14
Ioaba ese Abesaloma ia hakaua lou
1 Ioaba Seruia ia diba vadaeni king Davida ia ura bada iena natuna Abesaloma do ia itaia lou.
2 Vadaeni Ioaba ese hereva ia siaia, aonega hahine ta Tekoa hanua dekena amo ia boiria mai. Hahine ia ginidae neganai, Ioaba ese ia hamaoroa, ia gwau, “Lau ura oi ese mase tauna totona oi taitai hahine bamona do oi karaia koikoi. Mase totona idia taitai taudia edia puse dabua do oi karaia, bona oiemu huina do oi duaria lasi. Lau ura oi be mase tauna ta totona oi taitai nega daudau ena hahine bamona do oi karaia koikoi,
3 vadaeni king Davida ena vairana dekenai do oi hedinarai, bona lau ese oi lau hamaoroa hereva, be king dekenai do oi gwauraia.”
Bona Ioaba ese hahine be king dekenai do ia gwauraia hereva ia hamaoroa.
4 Vadaeni inai Tekoa hahine be king Davida ena vairana dekenai ia lao, bona tano dekenai iena vairana ia atoa, ia gwau, “King e, mani emu kara, lau do oi durua.”
5 Davida ese ia haere, ia gwau, “Oiemu hekwarahi be dahaka?”
Hahine ia gwau, “Lau be vabu, egu tau ia mase vadaeni.
6 Lohia e, guna egu natuna tau be rua. Nega ta idia be uma gabuna dekenai idia heai, bona edia heatu koua totona tau ta be lasi dainai, egu natuna ta ese ta ia alaia mase.
7 Bona harihari egu iduhu taudia ibounai ese lau dekenai idia oda, lau ese egu natuna tamona idia dekenai do lau henia, do idia alaia totona, ia alaia tauna ena mauri davana. Bema unai bamona idia karaia, lau be natuna ta lasi momokani. Inai be hegeregere, egu lahi gida maragina, lau dekenai ia do noho gauna, be do idia habodoa bamona. Bona bema unai bamona idia karaia, egu adavana ena bese, bona iena ladana, do ia ore momokani.”
8 Davida ese hahine dekenai ia haere, ia gwau, “Oiemu ruma dekenai do oi giroa lou, bona oi laloa hekwarahi lasi, badina lau ese inai kerere do lau hamaoromaoroa.”
9 Tekoa hahine ese king ma ia hamaoroa, ia gwau, “Egu lohia bona egu king, lau bona lauegu tamana ena bese, aiemai latanai inai kerere ia noho. Egu king e, oi bona oiemu bese be mai emui kerere ta lasi.”
10 King ia gwau, “Bema tau ta ese oi hagaria totona hereva oi dekenai ia gwauraia, lau dekenai do oi mailaia, bona ia ese nega ta oi do ia hisihisi henia lou lasi.”
11 Ma hahine ese Davida ia noia lou, ia gwau, “Egu king e, mani emu kara oi ese Lohiabada oiemu Dirava do oi noia, vadaeni mase ena davana henia tauna ese mase ma ta do ia havaraia lasi, egu natuna tamona do ia alaia lasi.”
Davida ese hahine dekenai ia haere, ia gwau, “Ia mauri noho Lohiabada ena ladanai lau gwauhamata inai, oiemu natuna be do idia hadikaia lasi momokani.”
12 Vadaeni hahine be ma ia gwau, “Mani emu kara, lau, oiemu hesiai hahine be hereva ta ma lau ura gwauraia.”
Davida ia haere, ia gwau, “Namo, oi hereva.”
13 Hahine ese Davida ia hamaoroa, ia gwau, “Badina dahaka oi sibona ese inai bamona kara idauna Dirava ena taudia dekenai oi karaia noho? Oi ese oiemu natuna tau oi lulua vadaeni, bona iena lou mai dalana oi ese oi koua. Unai dainai, hari lau dekenai oi hereva gauna dekena amo, oi sibona oi gwauraia dika.
14 Ita ibounai do ita mase, ita be ranu, tano dekenai idia bubua bamona, bona tau ta ese inai ranu ia haboua lou diba lasi. To Dirava ese tau ena mauri ia haorea kava lasi. Lasi, to bema tau ta be ia dekena amo daudau herea ia noho, Dirava ese dala ta do ia karaia diba, unai tau do ia abia lou.
15 “Egu lohia bona egu king e, inai hereva oi dekenai hamaoroa totona lau mai, badina be taunimanima ese lau idia hagaria. Lau laloa bema oi dekenai lau noinoi neganai, sedira oi ese lau durua dalana do oi davaria.
16 Lau laloa, oi ese egu noinoi do oi kamonai, bona egu natuna bona lau ia alaia gwauraia tauna ena dala do oi koua. Badina bema unai tau ese egu natuna ia alaia neganai, ai ruaosi be Dirava ese iena bese ia henia tano dekena amo do ai boio.
17 “Lohia e, lau sibona lau laloa, bema lau durua totona oi gwauhamata neganai, oi ese lau do oi hamauria. Badina oi be Dirava ena aneru bamona, bona oi ese namo bona dika edia idau oi diba. Lohiabada, oiemu Dirava, be oi dekenai do ia noho!”
18 King Davida ia haere, ia gwau, “Oi dekenai lau noinoi, gau ta lau dekena amo do oi hunia lasi.”
Hahine ia gwau, “Egu king e, gau ta lau dekenai do oi nanadaia, bona oi dekenai do lau hamaoroa.”
19 Vadaeni king ia gwau, “Lau laloa Ioaba ese oi ia siaia, inai hereva lau dekenai do oi hamaoroa totona, a?”
Hahine ia haere, ia gwau, “Egu king e, oi be oi mauri noho momokani hegeregerena, lau diba oiemu henanadai dekena amo lau raka siri diba lasi, bona egu hereva lau hunia diba lasi. Io, momokani, oiemu hesiai tauna Ioaba ese lau ia oda henia, inai hereva ibounai be oi dekenai do lau gwauraia.
20 To ia ese unai bamona ia karaia, inai lalohisihisi Abesaloma totona do ia haorea totona. To egu lohia e, oi be Dirava ena aneru hegeregerena, bona tanobada dekenai idia vara gaudia ibounai be oi diba.”
Davida ese maoro ia henia, vadaeni Abesaloma be Ierusalema dekenai ia giroa lou
21 Vadaeni king Davida ese Ioaba ia hamaoroa, ia gwau, “Oi kamonai, oi dekenai maoro lau henia, oi lao, eregabe tauna Abesaloma do oi hakaua lou mai.”
22 Ioaba be tano dekenai ia tui diho, iena kwarana tano dekenai ia atoa, Davida dekenai ia tomadiho, bona ia hanamoa. Ioaba ia gwau, “Lauegu lohia bona lauegu king, hari dina lau diba, oi ese lau dekenai oi laloa namo, badina be egu noinoi oi abia dae dainai.”
23 Vadaeni Ioaba ia toreisi, Gesuru dekenai ia lao, Abesaloma ia hakaua mai Ierusalema dekenai.
24 To king Davida ia oda, ia gwau Abesaloma be king ena ruma dekenai do ia noho lasi, ia be ia sibona ena ruma dekenai do ia noho siri. Davida ia gwau, “Lau ura lasi Abesaloma lau itaia.” Unai dainai Abesaloma be sibona ena ruma dekenai ia noho, king ena vairanai ia hedinarai lasi.
Abesaloma bona Davida idia turana karaia lou
25 Abesaloma be toana namo tauna momokani, iena toana be mai ena sivarai bada. Bona tau ta ese ia hereaia lasi, Israela ena kahana ibounai dekenai. Iena aena dekena amo ela bona iena kwarana dekenai ia be maka dikana ta lasi.
26 Iena huina be bada herea, bona lagani ta ta ia utua, ia be metau herea, bona lata herea dainai. Lagani ta ena huina, ia utua gauna, ena metau, be 2 kilogaram mai kahana, king ena sikele metau tohoa gauna dekenai.
27 Abesaloma ena natuna tau be toi, bona iena natuna hahine be tamona, iena ladana be Tamara, hahine mai hairaina momokani.
28 Abesaloma be Ierusalema dekenai ia noho, to king dekenai ia hedinarai lasi, ela bona lagani rua idia ore.
29 Vadaeni Abesaloma ese hesiai tauna ta Ioaba dekenai ia siaia, ia gwau, “Mani emu kara, king dekenai do oi lao, lau totona do oi noinoi.” To Ioaba ia lao lasi. Nega iharuana Abesaloma ese hesiai tauna ia siaia, to Ioaba be ia kamonai lasi.
30 Vadaeni Abesaloma ese iena hesiai taudia ia hamaoroa, ia gwau, “Umui kamonai, Ioaba ena uma be lauegu uma badibadinai. Iena bali anina be unuseni. Unai lao, umui gabua ore.” Idia lao, Ioaba ena uma idia gabua.
31 Unai dainai Ioaba ia toreisi, Abesaloma dekenai ia lao, iena ruma dekenai. Ioaba ese ia nanadaia, ia gwau, “Badina dahaka oiemu hesiai taudia ese lauegu uma idia gabua?”
32 Abesaloma ese Ioaba dekenai ia haere, ia gwau, “Badina be guna, hesiai taudia be oi dekenai lau siaia, lau gwau, ‘Oi mai lau dekenai.’ To oi mai lasi. Lau ura egu hereva, be king dekenai oi hamaoroa. Lau gwau: Badina dahaka lau be Gesuru dekena amo lau mai? Namona be unuseni lau do noho. Lauegu noho unuseni be namo. Lau ura be king ena vairanai do lau hedinarai, bona bema ia laloa lau be mai egu kerere, king ese lau do ia alaia mase be namo.”
33 Vadaeni Ioaba be king dekenai ia lao, inai hereva ia hamaoroa. Bona Davida ese Abesaloma ia boiria. Abesaloma be king dekenai ia ginidae, vadaeni ia tui diho, iena vairana be tano dekenai ia atoa, king ena vairana dekenai. Bona king Davida ese Abesaloma dekenai ia kisi henia.