4
Ekgo djiewan biena Parmeswar ke
1 Toelog kaahe ke etana djhagara kare hai? Toelog khaalie maange hai aapan laalietj poera kare, ohie se toelog aise kare hai.
2 Toelog koetjh maange hai, tabbo toelogke na miele hai. Toelogke laalietj etana barka hai kie koi ke maar dhaar sake hai. Bakie tabbo toelogke na hai djaun maange hai. Tab toelog djhagara kare lage hai. Toelog na praatna me maange hai, ohie se toelogke koetjh na miele hai.
3 Saait toelog praatna kare hai, bakie na safa diel se. Toelog khaalie aapan laalietj ke maare praatna kare hai. Ohie se Parmeswar toelogke na dewe hai djaun toelog ose maange hai.
4 Are, Parmeswar ke tjhor dewe waalan! Toelog to djaane hai kie dje aapan djiewan doenia me ek be-bieswaasie ghat bietaawe hai, oe Parmeswar ke doesman hai. Djab toelog maange hai be-bieswaasie log ke sanghat kare, tab toelog apane ke Parmeswar ke doesman banaawe hai.
5 Ka, toelog sotje hai kie Parmeswar ke poestak me djhoetthe ke liekhal hai kie:
„Parmeswar hamlogke ekgo aatma deis hai aur oe diel bhar se maange hai oe aatma ke oeppar raadj tjalaawe.”
6 Aur Parmeswar ke bhalaai hamlogke laalietj se barka hai. Okar poestak me bhie liekhal hai:
„Parmeswar ghamandie logan ke karaai se rakhe hai, bakie oe nietja manai log ke sahaaita kare hai.”
7 Ohie se apane ke Parmeswar ke aage nietja kar, aur saitaan ke djabarai kar. Tab oe tore lage se bhaag djaai.
8 Aapan dhiaan Parmeswar ke oeppar lagaaw, tab oe apane ke toke auro dekhaaiga. Paapie logan, soen! Aapan tjaal-tjalan badal de. Aur djaun ke doei rakam ke sotj-bietjaar hai, toelog sab kharaab sotj-bietjaar aapan man me se hataai de.
9 Aapan diel ke kharaabie djaan le, aur aapan paap ke biese me oedaas hoike row! Toelogke hasie oedaasie howe ke tjaahie. Aur toelogke khoesiaalie ke tjaahie badale ke ek toetal diel me.
10 Apane ke Parmeswar ke aage nietja kar, tab oe toke oethaaiga aur barka maaniega.
Doesar log ke niendara na kar
11 He bhaai log, toelogke na tjaahie doesar log ke niendara kare ke. Dje doesare ke niendara kare hai aur okar biese me faisala kare hai, oe Parmeswar ke kaanoen ke biese me faisala kare hai aur toere hai. Aisan manai kaanoen par na tjale hai bakie tabbo apane ke kaanoen ke djadj banaais hai.
12 Bakie khaalie Parmeswar kaanoen banaais hai aur oe sattja djadj hai. Oke saktie hai iensaan logan ke sadja dewe ke, aur bhie oelogke aapan sadja me se batjaawe ke. Tab toelog ke baate doesar log ke oeppar faisala kare ke?
Apane ke barwargie na kar
13 Toelog kaisan manai baate? Toelog bole hai: „Aadj kie to biehaan hamlog aisan aisan sahar djaabe. Tab hamlog hoewa ek baries rahab. Hamlog kienab-betjab, tab hamlog dher paisa kamaabe.” Toelog ke baate apane par bharosa kare waalan?
14 Toelog to na djaane hai kie biehaan ka hoiga. Toelogke djiewan djaise os hai. Khaalie thora dien khaatien hai, tab alop hoi dja hai.
15 Toelog bestar boliehe kie: „Djab Parmeswar ke attjha lagiega tab hamlog djiebe aur ie tjiedj kie oe tjiedj karie.”
16 Bakie ab toelog apane ke barwargie kare hai, aur ie na thiek hai.
17 Jaad kar kie dje koetjh barhia kaam djaane hai kare, bakie na kare hai, oe paapie hai.