4
1 ना ईद अनतीन कि वारीस यागासताका चिग्द आन, बल्की सप्पा वस्तुगोळ्द स्वामी आन, तरी आऊन दा अदिक दास दा यातोदु भेद हैलेच.
2 लेकीन आप्प उन ठहरूस्द समय ताका संरक्षकगोळ अदिक मुनीमगोळ वश दा ईरतान.
3 हांग अच नाव भी, याग चिकोर ईरव, रा दुनिया अन पयले टु शिक्षा अन वश दा आगकु दास बन्सकु ईरव.
4 लेकीन याग समय पुरा आत, रा परमेश्वर तान पार उक कळुदुन जो आर्त देल पैदा आदुन, अदिक व्यवस्था अन हात्ती पैदा आदुन,
5 ताकी व्यवस्था अन हात्ती गोळी कोंडकु बिळ्स कोमुल, अदिक नामी पार आगोद हक्क सिकुल.
6 अदिक नीव जो पार हुईर, इदुरसाटी परमेश्वर तान पार उन आत्मा अक, जो “हे अब्बा, हे आप्प” अनकु कारूतान, नाम दिलगोळ दा कळ्यान.
7 इदुरसाटी नी ईग दास हैलेच, लेकीन पार हुय; अदिक याग पार आद, रा परमेश्वर उन द्वारा वारीस भी आद.
गलतीगोळ बारा दा पौलुस उन चिन्ता
8 पयले रा नीव परमेश्वर उक ईला जान्सकु आंदुर दास ईरोर जो स्वभाव देल परमेश्वर हैलेच,
9 लेकीन ईग जो नीव परमेश्वर उक अर्त कोंडीर बल्की परमेश्वर नीमी अरतुन, रा आ निर्बल अदिक निकम्मा पयले टु शिक्षा अन मातगोळ दी येती तिर्गतीर, यार्द नीव दुबारा दास आगोद चाहासतीर?
10 नीव दिनगोळ अदिक तिंगुळगोळ अदिक नियत समयगोळ अदिक वर्षगोळी मान्सतीर.
11 ना नीम बारा दा अंजतीन, येल्यारा हिंग आगबाळुल कि जो मेहनत ना नीम साटी माळदीन अद बेकार ठहरूसुल.
12 हे वार्टुरा अदिक आकतींगेरा, ना नीम से विनती माळतीन, नीव नान घाई आगेगी; यतिकी ना भी नीम घाई आगेगीन; नीव नांद येनु बिगळुसीदील.
13 लेकीन नीव जान्सतीर कि पयले पयले ना मय इन निर्बलता अन कारण नीमी खुशखबरी केळ्सदीन.
14 अदिक नीव नान शारीरिक दशा अक जो नीम परीक्षा अन कारण ईरोद, तुच्छ जान्सीदील; ना अदुर देल घृणा माळदीन; अदिक परमेश्वर उन स्वर्गदूत बल्की खुद यीशु मसीह अन घाई नानी ग्रहण माळदुन.
15 रा अद नीम खुशी मानसोद येल होत? ना नीम गवाह हुईन कि अगर आग सकाईत रा नीव तान कण्णगोळी भी तेगुकु नानी कोट्ट बुळायदीर.
16 रा येन नीम से सही माताळोद कारण ना नीम दुश्मन बनसेगीन?
17 आंदुर नीमी संगी माळोद रा चाहासतार, लेकीन भला उद्देश देल ईला; बल्की नीमी ब्यार्र माळोद चाहासतार कि नीव आंदरी का संगी माळकोमी.
18 लेकीन ईद भी वळ्लीद आद कि भला मात दा हर समय संगी माळोद कोशिश माळकु आगुल, ना सिर्फ अदा समय याग ना नीम सांगुळ ईरतीन.
19 हे नान चिकोरा, यागासताका नीम दा मसीह अन रूप बनसेगाल्द, आगासताका ना नीम साटी बाक चिग्द हाळाहोती जो दुख आगतद अद दुख नेगुतीन.
20 इच्छा रा ईद आगतद कि ईग नीम हाती बंदकु दुसरा अच प्रकार देल माताळाईन, यतिकी नीम बारा दा ना उलझन दा आईन.
पुरा अदिक हाजिरा अन उदाहरण
21 नीव जो व्यवस्था अन हात्ती आगोद चाहासतीर, नानी हेळी, येन नीव व्यवस्था अन केळालीर?
22 शास्त्र दा ईद लिख्सकु आद कि अब्राहम उन येढ्ढ पारगोळ आदुर; ऊंद दासी देल अदिक ऊंद स्वतंत्र आर्त देल.
23 लेकीन जो दासी देल आदुन, आव शारीरिक रीति देल पैदा आदुन; अदिक जो स्वतंत्र आर्त देल आदुन, आव वादा अन अनुसार पैदा आदुन.
24 ई मातगोळ दा उदाहरण आद: ई आर्तेर मान्सी येढ्ढ वाचागोळ आर, ऊंद रा सीनै पहाळ इन यदुर देल दास अच पैदा आगतार; अदिक आक हाजिरा हुळ.
25 अदिक हाजिरा मान्सी अरब इन सीनै पहाळ हुळ, अदिक आधुनिक यरूशलेम आकिन बराबर आद, यतिकी आक तान चिकोर समेत दासत्व दा आर.
26 लेकीन म्याकुच इन यरूशलेम स्वतंत्र आद, अदिक अद नाम मोय हुन.
27 यतिकी शास्त्र दा लिख्सकु आद,
“हे वांझला, नी जो पैदा माळाल खुशी माळ;
नी यारी दुख नेगाल, कुतक्या खोल्सकु जय जयकार माळ;
यतिकी त्याग्सद मंळसा अन्द औलाद सुहागीन इन औलाद देल भी यक्कुल आद.”
28 हे वार्टुरा अदिक आकतींगेरा, नाव इसहाक इन घाई वादा अन औलाद हुयेव.
29 अदिक ह्यांग आ समय मय इन अनुसार पैदा आग्द आत्मा अन अनुसार पैदा आग्द उक सतुसोद, हांग अच ईग भी आगतद.
30 लेकीन पवित्रशास्त्र येन अनतद? “दासी अदिक आकिन पार उक तेगु बुळ, यतिकी दासी अन पार स्वतंत्र आर्त इन पार उन सांगुळ उत्तराधिकारी आगतीदील.”
31 इदुरसाटी हे वार्टुरा अदिक आकतींगेरा, नाव दासी नोर ईला लेकीन स्वतंत्र आर्त इनोर औलाद हुयेव.