12
Raphael kah Thapang
1 Yuluei poei te a boeih nen tah Tobit loh a capa Tobias te a khue tih, “Ka capa aw, nang aka caeh puei hlang kah thapang te ta, anih te kudoe khaw thap thil,” a ti nah.
2 Te dongah, “A pa, meyet ka paek eh? He la kang khuen koeva rhakthuem te ka pae cakhaw a thaenah om moenih.
3 Anih loh nang taengah sading m'pha puei, ka yuu khaw a hoeih sak, tangka neh m'mael puei, nang khaw n'hoeih sak. Te dongah anih te kutdoe meyet ka paek thil eh?” a ti nah.
4 Tobit loh, “Ka capa, anih tah tueng pai, nang khuen boeih khuikah rhakthuem na paek ham khaw,” a ti nah.
5 Te dongah Tobias loh anih te a khue tih, “He la nang khuen boeih te rhakthuem ah na thapang la lo lamtah kam phih pawn eh,” a ti nah.
Raphael kah Thaphohnah
6 Tedae Raphael loh amih rhoi te a huep la a khue tih, “Pathen te uem rhoi lamtah, khosaknah cungkuem hmaiah khaw amah te ming rhoi. Amah loh nangmih rhoi ham hnothen a sai coeng. A ming te uem lamtah koehnah laa sa. Pathen kah khoboe teh pilnam cungkuem taengah hinyah tueng la thui. Amih ming ham tah a hnong la khueh boeh.
7 Manghai kah olhuep tah phah hamla then dae Pathen kah bibi tah ming sak ham neh phoe hamla om. A mah te hinyah tueng la ming. A then saii lamtah a thae loh n'et boel saeh.
8 Yaehnah neh thangthuinah he then. Tedae te rhoi lakah khaw duengnah neh doedannah he then ngai. Duengnah neh a yol m'boei he khaw a thae lamloh muep boei lakah khaw then. Hlang doedanah he tah sui n'tung lakah khaw then.
9 Doednanah long tah dueknah khui lamloh a khang tih tholhnah khaw a voeih pah. Doedanah aka pae hlang tah hingsoepnah neh omngaih ni.
10 Tedae tholnah aka saii tih boethae aka khueh hlang tah amah kha rhal lakah khaw thae.
Raphae Te Phoe
11 “Nangmih rhoi taengah oltak boeih kam phoe pawn ni. Nangmih rhoi taengah ka pha mahpawh. Nangmih rhoi taengah boeih ka phoe tih ka thui coeng. Manghai kah olhuep tah phah hamla then. Tedae Pathen kah bibi tah hinyahnah neh tueng sak ham om.
12 Te dongah namah neh Sarah na thangthui vaengah na thangthui te Boeipa kah hmai la aka khuen tih aka tae khaw kai ni. Hlang duek na up vaengkah te khaw.
13 Te vaengah nang tah thoh hamla na uelh moenih. Na buhcak pataeng na thoh tak tih rhok up hamla na cet.
14 Kai he nang noemcai ham ni n'tueih. Amah te khohnin ah Pathen loh kai he nang neh na langa Sarah hoeih sak khaw n'tueih
15 Kai tah Boeipa kah thangpomnah hmai ah oepsoeh la aka pai tih aka kun, puencawn parhih khuikah pakhat, Raphael ni,” a ti nah.
16 Amih rhoi tah thuen coeng tih a mael a buenglueng thui. Amih rhoi te lakueng rhoi coeng.
17 Tedae amih rhoi te, “Rhih uh boeh, nangmih taengah ngaihmongnah om aeh. Pathen tah phat a yoethen pai.
18 Kai tah nangmih taengah ka om vaengah khaw, kamah ngaihnah bangla ka saii moenih. Tedae Pathen kah kongaih nen ni ka saii. Hnin takuem ah amah te uem lamtah koehnah neh tingtoeng.
19 Naming loh kai he puet nan dawn dae ka caak ka ok moenih. Tahae khaw na mangthui ni na hmuh.
20 Diklai lamloh thoo rhoi lamtah Pathen te ming laeh. Kai tah, kai aka tueih kung taengla ka luei pawn ni. Na taengka a thoeng boeih te daek rhoi,” a ti nah tih anih te luei.
21 Te phoeiah pai hang rhoi dae anih te hmu rhoi voel pawh.
22 Amih rhoi khaw Pathen kah yoethennah te a khoem rhoi tih amah koehnah neh tingtoeng rhoi. Amih taengah Pathen kah puencawn a tueng pah tih, amah kah kopoek rhai bibi bangla Pathen te a ming rhoi.