8
Mangai Gu Cadrì Broq Tôiq
1 Jò aih Chuaq Jêxu tŏc ta wang Ôliu.
2 Xrŏih xroq Chuaq Jêxu hlài ta Hnem Cùh Waiq. Dìq ca jàn trùh ti Haq, hi khoi Haq ha'ngui hnài wì.
3 Jò aih, wì thài ranenh wa mangai Pha-ri-si 'ràng trùh mòiq ngai gu cadrì ma wì khoi rùp jò haq tango. Wì thê haq yòng ta'ne wì.
4 Wì doi ca Chuaq Jêxu: “Thài ôi, gu cadrì cô khoi jah rùp jò haq 'nang tango.
5 Tàng broq tiaq Ranenh da Môise thê, khòh tèm hmu jêh cađac mangai gu cadrì 'màng cô, mahaq Ìh doi 'màng leq?”
6 Wì bòch Haq 'màng cô đòiq bahlac Haq, chaq trong takìan ca Haq.
Mahaq Chuaq Jêxu cùp gàu yŏc hadrang tì achìh ta taneh.
7 Wì bòch yôt Haq, 'màng aih Haq yòng doi ca wì: “I mangai leq ŏi ta pì ma ùh lah broq tôiq, đòiq haq tŏch hmu tèm gu cadrì cô adroi beq.”
8 Khoi ca doi bàu cô, Chuaq Jêxu cùp gàu, yŏc hadrang tì achìh ta taneh mòiq yàng hòm.
9 Wì ma tàng bàu cô, wì tiaq dabau loh lam tang ngai mòiq, mangai craq loh lam adroi. Chuaq Jêxu ŏi hlài mòiq ngai, wa gu cadrì aih xôq ŏi yòng ti aih.
10 Chuaq Jêxu yòng bòch mangai cadrì aih: “Wì ma kìan ìh ta leq? Ùh i mangai leq ta'mòq tôiq ca ìh 'mòh?”
11 Gu cadrì aih tèo: “Waiq Chuaq, ùh i.”
Chuaq Jêxu doi: “Au hadai ùh ta'mòq tôiq ca ìh. Lam beq, apaq broq tôiq hòm?”
Chuaq Jêxu Broq 'Ngah Crŏng Taneh
12 Mòiq yàng hòm Chuaq Jêxu doi ca wì: “Au Can 'Ngah crŏng taneh. Mangai leq tiaq Au, èh ùh lam ta clam hòm, mahaq i Can 'Ngah da can rìh.”
13 Mangai Pha-ri-si doi: “Ìh anoi hlài bìac cla Ìh. Bàu anoi hlài cô ùh đang ca lùi.”
14 Chuaq Jêxu tèo hlài bàu wì: “ 'Nhac ca Au anoi hlài bìac cla Au, bàu Au xôq đang ca lùi, ma jah 'màng aih, Au khoi loq Au trùh enh leq wa hlài ta leq, mahaq pì ùh 'nì Au trùh enh leq, hadai ùh 'nì Au lam ta leq.
15 Pì hadrah tiaq chac hamac. Au ùh hadrah cabô.
16 Mahaq, tàng Au hadrah èh, bìac hadrah aih ta-atoq, ma jah 'màng aih, ùh xài Au ŏi mòiq Ngai hadrah, mahaq Au hadrah pajùm ti Baq ma khoi thê Au trùh.
17 Khoi achìh ta sech ranenh pì: Tàng i baiq ngai anoi hlài mòiq bàu, aih đang ca lùi.
18 Au mòiq Ngai anoi hlài bìac cla Au. Baq Au, Haq ma thê Au trùh ta cô, hadai anoi hlài am ca Au.”
19 Wì bòch Haq: “Baq Ìh ŏi ta leq?”
Chuaq Jêxu tèo wì: “Pì ùh loq ca Au, hadai ùh loq ca Baq Au. Tàng pì loq ca Au, èh pì hadai khoi loq ca Baq Au.”
20 Chuaq Jêxu doi bàu cô jò ŏi ta Hnem Cùh Waiq, haten ca thùng tah 'bac. Ùh i cabô hnhu tì rùp Haq, ma jah 'màng aih jò da Haq 'nhòq trùh.
21 Haq anoi hòm ca wì: “Au loh lam, èh pì jah chaq Au, mahaq pì jah cachìt dèh ta tôiq lôi cla pì. Pì ùh jah trùh nòi Au ma padon lam.”
22 Wì mangai Yothaiq anoi ca dabau: “Haq khoi doi: Pì ùh jah trùh nòi Au ma lam, 'màng aih Haq jêh cađac dađeh 'mòh?”
23 Haq anoi paro ca wì: “Pì loh enh 'neq. Au loh enh 'nhèq. Pì loh enh crŏng taneh cô, mahaq Au ùh loh enh crŏng taneh cô.
24 'Màng aih, Au doi ca pì: Pì jah cachìt dèh ta tôiq lôi cla tàng pì ùh lùi Au cô Chuaq Crich, èh pì ep cachìt dèh ta tôiq lôi cla pì.”
25 Wì bòch Haq: “Ìh cô cabô?”
Chuaq Jêxu tèo: “Au khoi doi ca pì Au cabô enh jò baxèm raq.
26 Au i bàc bìac anoi wa hadrah bìac da pì, mahaq Boc Plình ma thê Au trùh ta cô, Haq toq doi bàu joq 'nàng. Au loq anoi hlài ca wì ŏi ta crŏng taneh bìac aih ma Au khoi tàng enh Haq.”
27 Wì ùh 'nì tàng bàu Chuaq Jêxu anoi ca wì haq bìac Chuaq Baq.
28 'Màng aih, Chuaq Jêxu doi: “Jò leq pì dèch atua Con Mangai, jò aih pì jah loq cla Au cô Chuaq Crich. Au ùh tiaq dèh manoh broq bìac cleq, mahaq Au anoi hlài bìac cleq Baq Au ma khoi hnài Au.
29 Haq ma thê Au trùh, jò leq xôq ŏi ti Au. Haq ùh jò leq cađac Au ŏi mòiq Ngai taiq Au lem ca manoh Haq rìm trong.”
30 Jò Chuaq Jêxu anoi ca wì bàu cô, i bàc ngai lùi Haq.
31 Manàiq cô, Haq hadai doi ca wì mangai Yothaiq ma khoi lùi Haq: “Tàng pì cajap manoh tiaq bàu Au, pì men broq mangai hŏc tiaq joq 'nàng da Au.
32 Pì jah loq 'nì ca bàu joq 'nàng, wa bàu joq 'nàng cô jah lêh ca'naih pì.”
33 Wì padreo hlài bàu doi: “Nhèn broq con caiq xinoi da Ap-ra-ham, ùh lah broq hapŏng cabô. Gleq Ìh ma jah doi: Jah lêh ca'naih pì?”
34 Chuaq Jêxu doi: “Au doi ca pì bàu joq 'nàng: Mangai ma leq loq broq tôiq, haq broq hapŏng ca tôiq lôi.
35 'Màng cô, hapŏng ùh jah ŏi hloi ta hnem, mahaq con calô cla ma jah ŏi hloi ta hnem aih.
36 'Màng aih, tàng Con Boc Plình ca'naih pì, èh pì jah ùh tawac ùh pakènh joq 'nàng.
37 Joq, Au loq ro pì xinoi da Ap-ra-ham, mahaq pì chaq trong jêh cađac Au, taiq bàu Au ùh jah mùt ta manoh pì.
38 Au anoi hlài bìac Au ma khoi hnoq ŏi ti Baq Au. Pì broq bìac ma pì khoi tàng ŏi ti baq pì.”
39 Wì padreo hlài bàu doi: “Baq nhèn aih Ap-ra-ham.”
Chuaq Jêxu doi: “Tàng pì broq con caiq Ap-ra-ham joq 'nàng, 'màng aih pì phai broq tiaq trong Ap-ra-ham ma broq.
40 Mahaq manàiq cô pì chaq trong jêh cađac Au, Mangai ma khoi anoi ca pì bìac joq 'nàng Au ma tàng enh Boc Plình. Ap-ra-ham 'nhòq lah broq bìac 'màng aih!
41 Pì hadai broq bìac dù 'màng ca baq pì.”
Wì doi: “Nhèn ùh xài con tango anang. Nhèn i mòiq ngai Baq, aih Boc Plình.”
42 Chuaq Jêxu doi: “Tàng Boc Plình Baq pì, pì jah loq waq ca Au, ma jah 'màng aih taiq Au loh enh Boc Plình. Ùh xài Au tiaq dèh manoh ma trùh ta cô, mahaq cla Haq thê Au trùh ta cô.
43 Gleq pì ma ùh 'nì tàng bàu Au? Aih taiq pì ùh nui 'nì loq tàng bàu Au!
44 Pì loh enh baq pì. Haq can kiac Satan wa manoh pì ham tiaq manoh haq. Enh calah baxèm haq jêh cađac mangai taiq haq ùh chìuq yòng pah bìac joq 'nàng taiq ùh i ca bìac joq 'nàng ŏi ti haq. Jò haq capoch amòng, aih haq capoch tiaq manoh haq, ma jah 'màng aih haq xèm capoch amòng taiq haq broq baq da bàu capoch amòng.
45 Taiq Au capoch bàu joq 'nàng ma pì ùh chìuq lùi Au.
46 Ŏi ta pì i mangai leq rùp Au ta'mòq tôiq jah? Tàng Au capoch bìac joq 'nàng, gleq pì xôq ùh lùi Au?
47 Mangai ma leq broq mangai da Boc Plình, haq tamàng tiaq bàu Boc Plình. Pì ùh tamàng taiq pì ùh broq mangai da Boc Plình.”
48 Wì mangai Yothaiq doi: “Nhèn doi, Ìh Mangai Sa-ma-ri ma i can kiac 'nang ŏi ti Ìh, ma ùh joq?”
49 Chuaq Jêxu doi: “Au ùh i ca can kiac leq, mahaq Au padèch dèh Baq Au mahaq pì jù lê Au.
50 Cla Au ùh chaq bìac 'ngah 'ngai ca dađeh. Baq Au chaq bìac 'ngah 'ngai am ca Au wa cla Haq chaq wa broq rìm bìac am Au.
51 Joq 'nàng, joq 'nàng, Au doi ca pì: Tàng mangai leq wèq cajap bàu Au, haq ùh jò leq cachìt.”
52 Mangai Yothaiq doi: “Manàiq cô nhèn hnoq ro joq 'nàng i kiac ŏi ti Ìh. Ap-ra-ham khoi cachìt. Wì mangai capoch thai da Boc Plình hadai khoi cachìt, mahaq Ìh doi: Tàng mangai leq wèq cajap bàu Au, ùh jò leq cachìt 'mòh?
53 Ìh broq càn yi hnao ca boc nhèn Ap-ra-ham wa 'bài mangai capoch thai da Boc Plình ma khoi cachìt 'mòh? Ìh xoh dađeh cabô?”
54 Chuaq Jêxu doi: “Tàng Au padèch dađeh, can 'ngah 'ngai aih ùh loh cleq. Mahaq cla Baq Au padèch Au. Aih Haq pì ma xôq creo Boc Plình da pì,
55 mahaq pì ùh loq ca Haq, mahaq Au loq ca Haq. Tàng Au doi: Au ùh loq ca Haq, Au broq mangai capoch amòng tìah ca pì, mahaq Au loq ca Haq wa iu tiaq bàu Haq.
56 Boc pì, Ap-ra-ham bùi gòm ngèh jah hnoq hì da Au. Haq khoi hnoq hi lem bùi dìq jaq!”
57 Wì mangai Yothaiq doi ca Haq: “Ìh 'nhòq trùh 50 hanam, hagleq Ìh khoi hnoq Ap-ra-ham?”
58 Chuaq Jêxu doi: “Joq 'nàng, joq 'nàng, Au doi ca pì: Adroi ca jò 'nhòq i Ap-ra-ham, Au, khoi i Au.”
59 Wì tŏch hmu padon tèm jêh cađac Haq, mahaq Chuaq Jêxu lam hlèp, loh khoi enh Hnem Cùh Waiq.