24
Parabole: Nadua urona
1 Aiemai hesiai mai guia danu negana, ena lagani namba 9, hua namba 10, bona dina namba 10 dekenai, Lohiabada ese lau dekenai ia hereva, ia gwau,
2 “Tanobada tauna e, inai dina, hari inai dina, ena ladana do oi torea. Badina be hari dina dekenai, Babulonia ena king ese Ierusalema ia koua hagegea hamatamaia inai.
3 Parabole ta be egu dagedage besena taudia dekenai do oi gwauraia, do oi gwau, ‘Lohiabada Dirava be inai bamona ia hereva:
“ ‘Uro ta be lahi ena latanai do umui atoa,
ranu be uro lalonai do umui bubua danu.
4 Vamu namona do umui udaia,
aena, bona pagana.
Turia namodia danu dekena amo uro do umui hahonua.
5 Unai vamu be mamoe namona momokani.
Iena henunai lahi do umui habadaia.
Ranu do umui boilia,
turia bona vamu do umui nadua.’ ”
6 Vadaeni Lohiabada Dirava ese inai bamona ia hereva noho, ia gwau: “Inai hanua, ala-ala taudia momo idia noho hanua, be dika do ia davaria momokani! Ia be uro dikana, mai ena raraka, nega ta idia hagoevaia lasi urona bamona. Vamu ibounai ta ta be uro dekena amo kokia haraga! Namodia do umui tahua gwauraia lasi, do umui kokia kava, badina unai vamu ibounai idia dika vadaeni.
7 Hanua dekenai ala-ala idia karaia, to rarana be tano dekenai idia bubua lasi, tano ena kahu do ia hunia garina. Lasi, to rarana be nadi ena latanai idia bubua.
8 Bona lau ese unai rara be unai nadi dekenai lau rakatania, ia hunia diba lasi gabuna. Unuseni ia hedinarai noho, be unai rara ese davana henia totona ia boiboi noho.”
9 Lohiabada Dirava ma ia hereva inai: “Inai hanua, ala-ala taudia momo idia noho hanua be dika do ia davaria momokani! Lau ese danu au rakuraku do lau haboua, bona do lau habadaia.
10 Lahi audia momo do umui haboua mai! Lahi do umui habadaia, bona vamu do umui nadua namonamo, vasiahu do umui bubua lao, bona turia do umui gabua ore.
11 Vadaeni unai uro, auri laboralabora gauna, mai ena anina lasi danu, be gida siahudia ena latanai do umui atoa, vadaeni siahu bada dainai uro ena auri be do ia diaridiari, bona ena miro, bona ena raraka dikana do idia veve lao ore.
12 To umui hekwarahi kava vadaeni, badina uro ena raraka bona ena miro be lahi ese ia kokia lasi.
13 “Unai uro ena raraka be Ierusalema ena lebulebu miro herea. Badina be lau ese Ierusalema lau hagoevaia toho, to iena miro badana dekena amo ia goeva lasi. Bona ia be do ia goeva lou diba lasi ia lao bona egu badu mai siahu danu ese Ierusalema dekenai iena dika davana ia henia haorea vadaeni.
14 Lau, Lohiabada Dirava ese lau hereva vadaeni. Inai kara be do ia vara, bona lau ese do lau karaia. Lau ese do lau laloa lou lasi, do lau bogahisihisi henia lasi, bona egu lalona do lau giroa lasi. Ierusalema ena dala bona ena kara hegeregerena do lau kota henia. Lau Dirava, Lohiabada ese lau hereva noho.”
Esekiela ena adavana ia mase
15 Lohiabada ese lau dekenai ia hereva, ia gwau,
16 “Tanobada tauna e, gorere haragana dekena amo oiemu adavana, oiemu matana ia ura henia bada noho hahine do lau abia lao. To oiemu lalohisihisi ena toana do oi hedinaraia lasi, do oi tai lasi, bona oiemu matana ena ranu do ia diho lasi.
17 Do oi hahodi, to lalohisihisi ena regena do oi karaia lasi, bona mase dainai do oi taitai lasi. Dabua dekena amo oiemu kwarana do oi kumia, bona emu aena dekenai tamaka do oi karaia. Oiemu uduna dabua dekenai do oi koua lasi, bona mase totona idia taitai taudia edia aniani do oi ania lasi.”
18 Vadaeni, daba neganai lau ese taunimanima lau hereva henidia, bona adorahi neganai egu adavana ia mase. Daba rere neganai lau be Lohiabada ese lau ia hamaoroa hegeregerena lau karaia.
19 Unai neganai taunimanima ese lau idia nanadaia, idia gwau, “Badina dahaka inai bamona oi karaia noho, bona oiemu kara ena anina be dahaka ai dekenai?”
20 Idia dekenai lau haere, lau gwau, “Lohiabada ese lau dekenai ia hereva, ia gwau,
21 ‘Israela taudia do oi hamaoroa, do oi gwau: Lohiabada Dirava be inai bamona ia hereva: Kamonai, umui be egu Dubu Helaga ena goada dekenai umui hekokoroku noho. Ia be emui matadia idia moalelaia noho gauna, bona emui laumadia ese idia ura henia noho gauna. To lau Lohiabada ese unai Dubu Helaga do lau hadikaia, bona emui natudia tau bona hahine, Ierusalema lalonai umui rakatania, be tuari kaia dekena amo do idia mase.
22 Unai neganai umui ese lau Esekiela egu kara hegeregerena do umui karaia, muko dekenai emui uduna do umui koua lasi, bona mase totona idia taitai taudia edia aniani do umui ania lasi.
23 Emui kwarana kumia dabua be emui kwarana dekenai do idia noho, bona emui tamaka be emui aedia dekenai do idia noho. Emui lalodia do idia hisihisi lasi, bona do umui taitai lasi. To emui kara dikadia dainai emui tauanidia be do idia maragi lao, bona umui ta ta dekenai lalohisihisi ena regena sisina sibona do umui karaia.
24 Unai neganai lau Esekiela be toa ta umui dekenai, bona lau ese lau karaia karadia be umui ese do umui karaia. Lohiabada ia gwau inai bamona ia vara neganai, umui be do umui diba ia be Dirava, Lohiabada.’ ”
25 Bona Lohiabada ma ia gwau, “Tanobada tauna e, Dubu Helaga, edia gabu aukana, edia moale bona edia hairai, edia matadia ese idia moalelaia noho, edia lalodia ese idia ura henia noho gauna do lau abia lao. Edia natudia tau bona hahine danu do lau abia lao.
26 Unai bamona lau karaia dinana dekenai heau mauri tauna ta be oi dekenai do ia mai, Ierusalema idia hadikaia sivarai oi dekenai do ia hamaoroa.
27 Unai dina dekenai, oiemu uduna do lau kehoa, bona unai tau dekenai do oi hereva, bona oiemu hereva dalana be do lau koua lou lasi. Unai bamona dekenai oi be toa ta do oi lao Israela taudia dekenai, bona do idia diba lau be Lohiabada.”