14
Iesu ese Sabati Dina dekenai gorere tauna ia hanamoa
1 Sabati Dina ta dekenai, Iesu ese Farisea edia biaguna ta ena ruma dekenai ia daekau, do idia aniani totona. Vadaeni idia ese iena kara idia itaia namonamo noho.
2 Rara gorere ese ia abia tauna ta Iesu ena vairana dekenai ia helai.
3 Vadaeni Iesu ese taravatu taudia bona Farisea taudia dekenai ia nanadaia, ia gwau, “Gorere taudia Sabati Dina dekenai do ita hanamoa be mai taravatu o?”
4 To idia hereva lasi. Vadaeni Iesu ese inai gorere tauna ia abia, ia hanamoa, vadaeni ia siaia.
5 Vadaeni idia dekenai ia hamaoroa, ia gwau, “Umui daika ese iena doniki o iena boromakau guri dekenai bema ia moru diho, be Sabati Dina dekenai do idia veria daekau lasi, a?”
6 Idia ese ia dekenai idia haere lasi.
Manau herevadia
7 Iesu ese vadivadi taudia ia itaia, helai gabudia namo momokani dekenai idia helai, vadaeni parabole ta ia hamaoroa idia dekenai, ia gwau,
8 “Bema tau ta do ia boiboi umui dekenai, headava aria totona do umui lao, gabu namo herea momokani do umui helai diho lasi, aria ena biaguna ese oi ia hereaia tauna ta dekenai do ia boiboi garina.
9 Vadaeni do ia mai oi dekenai do ia hamaoroa, do ia gwau, ‘Oi siri, unai helai gabu be inai tau ena.’ Unai neganai oi be mai hemarai danu henunai gabu dekenai do oi helai diho.
10 To oi dekenai bema ia boiboi neganai, be henunai gabu dekenai do oi helai diho, vadaeni oi dekenai ia boiboi tauna do ia mai hamaoroa oi dekenai, do ia gwau, ‘Egu turana e, oi be ataiai do oi daekau, vadaeni idia helai diho taudia ibounai ese oi do idia hanamoa.’
11 Badina be sibona ia habadaia tauna be Dirava ese do ia hamaragia, to sibona ia hamaragia tauna be Dirava ese do ia habadaia.”
12 Vadaeni Iesu ese ia dekenai ia boiboi tauna ia hamaoroa, ia gwau, “Dina tubua aniani o adorahi aniani do oi karaia neganai, emu turana, o emu varavarana, o kohu momo herea taudia, oiemu badibadinai idia noho taudia, dekenai do oi boiboi lasi, kerukeru vanegai ena davana do idia karaia totona, oi dekenai do ma idia boiboi garina.
13 To aniani do oi karaia neganai, ogogami taudia bona edia tauanina kahana idia dika taudia, bona aena dika taudia, bona matakepulu taudia dekenai do oi boiboi.
14 Unai dekena amo do oi namo, badina idia be kohu lasi, vadaeni kara maoromaoro taudia edia toreisi neganai oiemu davana do oi abia.”
Parabole: Aria badana
15 Iesu danu idia aniani hebou tauna ta ese unai hereva ia kamonaia, vadaeni ia hereva, ia gwau, “Dirava ena Basileia aria dekenai do ia helai diho tauna be do ia moale.”
16 To Iesu ia gwau, “Tau ta ese aria badana ta ia karaia, bona taunimanima momo herea dekenai ia boiboi.
17 Aria ia karaia hegaegae neganai, ia ese iena hesiai tauna ta ia siaia, iena boiboi totona do idia mai taudia dekenai do ia hamaoroa, do ia gwau, ‘Vadaeni umui mai, gau ibounai ia atoa hegaegae vadaeni.’
18 To idia ibounai idia ura lasi dekenai, idia koia gwauraia. Ta ia gwau, ‘Lau be tano ta lau hoia vadaeni, vadaeni itaia totona lau lao, mani emu biaguna do oi hamaoroa.’
19 Ma ta ia gwau, ‘Lau be boromakau 10 lau hoia vadaeni, vadaeni idia do lau itaia namonamo totona do lau lao, mani emu biaguna do oi hamaoroa.’
20 Ma ta ia gwau, ‘Lau be inai harihari lau headava, unai dainai do lau mai lasi.’
21 “Hesiai tauna ia giroa lao, unai hereva iena biaguna dekenai ia hamaoroa. Iena biaguna be ia badu dikadika, vadaeni iena hesiai tauna ia hereva henia, ia gwau, ‘Oi lao haraga, hanua edia huana dekenai, bona dala idauidau dekenai, ogogami taudia, bona edia tauanina idia dika taudia, bona matakepulu taudia, bona edia aena idia dika taudia do oi hakaua mai.’
22 Hesiai tauna ma ia mai, ia gwau, ‘Lohia tauna e, oi hereva hegeregerena lau karaia vadaeni, to ruma be do ia honu lasi.’
23 “Vadaeni iena biaguna ese hesiai tauna dekenai ma ia hereva henia goada, ia gwau, ‘Do oi lao, uma dala dekenai bona ara ibounai dekenai noho taunimanima haida ma do oi haboua, mai hereva goada, egu ruma do idia hahonua.
24 Badina be lau hamaoroa oi dekenai, lauegu boiboi ginigunana dekenai idia mai lasi taudia ese egu aria sisina do idia ania diba lasi momokani.’ ”
Oi ura Iesu ena murinai do oi raka, be do oi laloa namonamo guna
25 Taunimanima momo Iesu danu idia raka lao, vadaeni ia ese iena vairana ia giroa idia dekenai, ia hamaorodia, ia gwau,
26 “Bema tau ta lau dekenai do ia mai, to iena tamana, iena sinana, iena adavana, iena natuna, iena tadikakana, bona iena mauri danu, bema ia laloaboio lasi, ia be hegeregere lasi lauegu diba tahua tauna do ia lao.
27 Bona iena satauro bema ia huaia lasi, bona lauegu murina dekenai bema ia raka lasi tauna, be lauegu diba tahua tauna lasi.
28 Bema tau ta ia ura kohoro ruma do ia haginia, ia be guna do ia helai diho, bona haginia ena davana do ia laloa, bema ia be ruma do ia karaia haorea diba, o lasi?
29 Ia be ruma ena badina bema ia hamatamaia, to bema ia haorea lasi, vadaeni do idia itaia taudia ibounai ese do idia kirikirilaia,
30 do idia gwau, ‘Inai tau ese kohoro ruma haginia totona ia hamatamaia, to ia goada lasi, ia haorea lasi.’
31 O, edena hanua ena king, idau hanua king dekenai do ia tuari henia gwauraia, do ia helai diho guna lasi, do ia laloa karaia lasi, iena tuari taudia 10,000 do idia hegeregere, ia mai noho tauna ena tuari taudia 20,000 dekenai do ia kwalimu diba o?
32 Bema lasi, edia padana be do ia daudau dekenai, ia ese iena hesiai taudia maino gwauraia totona do ia siaia.
33 Unai dainai, umui be emui gau ibounai bema umui rakatania lasi, umui be lauegu diba tahua taudia lasi.
Damena, mamina lasi gauna
34 “Damena be gau namona. To bema damena be mamina lasi, edena bamona ena mamina do ia abia lou?
35 Ia be tano ena hanamoa muramura gauna lasi, hadoa gaudia dekenai hanamoa lasi gauna, vadaeni ia be negea gauna sibona. Mai ena taiana tauna be do ia kamonai.”