11
Mangai tiaq cla ma joq qnàng xam mangai tiaq cla pađùi
1 Joq qnàng! Au ngèh đeh pì oh daq àt chìuq da au kan blùng toq biaq! Ma joq qnàng, oh daq khòh àt chìuq.
2 Au qnang tarènh ka pì tìaq kan tarènh enh plình, majah qmang aih au khoe capoch ka pì mòeq ngai ŏng raq, đòeq au jah patô pì oh daq qmang ka mangai gu adrùh hliang sriu đoèq dèch am ka Christ.
3 Mahaq au yùq qmang ka calah nèh bìh ma khoe padô Êva qmang leq, èh manoh cliac da oh daq hadai loq loh ka pi wìa, hnhung đac kan hliang lem ka Christ qmang aih diq.
4 Majah qmang aih tàng loq i mangai qnoeq trùh hnài ònh ka oh daq mòeq Jesus ma qnoeq, crài ka Chuaq Jesus nhèn ma khoe hnài, mòeq yiang ma qnoeq crài kaYiang Hadròeh pì ma khoe jah, ùh meh mòeq Bàu lem qnoeq crài ka Bàu lem oh daq ma khoe jah, aih èh canau pì waq!
5 Mahaq au hèm yac ka ƀài mangai tiaq cla aih loq haqnhèq dàng leq, au dua ùh yi hamoq ka wì aih yac ka toq biaq hnha!
6 Trong bàu tapoch, au ùh rabiaq, mahaq au i kan loq, nhèn khoe patô ka oh daq jah hnoq trong aih rìm hì.
7 Au anoe hnài Bàu lem da Boc Plình ka pì, au hnài đeh dech, au caqnìh rađeh ka haqneq đoèq oh daq jah dèch ka haqnhèq. Qmang aih, au ahìaq i yiniq lui cleq loq ùh?
8 Au khoe yŏc baha, hatùh hatah dahwèq enh Tagop Hadròeh qnoeq đòeq hu wiang patìh ka pì.
9 Jò oe ti pì oh daq, glàm kan nanxa, au ùh pangài ka cabô, majah qmang aih oh daq enh gùng Maxêđoan trùh, khoe aràng ka au dahwèq au ma nhet ka i yiniq waq. Au khoe wèq rađeh đòeq au ùh hìaq wìa kan trap ka oh daq. Tangèa kô èh dua qmang aih raq.
10 Kan joq qnàng da Christ oe enh dalam ka au, dài aih tagùng Achai ùh i mangai leq jah tàt da au kan catèh aih.
11 Hagleq qmang aih? Ahìaq au ùh qnì waq ka pì oh daq ùh xài? Khoe i Boc Plình loq!
12 Mahaq trong au khoe broq, dua au oe raq broq, majah qmang aih au ùh enh dôq wì tau jah nen hu catèh, wì doe yiniq broq da wì haq hadai daq adàng ka da nhèn.
13 Majah qmang aih ƀài mangai qmang aih, ùh xài mangai tiaq cla joq qnàng, wì haq patìh ka kan qnùt, ti patìah đeh broq mangai tiaq cla da Christ.
14 I cleq ep hamàih, cla Satan ji patìah đeh broq ƀình plình qngah qngai.
15 Qmang aih, ƀài mangai patìh ka haq ti patìah đeh broq mangai patìh ka kan taq atoq, ùh i cleq ma ep hamàih, mahaq kan pulùch da wì haq jah tajì wop tiaq yiniq wì haq ma khoe broq.
Phaulô ùh camaih ka rađeh xalep
16 Au anoe tam: Apaq i cabô ngan au qmang ka mangai blùng. Mahaq tàng loq i mangai leq hèm qmang aih, pì dôq au blùng beq, aih raq au hujah catèh rađeh toq biaq.
17 Bàu au ma anoe kô, aih au anoe tiaq deh cla au loq ka rađeh, ùh xài anoe tiaq da Chuaq, mahaq qmang ka da mangai blùng.
18 Bàc ngai tiaq xech akia đòeq hu catèh rađeh, au hanoh catèh đeh diq.
19 Majah qmang aih, oh daq aih mangai rabiaq mahaq lem bùi ka tamàng mangai blùng.
20 Joq, oh daq xan dôq yôt wì rùp rađeh broq dìc hapŏng, dôq hloe wì lonh apom, dôq wì blah yŏc da oh daq, dôq wì padèch rađeh đòeq hu halê rai tep ta tabŏc oh daq.
21 Au broq ka nhèn kan camaih jò anoe bàu kô, nhèn joq khoe ùh hùa trong aih. Mahaq tàng cabô i yiniq cleq hùa catèh rađeh, au anoe troeq mangai blùng: Au hanoh hùa.
22 Wì haq mangai Hêbru ùh xài? Au hadai. Wì haq mangai Isorali ùh xài? Au hadai. Wì haq nang noe Apraham ùh xài? Au hadai.
23 Wì haq mangai patìh ka Christ ùh xài? (capoch qmang ka mangai ùh qnì) Òq! Au kiang ma yi loe! Au khoe xalep yi hnau ka wì, oe tù yi bàc, wì blai yi bàc. Bàc yàng au hwaq cachìt,
24 padam yàng mangai Juđa hwat au xi long roe, rìm yàng tam moeq qmang blai hòm hi bình pôn jàt.
25 Piq yàng wì tong xi long dùi, moeq yàng wì đàp xi hmo, piq yàng cram boang. Au khoe đòng mòeq hì mòeq mang ta diac raxìq.
26 Bàc yàng au lam ti trong, yat ti cròng diac, yat ka mangai atùng, yat qne hadai mangai Juđa, yat ka mangai diac wì, yat ta plài, yat tanòe hawit, yat ta diac raxìq, yat ka oh daq ma loq ti gôpla.
27 Au khoe abroq xalep, bàc yàng rìu qngah ka mang, pangot croh ranŏng, ja ka oe rôn, au khoe hmaq tanget hmaq oe chac dech.
28 Qnhòq rèn yiniq qnoeq hòm, aih rìm hì au dìq ep lèt ka rìm Tagop Hadròeh.
29 I cabô ùh nèn, au ma ùh tàng tìah qmòe cla au ùh nèn? Cabô tacro au ma ùh tàng tìah gleq i ùnh bùh ta cliac clèm au qmòh?
30 Tàng joq ep catèh au enh catèh toq dèh kan hamoq da au.
31 Boc Plình aih Baq da Chuaq Jesus Christ, haq aih ma khòh manè apôi mòeq đòe mòeq tui, haq loq ka au ùh capoch qnùt.
32 Oe ta Đamat, cwan kàn da bùa Arêta thê wì rap ta aih hu rùp au.
33 I oh daq yŏc rajŏng cadrai qnoh au enh ti qmŏc gàu tiaq haqmai panàt canàng plài aih, meh au hi claih enh tì kŏng haq aih.