn chaq jah kan alòng kàn, bèn aih mangai khoe cadàu tùh tanòe hanhàng, jah cadop yŏc kan tangèh ma khoe đòeq enh ngèa bèn. 19 Bèn wèq kan tangèh aih tìah ka long tanàp da mahua yiang, cajap cajình mùt trùh enh tau ka bai prình, 20 aih nòe hadròeh, Chuaq Jesus tìah ka Mangai pèh trong khoe lam adroe ka bèn, majah qmang aih haq khoe broq Pajàu haqnhèq mòeq đòe tiaq apah da Mênchixêđec.