3
Doei rakam iesaai ekahie hak paaiga
1 Ham toelog khaatien Jiesoe Kriest ke biese me partjaar kare ke dwaara djahal me baatie. Ham siekhaawat rahielie kie tohoelog, tjaahe Israel ke djaatie me ke na baate, tabbo Parmeswar khaatien alag karal gaile hai.
2 Toelog soenle rahiele kie Parmeswar hamme aapan bhalaai dwaara ie partjaar ke kaam deis raha toelogke madat kare khaatien.
3 Djaun baat ham tjhota roep me ie tjietthie me liekhlie hai, oe tjhiepal raha, bakie ab Parmeswar hamme dekhaais hai.
4 Ie baat parhke toelog samadjh sakiehe kaise ham Parmeswar ke gahier matlab ke biese me djaan gailie.
5 Ie baat hamlogke baap-daada logan ke na samdjhaawal gail. Bakie ab Pawietr Aatma aapan pathaawal waalan aur sanesia log ke djanaais hai.
6 Aur ie gahier matlab hai kie Parmeswar Israel ke iesaai log aur ekwa iesaai ke saathe saath hakdaar bana deis hai. Djab oelog khoes khabar soenke bieswaas kare lagal, tab oesab bhie Jiesoe Kriest me saamiel hoi gail. Ohie se Israel ke bieswaasie log me saamiel hoike ohoesab ab Parmeswar ke waada me bhaag lewe hai.
7 Aur ham Parmeswar ke ek naukar hoi gailie ie khoes khabar soenaawe khaatien. Oe hamme bhalaai karke ie dardja deis hai, aur ham aapan kaam okar saktie se kariela.
8 Ham tjaahe sab se tjhota iesaai baatie, tabbo Parmeswar aapan bhalaai dwaara hamke tjoenies hai gair djaatie logan se okar khoes khabar bataawe ke. Ham oesabse bataaila kie Kriest ketana maahaan hai aur kie okar dwaara hamlog sab koi ke kaun kaun barhia tjiedj mielal hai. Oe etana biesaal hai kie koi na sotj aur samadjh sake hai!
9 Parmeswar saara sansaar ke banaawe Waala hai, aur ab talak oe sab djoeg ke tjhiepal baat na dekhaais hai. Aur ham safa se siekhaai sakiela kie oe aapan sotj-bietjaar kaise poera kariega.
10-11 Djaun oe hardam se sallaah karies raha, ie bietjaar oe Prabhoe Kriest Jiesoe ke dwaara poera karies hai. Aur ab oe maange hai kie sab aasmaan ke raadj aur hoekoem tjalaawe waalan iesaai ke samaadj dwaara djaan djaai kie oe aapan waalan khaatien ka karies hai. Tab oesab samdjhiega kie okar biesaal gjaan ketana rang-bierang tjamke hai.
12 Hamlog ose ek baatie aur okare me bieswaas kariela. Aur hamlog bharosa karke aur be-dar se ose batiaai sakiela.
13 Ohie se ham toelogse bientie kariela kie tjaahe hamke doekh oethaawe ke pare hai toelogke khaatien, tabbo toelog hiemmat na hariehe.
Kriest ke biesaal pjaar
14 Djab ham Pieta Parmeswar ke biesaal sotj-bietjaar ke biese me sotjiela tab ham gaathie par gieriela.
15 Oe swarag aur dhartie ke sab koel ke Pieta hai.
16 Oe bahoet biesaal aur maahaan hai, ohie se ham praatna kariela kie oe toelogke aapan Aatma ke dwaara saktie dewe djeme toelogke andar djabar hoi djaai.
17 Aur bhie kie Kriest toelogke bieswaas dwaara toelogke diel djaise aapan ghar banaawe. Tab toelogke diel etana pjaar se bhar djaaiga kie toelog sab tjiedj khaalie prem se kariehe.
18 Ie rakam se toelog ekwan iesaai log ke sanghe samadjh paihe kie Kriest ke pjaar ketana tjakala, lamba, oetja aur gahier hai.
19 Tab toelog djaan djaihe kie Kriest toelogke ketana aur kaun rakam se pjaar kare hai, tjaahe koi na okar pjaar ekdam se samadjh paaiga. Ie sab tjiedj howe ke tjaahie djeme Parmeswar na khaalie toelogke diel ke ek toekkara rahe, bakie ekdam se bhar dewe.
20 Parmeswar ke saktie hamlog me hai aur ese dekha hai kie oe hamlogke praatna aur sotj-bietjaar se bahoet kar sake hai.
21 Samaadj me sab Kriest Jiesoe ke saamiel waalan ab aur sab aane waala djoeg khaatien oke maahaan maane! Ha, aisane to hai.