10
Toq 'Biaq Bìac Blùng
1 Roi cachìt broq xua om ca dàu xua thùm ta cabi,
hadai 'màng aih bìac blùng toq xìt broq ha'neq đac 'bang tìang da mangai khôn rabiaq.
2 Manoh mangai khôn rabiaq wìh 'nah ta 'ma,
mahaq manoh mangai blùng wìh 'nah ta 'ngeo.
3 Jò lam ti trong,
mangai blùng xôq pa'noh ca rìm ngai jah loq haq cô mangai blùng.
4 Tàng mangai wèq cwìang ìh loh nòih ca ìh,
apaq lam đac,
ma jah 'màng aih pa'noh manoh hatroq jah dŏih bìac daxù càn.
5 Au khoi hnoq mòiq bìac ngang dù enh 'neq ca mat mahì,
aih bìac broq ùh troq da mangai wèq cwìang:
6 Jò wì dèch am ca mangai blùng nòi broq cwan càn,
èh mangai padrŏng can ha'ngui ta nòi ha'neq.
7 Au hadai lah hnoq mangai hapŏng còi axêh,
mahaq mangai gù craq lam jènh.
8 Mangai leq bŏc hàm, cla haq raq jah clìh ta aih,
mangai leq raliang panàt èh 'bìq bìh cap.
9 Mangai leq pah hmu jah 'bìq hmu padit,
wa mangai leq pah long, long aih jah broq habau ca haq.
10 Chòng lùch ùh calenh hlài, ep 'noh bàc padren,
mahaq nhò khôn rabiaq jah broq bàc bìac gêh lem.
11 Tàng bìh cap adroi ca pajàu caxoiq ca haq,
èh bìac caxoiq pi i lòiq cleq am ca mangai aih.
12 Bàu capoch da mangai khôn rabiaq jah pa'noh manoh lem,
mahaq blìa hacùng da mangai blùng broq haiq ca haq.
13 Bàu baxèm capoch da haq blùng, èh palùch bàu capoch da haq, aih bìac dù ranhùa.
14 Mangai blùng 'noh bàc bàu capoch yôt ùh dìq.
Ùh i mangai leq jah loq bìac cleq ma trùh,
hadai ùh mangai leq jah doi adroi bìac cleq jah loh atìq ca haq.
15 Mangai blùng lep tagah dèh ca bìac haq broq,
trùh 'mòi ùh 'nì ca trong hlài dèh ta phôq.
16 Ranàc ca Taneh Diac leq i bùa ŏi raq 'yoh,
wa 'bài cwan caq ôq xrŏih daxroq!
17 Xôq ramŏt ca Taneh Diac i bùa ŏi ta xinoi gù craq càn,
wa 'bài cwan caq ôq jò troq,
đòiq yŏc hlài padren ùh xài waq ca bù.
18 Taiq aroh, long padêh ta hnem loh ca clìh enh 'neq;
wa taiq 'nhùa tì, hnem lop diac catôh mùt.
19 Dahwèq caq jìang broq ca padùc jah panàc,
alac nho jìang broq ca can rìh jah lem bùi,
mahaq i 'bac jah broq gêh rìm hiniq.
20 Ŏi ta adùq cùi, apaq hanip bùa,
hadai apaq hanip mangai padrŏng can,
ma jah 'màng aih yùq chìm jah tàng bàu ìh hanip,
èh haq anoi 'noh dìq ca bìac aih.