66
Diac Plình Aih Gèq Bùa Da Boc Plình
1 Chuaq doi 'màng cô:
“Plình aih gèq bùa Au,
wa plì crŏng taneh, aih long thòt Au roh jènh.
Pì broq ca Au hnem 'màng leq?
Pì yŏc nòi leq broq ca Au nòi padài?
2 Tì Au khoi broq loh dìq ngè cô, dìq ngè ngan hnoq khoi jah broq loh 'màng aih.”
Chuaq doi 'màng aih.
“Cô mangai Au ha'mrìh ngan,
haq paha'neq dađeh wa cađac dèh manoh broq tôiq lôi,
crè tarìt jò tàng bàu Au capoch.
3 Phàn 'bài mangai broq jam mòiq toq con 'bo
tìah ca mangai jêh đac mangai;
Mangai dèch am con trìu broq ngè tadreo
tìah ca mangai goh ranŏng mòiq toq coq;
Mangai dèch am ngè tadreo xam 'mau mì,
hadai tìah ca mangai dèch am mahem chùa;
Mangai bùh hòi xua
tìah ca mangai cùh waiq kiac dù.
Taiq wì haq khoi ràih ca dađeh trong crài,
wa manoh wì haq enh dèh ca bìac ramòt.
4 Au hadai ràih bìac baxa ca wì haq,
'ràng trùh ca wì haq bìac crè.
Taiq Au khoi creo,
mahaq ùh i ca cabô tèo hlài;
Au capoch, mahaq ùh i ca cabô tamàng;
wì haq khoi broq bìac dù ŏi jang ngìa Au wa ràih bìac ùh lem manoh Au.”
5 Ô 'bài mangai tarìt jò tàng bàu Chuaq,
tamàng bàu Haq beq:
“Oh daq pì mangai git ca pì
wa cađac pì taiq hiniq Au, wì doi:
‘Xìn Chuaq jah 'ngah 'ngai
đòiq nhèn hnoq can lem bùi pì,’
mahaq cla wì haq raq ma camaih.
6 I bàu ta-ùang loh enh phôq,
i atêh loh enh hnem cùh waiq,
aih atêh bàu Chuaq;
Chuaq tabroq chao
ca 'bài mangai ma tagit ca Haq.
7 “ 'Nhòq jìq xa-ông,
haq khoi xa-ông,
'nhòq jìq canhiaq,
haq khoi xa-ông mòiq toq con calô.
8 Cabô khoi lah tàng bìac 'màng aih?
Cabô khoi lah hnoq bìac 'màng aih?
I ca Taneh Diac leq xa-ông loh ta mòiq hì,
loq mòiq tamoi leq xa-ông loh ta mòiq rahyàc ùh?
Mahaq Siôn bu jìq,
khoi xa-ông con calô.”
9 Chuaq doi: “Au cô ma broq ca pù con nga mangai miq tapèh,
ùh am xa-ông 'mòh?
Khoi broq loh bìac xa-ông,
èh tàt hlài pù con nga 'mòh?”
Boc Plình ìh doi 'màng aih.
Èh Phôq Jê-ru-sa-lem Jah Lem Bùi
10 “Ô dìq dŏng ca 'bài mangai loq waq ca Jê-ru-sa-lem, lem bùi ti haq beq!
Manè ca haq beq!
Ô dìq dŏng ca mangai ma hmoi ca Jê-ru-sa-lem,
pajùm ti haq lem bùi beq!
11 Đòiq pì jah ùq panàc
nòi ta-ùq haq;
Đòiq pì jah ôq tàu tìa
enh xèm 'ngah 'ngai da haq.”
12 Ma jah 'màng aih Chuaq doi:
“Cô Au am can catèm hìu trùh ta haq, tìah ca mòiq toq diac cròng,
wa can 'ngah 'ngai da 'bài jàn tìah diac halùih;
pì jah ùq, jah ŏi ta ca'mình,
wa jah ŏi ta achong.
13 Au alòng pì tìah ca mangai miq alòng dèh con,
pì jah alòng ta Jê-ru-sa-lem.”
14 Pì hnoq bìac aih, èh ta manoh jah lem bùi,
wa caxènh pì jah dahlìa tìah ca nhat nga;
tì Chuaq jah pa'noh am ca hapŏng Haq,
mahaq Haq nòih ca mangai ma tagit ca Haq.
15 Cô Chuaq lam trùh xam ùnh,
wa xê tajêh da Haq tìah ca cayeo dêh,
đòiq ùc can nòih Haq ta jò Haq nòih
wa bìac tagàih lech da Haq ŏi ta pla ùnh dêh.
16 Taiq Chuaq yŏc ùnh wa chang gùm hadrah mangai,
Chuaq jêh cachìt bàc ngai.
17 “ 'Bài mangai ma broq ca dađeh lem hreo lam mùt ta 'bài wia đòiq cùh waiq dua 'mù, caq jam chùa, jam cani wa 'bài ngè amùa ma 'noiq, jah cachìt pajùm ti dabau.” Chuaq doi 'màng aih.
18 “Taiq Au loq ca bìac broq wa manoh hèm da wì haq. Khoi trùh jò, Au gop dìq rìm Diac wa rìm bàu capoch; wì haq jah trùh wa hnoq can 'ngah 'ngai Au.
19 “Au 'nac đòiq mòiq teo ŏi ta'ne wì haq, wa thê 'bài mangai ma ŏi xrong da wì haq lam trùh ta 'bài diac Ta-rê-si, Put, Lut, aih jàn ragài ca penh panenh, trùh ta Tuban wa Jawan, trùh ta 'bài pleo Diac ma hangai, aih nòi 'nhòq lah tàng anoi Au wa 'nhòq lah hnoq can 'ngah 'ngai Au. Wì haq jah anoi 'noh bìac 'ngah 'ngai da Au ta 'bài Diac 'noiq.”
20 Chuaq doi: “ 'Bài jàn Diac 'noiq jah 'ràng dìq dŏng 'bài oh daq pì hlài enh rìm Diac. Wì 'ràng wì haq ta xê axêh, xê, kìuq, axêh la, wa lŏcđa lam trùh ta wang hadròih Jê-ru-sa-lem da Au, 'mang ca con jàn Is-ra-ên 'ràng ngè xam 'mau mì ta chrŏng lem hreo trùh hnem cùh waiq da Chuaq.”
21 Chuaq doi: “Au hadai ràih mòiq 'nah mangai ta wì haq broq pajàu wa mangai Lêwi.”
22 Chuaq doi: “Ma jah 'màng aih plình neo taneh neo ma Au padon broq, jah ŏi hloi jang ngìa Au 'màng leq, èh xinoi wa hiniq pì hadai jah ŏi hloi 'màng aih.”
23 Chuaq doi: “Enh hì khê neo cô trùh hì khê neo 'noiq, enh hì Sabat cô trùh hì Sabat 'noiq, rìm ngai jah trùh cùh waiq ŏi jang ngìa Au.”
24 “Jò mangai jàn loh enh gùng, wì hnoq chac hanang da 'bài mangai ma tajraq hlài ca Au; hrai caq hanang wì haq ùh jò leq cachìt, ùnh cheo wì haq ùh jò leq pat, wa wì haq loh ngè ramòt ca rìm mangai.”