118
Kwalimu idia abia dainai Dirava idia tanikiu henia
1 Lohiabada do ita tanikiu henia,
badina ita dekenai kara namo ia karaia.
Iena lalokau bona bogahisihisi be do idia noho hanaihanai.
2 Israela taudia inai bamona do idia hereva be namo:
“Lohiabada ena lalokau bona bogahisihisi do idia noho hanaihanai.”
3 Dirava ena hahelagaia taudia be namo do idia gwau:
“Lohiabada ena lalokau bona bogahisihisi do idia noho hanaihanai.”
4 Lohiabada dekenai idia gari taudia ibounai namo do idia gwau:
“Lohiabada ena lalokau bona bogahisihisi do idia noho hanaihanai.”
5 Egu hisihisi lalonai, lau be Lohiabada dekenai lau boiboi,
vadaeni ia ese lau dekenai ia haere henia,
bona unai hisihisi be ia ese ia kokia.
6 Lohiabada be lau dekenai ia noho, vadaeni lau gari lasi.
Taunimanima be edena bamona lau do idia hadikaia diba?
7 Lohiabada sibona ese lau ia durua noho.
Unai dainai lau idia hadikaia gwauraia taudia do lau itaia,
be Lohiabada ese do ia halusidia.
8 Namona be Lohiabada dekenai do ita abidadama henia,
to taunimanima dekenai do ita abidadama henia lasi.
9 Namona be Lohiabada dekenai do ita abidadama henia,
to tanobada gunalaia taudia dekenai do ita abidadama henia lasi.
10 Tuari totona idau bese taudia ese lau idia hagegea,
to Lohiabada ena ladana dekenai lau ese idia lau halusia.
11 Lau idia hagegea, kahana kahana ibounai dekena amo,
to Lohiabada ena siahu dekenai lau ese idia lau halusia.
12 Idia ese nanigo bamona lau idia hagegea,
to idia mase haraga,
kurukuru kakoro dekenai lahi ia mase haraga bamona.
Lohiabada ena siahu dekena amo lau ese idia lau halusia.
13 Idia ese lau idia tuari henia goadagoada,
bona kahirakahira lau moru,
to Lohiabada ese lau ia durua.
14 Lohiabada be egu goada bona egu ane.
Ia ese lau ia hamauria vadaeni.
15 Kamonai!
Dirava ena bese taudia ese,
edia palai rumadia lalonai,
idia boiboi noho mai moale danu, idia kwalimu dainai,
idia gwau,
“Lohiabada ena goada badana ese inai kara ia karaia!
16 Lohiabada ena siahu ese kwalimu ita dekenai ia henia!
Tuari lalonai iena imana idibana be goada momokani!”
17 Lau be do lau mase lasi,
do lau mauri noho,
bona Lohiabada ena kara do lau gwauraia noho.
18 Lohiabada ese lau ia panisia vadaeni, matakani auka dekena amo,
to ia ese mase dekenai lau ia negea lasi.
19 Dubu Helaga ena iduara lau totona do umui kehoa,
vadaeni do lau raka vareai,
Lohiabada do lau tanikiu henia!
20 Inai iduara be Lohiabada ena,
kara maoromaoro taudia sibona idia raka vareai diba.
21 Lohiabada e, oi ese egu guriguri oi kamonai vadaeni,
bona oi ese kwalimu lau dekenai oi henia.
Unai dainai oiemu ladana lau abia isi inai.
22 Inai nadi,
ruma haginia taudia ese idia ura henia lasi,
to hari ia be ruma ena kona nadi badana momokani ia gini noho.
23 Inai be Lohiabada ena kara,
ita itaia noho,
bona ita hoa noho.
24 Lohiabada ese inai dina,
iena kwalimu dinana ia karaia vadaeni.
Inai dina ita hanamoa,
bona ita moalelaia be namo.
25 Lohiabada e,
oi dekenai ai noinoi noho,
mani ai do oi hamauria.
Lohiabada e,
mani emu kara kwalimu ai dekenai do oi henia.
26 Dirava ese, Lohiabada ena ladana dainai ia mai noho tauna,
be do ia hanamoa.
Lohiabada ena Dubu Helaga lalonai,
ai ese umui ai hanamoa noho.
27 Lohiabada sibona be Dirava momokani.
Ia ese iena laloa diari ita dekenai ia henia vadaeni.
Au edia rigi bona herahera danu do umui dogoatao,
bona boubou patana do umui raka hagegea lao.
28 Oi be egu Dirava, bona lau ura tanikiu henia oi dekenai.
Oi be egu Dirava, bona lau ura oiemu ladana do lau abia isi.
29 Lohiabada do umui tanikiu henia momokani,
badina ia be namo momokani.
Iena lalokau bona bogahisihisi do idia noho ela bona hanaihanai.