8
Tobias Loh Rhaithae A Haek
1 A caak a ok te a coeng nen tah duem hamla ngol uh. Te phoeiah cadong te a khue tih imkhan khui la a khuen.
2 Te vaengah Tobias loh Raphael kah ol te a poek tih a sungsa dongkah a yom nga kah a thin neh a kuet te a khuen. Te te botui hmai dongah a phum.
3 Nga kah a hmueih loh a uet vaengah tah rhaithae te khaw Egypt khosa kah khohla tloe la yong. Tedae anih te Raphael loh a hloem tih a kut a kho pahoi a pin pah.
4 A napayuva phawn a caeh nen tah imkhan thoh te tloep a khaih. Tobias te thingkong dong lamloh tho tih Sarah te, “Ka ngannu tho hang, Boeipa te uem sih lamtah thangthui sih, Amah loh mamih rhoi taengah rhennah neh sadingnah m'paek coeng,” a ti nah.
5 Te dongah thoo rhoi tih boeipa loh sading la khoem bael ham te koe thangthui rhoi tih a uem rhoi. Te vaengah Tobias loh, A pa rhoek kah Pathen namah tah, na yoethen pai. Na ming tah cadilcahma boeih taengah a yoethennah pai saeh. Namah te vaan neh na saihluen boeih loh kumhal duela n'uem pai saeh
6 Adam te na saii vaengah a yuu Eve khaw na saii Te tah anih aka bomkung neh a duelkung ham ni. Tongpa he amah bueng he tah then pawh, Anih bang phek he anih aka bomkung la saii uh sih,” na ti.
7 Kamah huiko he ka loh coeng he Ka cukhalhnah dongah moenih Lungbuei cimnah nen ni Anih he pae lamtah rhennah khaw a dang van eh. Te vaengah hmaih ka patong rhoi eh,” a ti.
8 Te vaengah, “Amen, Amen,” bok a ti rhoi.
9 Te phoeiah tah khoyin kah im hamla cet rhoi.
Tedae Raguel tah thoo tih a sal rhoek te a khue tih hlan to la cet uh.
10 Amah long ngawn tah, “Anih a duek mai khaming, te vaengah kaimih eh thuirhuih thuiyan neh nueihbu la ka om uh pawn ko,” a ti.
11 Hlan a to te coeng nen tah Raguel te im la mael tih a yuu te a khue.
12 Te phoeiah, “Salnu pakhat te cet saeh lamtah so lah saeh. Anih aka hing nim, ka duek nim. Tedae a duek oeh atah hlang loh a ming pawt ah up uh mai sih,” a ti nah.
13 Te dongah a salnu te a tueih rhoi. Hmai im a tok tih a khuila a caeh vaengah tah ditdit a ih rhoi te a hmuh.
14 Te phoeiah salnu te cet tih a hing la a om khaw, a thae a om pawt khaw a thui pah.
15 Te dongah vaan kah Pathen te a uem uh tih Raguel loh, Pathen khaw namah tah na yoethen pai, yoethennah khaw boeih cim pai Namah te kumhal duela amih loh ng'uem pai saeh,
16 Kai he kohoe la nan khueh dongah na yoethen pai, Ka poeknah bang la hno a om pawt dongah, Na sitlohnah bangla kai taengah nan khueh coeng.
17 He camoe rhoi soah thinphoei lungvat na khueh coeng tih, Na yoethen pai coeng. Aw boeipa amih rhoi te rhen lamtah sading la khoembael, Hingsoepnah khuila khuen Omngaihnah neh rhennah neh,” a ti.
18 Te phoeiah a sal rhoek te khothaih hlan ah hlan te et ham a thui pah.
Yuluei Poei
19 Te phoeiah tah a yuu te vaidam buh te muep thong ham a thui pah. Boiva taengah cet bal tih vaito pumnit, tutal pumnit hang khuen tih a ngawn ham a thui pah. Te dogah amih te rhuengphongnah te a saii uh.
20 Te phoeiah Tobias te a khue tih he kah om soah toemngamnah te a hlo sak. “Khohnin hlaili khuiah tah he lamloh na nong mahpawh. Heah na om vetih kai taengah na caak na ok ni. A ko aka thae ka canu he na law na laa ni.
21 Ka khueh he khaw rhakthuem lo lamtah na pa taengah sading la mael. Rhakthuem bal te khaw ka yuu neh kai ka duek phoeiah tah nang ham coeng ni. Ka ca na namning sak. Ka he na pa la ka om tih Edna kha na nu la om. Namah khaw na yuu khaw kumhal duela kaikah coeng ni. Ka ca namning sak,” a ti nah.