60
Phôq Siôn Jah Padèch 'Ngah 'Ngai
1 “Yòng beq, wa xreo 'ngah beq! Ma jah 'màng aih can 'ngah ìh khoi trùh,
wa can 'ngah 'ngai Chuaq khoi plôh tŏc enh ìh.
2 Ngan cô, can clam clôiq glom crŏng taneh,
yùc habàu glàp 'bài jàn;
mahaq Chuaq xreo 'ngah ìh,
can 'ngah 'ngai Haq ŏi ta ìh.
3 Rìm jàn crŏng taneh jah trùh nòi can 'ngah ìh,
wa rìm bùa tangìa ngan can 'ngah plôh tŏc enh ìh.
4 “Blèch mat ngan dudan ca ìh beq,
dìq dŏng ca wì gop dabau wa trùh ta ìh,
con calô ìh jah trùh enh nòi hangai,
ìh jah ca'mình dèh con cadrì ta cŏng tì ìh.
5 Jò cô ìh jah hnoq wa jah xreo 'ngah,
manoh ìh rai tarìt rai ua-ac;
taiq can padrŏng da diac raxìq jah ta-ùc ta ìh,
cùng hang da 'bài Diac 'noiq jah trùh ca ìh.
6 Bàc ngŏng lŏcđa ŏi jàp ta gùng ìh,
lŏcđa hadròng da Ma-đi-an wa Êpha hadai 'màng aih.
Dìq dŏng 'bài mangai Sêba lam trùh
'ràng wang wa nhù hùang,
wì dèch bàu calêu padèch Chuaq.
7 Dìq dŏng calùh trìu da Kêđa tagop ŏi dìq nòi ìh,
'bài trìu calô da Nê-ba-jôt jah broq ngè tadreo đòiq ìh dèch am ta ca'bŏng tadreo Au,
ngè tadreo aih broq lem manoh Au;
wa Au jah broq ca hnem 'ngah 'ngai tam.
8 “ 'Bài mangai cô cabô wì jah pan tìah ca yùc,
tìah ca trù hnem hlài dèh ta cadrong?
9 'Bài phôq ŏi kenh diac raxìq xôq gòm Au;
'bài bong Ta-rê-si adroi dŏng ahlài 'bài con caiq ìh hlài enh nòi hangai,
wa 'bài 'bac wang da wì haq,
đòiq padèch hiniq Chuaq Boc Plình ìh,
Aih Chuaq ma Hadròih da Is-ra-ên,
ma jah 'màng aih Haq khoi broq ca ìh jah 'ngah 'ngai.
10 “ 'Bài mangai Diac 'noiq jah broq hlài panàt phôq ìh
wa bùa wì haq jah patìh ca ìh;
ma jah 'màng aih jò nòih Au khoi jêh ìh,
mahaq taiq bìac am dech da Au, Au khoi xa-ŏch hlài ca ìh.
11 'Bài 'mang ìh hloi hloi pèh, dahì damang ùh clenh,
đòiq wì Diac 'noiq 'ràng ngè canaq trùh ca ìh,
wa 'bài bùa 'bìq 'nong trùh
đòiq broq hapŏng ca ìh.
12 Ma jah 'màng aih jàn leq Diac leq ùh iu ìh èh 'bìq cachìt.
'Bài jàn aih dìq 'bìq raliang đac.
13 “ 'Bài long ralŏng, long clàm,
long 'bat aih can 'ngah 'ngai da Liban,
hadai jah 'ràng trùh ca ìh đòiq anì ca hnem hadròih Au;
Au jah broq ca nòi Au roh jènh jah 'ngah 'ngai.
14 Con caiq da 'bài mangai ma padit padiang ìh jah cùp gàu lam trùh ta ìh;
rìm mangai ma khìn ìh wì jah hacùn cràng ŏi jang jènh ìh.
Wì jah creo ca ìh phôq da Chuaq,
Jê-ru-sa-lem da Haq ma Hadròih da Is-ra-ên.
15 “Calah nèh wì cađac ìh, wì hèt ca ìh,
pi i 'mòi ca cabô ma lam trùh ta ìh.
Manàiq Au broq ca ìh jah padèch hloi hloi,
aih can lem bùi ca 'bài 'nhòng atìq.
16 Ìh jah trôt diac tôh da 'bài diac 'noiq;
ùq tôh da 'bài bùa;
ìh jah loq Au cô Chuaq, Au Chuaq ma dèch ìh, Chuaq Rŏt Dèch Hlài ìh,
Chauq ma I Cwìang Itai dìq dŏng da Jacôp.
17 Au jah am wang thai ca đùng,
am 'bac thai ca mem,
am đùng thai ca long,
am mem thai ca hmu.
Au am can catèm broq cwan wèq cwìang ìh,
am bìac ta-atoq broq cwan wèq pì.
18 Ta gùng ìh pi i tàng anoi trùh bìac ngang dù,
acang taneh ìh hadai ùh i ca bìac raliang piang;
ìh jah doi dèh ca phôq, aih phôq ‘bìac dèch claih,’
wa doi dèh ca 'mang phôq, aih ‘bìac calêu padèch.’
19 Ìh pi ep nhò mat mahì xreo 'ngah dahì,
hadai pi ep nhò mat khê xreo 'ngah jò damang;
Ma jah 'màng aih Chuaq can 'ngah hloi hloi ca ìh,
Boc Plình can 'ngah 'ngai da ìh.
20 Mat mahì da ìh pi mùt;
mat khê pi dìq,
ma jah 'màng aih Chuaq can 'ngah hloi hloi ca ìh,
'bài hì crò hmoi da ìh khoi dìq.
21 Dìq dŏng jàn ìh jah rìh ta-atoq,
wì haq jah hùang taneh cô hloi hloi.
Wì haq mangai Au khoi pìt,
bìac tì Au khoi broq
đòiq Au jah padèch 'ngah 'ngai.
22 Mangai ma 'yoh dŏng ta wì haq jah i bình ngŏng con xau,
mangai ma hamoq dŏng jah wìa mòiq jàn dêh.
Au Chuaq,
Au renh broq bìac aih troq dèh jò!”