2
थिस्सलुनीकियों दा पौलुस उन कार्य
1 हे वार्टुरा अदिक आकतींगेरा, नीव खुद अच जान्सतीर कि नाम नीम हात्ती बरोद बेकार आगीदील
2 लेकीन नीव खुद अच जान्सतीर नीम हात्ती बरोर से पयले फिलिप्पी दा दुख नेगुली अदिक अपमान सहन माळदुर मा भी नाम परमेश्वर नामी ईत्ता साहस कोट्टुन, कि नाव परमेश्वर उन खुशखबरी भारी विरोधगोळ ईरतेला भी नीमी केळसेव.
3 यतिकी नाम्द उपदेश गलतीगोळ से हैलेच अदिक अशुध्द विचार देल, अदिक चालाकी इन सांगुळ हैलेच;
4 लेकीन ह्यांग परमेश्वर नामी योग्य ठहरूस्कु खुशखबरी सौप्सदुन, नाव हांग अच हेळतेव, अदिक इदुर दा मंळसागोळी इक ईला, लेकीन परमेश्वर उक, जो नाम मन इन उद्देशगोळी जाच तान, प्रसन्न माळतेव.
5 यतिकी नीव जान्सतीर, नाव ना रा यागलु चापलुसी माळेव अदिक ना पैस्या अन लालच इन साटी येनारा बहाना माळेव परमेश्वर नाम गवाह आन
6 अदिक नाव ना मंळसागोळ देल, ना दुसरा से, अदिक ना खुद देल प्रशंसा चाहसदेव.
7 यीशु मसीह अन प्रेरित आगा नाता देल नाम नीम मा बोझ हाक सकेव. लेकीन याता प्रकार मोय तान चिकोर्द पालन पोषण माळतार हांग अच नाव भी नीम न्याड्या दा ईतकु धोळ्द कोमलता तोर्सदेव;
8 अदिक हांग अच नाव नीमी हापाळ प्यार माळतेला, नाव खुशी इन सांगुळ परमेश्वर उन खुशखबरी दा नाम जीवन इन द्वारा पुरा तरीका देल सामर्थ्य देल नीम्द मदत माळली तयार ईरेव, इदुरसाटी कि नीव नाम प्रिय आगेगीदीर.
9 यतिकी, हे वार्टुरा अदिक आकतींगेरा, निश्चित अच नीव नाम मेहनत अदिक कष्ट इक याद ईटतीर; नाव इदुरसाटी ईळ्लक हागुल क्याल्सा धंदा माळतेला नीम दा परमेश्वर उन खुशखबरी प्रचार माळदेव कि नीम दा टु यारदु मा भार आगबाळुल.
10 नीव ई मात इन गवाह हुईर, अदिक हांग अच परमेश्वर भी आन, कि नाव नीम विश्वासीगोळ सांगुळ पवित्रता, लायकत अदिक निर्दोषता अन व्यवहार माळेव.
11 नीव जान्सतीर कि नाव नीम सांगुळ हांग अच व्यवहार माळतेव ह्यांग आप्प तान चिकोरगोळ सांगुळ व्यवहार माळतान.
12 कि नाव नीमी प्रोत्साहित माळदेव दिलासा कोट्टेव नाव नीमी विनती माळतेला ईत्तेव कि तान जीवन हिंग बितुसी कि परमेश्वर खुश आगुल, याव नीमी तान महिमा अदिक राज्य दा सहभागी आगोर साटी कारदान.
13 इदुरसाटी नाव भी परमेश्वर उन धन्यवाद लगातार माळतेव कि याग नाम द्वारा परमेश्वर उन खुशखबरी इन वचन नीम हात्ती पोहचुस्त, रा नीव अदरी मंळसागोळ्द ईला लेकीन परमेश्वर उन वचन सम्सकु ग्रहण माळदीर; अदिक सही दा ईद हिंग अच आद; अदिक अद नीम विश्वासीगोळ दा जो विश्वास ईटतीर, प्रभावशाली आद.
14 इदुरसाटी हे वार्टुरा अदिक आकतींगेरा, नीम सांगुळ भी अदा मात आगतद ह्यांग मसीह यीशु दा परमेश्वर उन आ मंडलीगोळ्द यहूदिया दा आद, यतिकी नीव तान लॉकुर से हांग अच छल सहन माळतीर, ह्यांग आंदुर भी यहूदीगोळ द्वारा सहन माळीदुर,
15 यार प्रभु यीशु उक अदिक भविष्यवक्तागोळी भी कोंद कोंडुर अदिक नाम सांगुळ छल माळदुर, अदिक परमेश्वर आंदुर से प्रसन्न हैलेच, अदिक आंदुर सप्पा मंळसागोळ्द विरोध माळतार,
16 अदिक आंदुर गैरयहूदीगोळी आंदुर उद्धार इन साटी परमेश्वर उन खुशखबरी हेळोर साटी नामी रोक्सतार कि हमेशा तान पाप इन घळा तुमतेला ईरूल; लेकीन आंदुर मा परमेश्वर उन भयानक प्रकोप होट बंदाद.
पौलुस उन दुबारा थिसलिनीकिगोळी सिकोद अभिलाषा
17 हे वार्टुरा अदिक आकतींगेरा, याग नाव थ्वाळासा समय इन साटी, मन दा ईला लेकीन मय देल, नीम से अलग आगेगीदेव, रा नाव हापाळ कोशिशगोळ सांगुळ नीमी नोळोर साटी हापाळ कोशिश माळदेव.
18 इदुरसाटी नाव ऊंद धन ईला लेकीन घळी-घळी नीम हात्ती बरोद चाहसदेव, लेकीन शैतान नामी रोक्सकु ईटदुन.
19 भला नाम आशा या आनन्द या बळाई इन मुकुट येन आद? येन नाम प्रभु यीशु उन मुंद आऊन बरोद समय नीम अच ईरतीदील?
20 नाम बळाई अदिक खुशी नीव अच हुईर.