7
Atloe Cilkhih
1 Boethae na saii boel lamtah, boethae long khaw nang m'vuei boel saeh.
2 Tholhdalh te a hla om tak lamtah, amah te nang lamloh nong bitni.
3 Boethae kah hmakhuen dongah cangti soem boeh, a cangvuei te voeirhih la na yun het mahpawt nim?
4 Hmuen sang lamkah Boeipa neh, Manghai taengkah thangpomnah ngolhmuen te toem boeh.
5 Na duengnah te Boeipa hmaiah thaem boel lamtah, na cueihnah khaw manghai hmuh ah tai boeh.
6 Laitloekkung la om ham khaw tlap soeh boeh, dumlai kah a yung ka phil tloel la na om ve. Thaomnah kah a hnaephnap la na om vetih, na cuepmueihnah khaw yip muei ve.
7 Hlangping soah boekoeknah saii boel lamtah, pilnam taengah namah te rhaidaeng la om boeh.
8 Dantatnah na yook pawt mai cakhaw, tholhnah he a rhaep la koep saii voel boeh.
9 “Ka kutdoe muep a yet he a poek vetih, Khohni Pathen taengah nawnnah ka paek te, a doe bitni,” ti boeh.
10 Na thangthui vaengah na mawnnah te pueh boeh, doedanah paek ham khaw hnoelrhoeng boeh.
11 Mueihla dikdak aka khahing hlang te hnael boeh, Tlayae phoeiah aka thangpom kung om.
12 Na manuca te laithae neh dum boeh, na paya khaw amah te tlam te saii boeh.
13 Laithae boeih tah ngaih loengloeng boeh, te bang khoboe kah a thaih tah a then ka moenih.
14 A hamca rhoek ngoltunnah khuiah bawlh bawlh tlawk boeh, na thangthui vaengah khaw namah loh koep khoep boeh.
15 Bi rhuh neh, lotawn bi khaw thinah boeh, Te te Khohni long ni a suen coeng.
16 Hlangtholh rhoek kah rhaenghmuen ah khaw thum boeh, amih a thungnah a koe moenih tila poek.
17 Namah te a dangdik hil khaw yalh mai, lailak ham dantatnah tah hmai neh keet ni a om coeng.
A Tloe Neh Tukkainah
18 Paya te khaw tangka la yoi boeh, Manuca tak tah Ophir sui banghui pawn ni.
19 Lungcuei neh huta then te hnoo boeh, a muelhtuetnah tah sui lakah ting ngai.
20 Uepom la bi aka bi sal te khaw, a bibi dongah aka tlungmu kutloh hlang te hnaep boeh.
21 Na hinglu loh lungming sal te lungnah saeh lamtah, amih kah a loeihnah ham khaw hloh boeh.
22 Saelhung na khueh atah a then la ngaithuen, na hoeikhangnah hang khuen khuitah a then la khoem.
23 Na ca a noe vaengah na ol a ngai hamla amih te thutuen lah.
24 Na canu te a caeh long ah hlahpham boeh, anih te tongpa rhoek tang lamloh tungaep lah.
25 Canu te vasak sak lamtah bibi tung coeng laeh, tedae anih te tongpa tang taengah mah paeh.
26 Yuu na lungnah te na khueh atah anih te maa boeh, tedae lung na hnoel hlang te namah long khaw tangnah boeh.
27 Na thinko boeih neh na pa te hinyanah lamtah, Na nu kah ca-om bungtloh khaw hnilh boeh.
28 Amih rhoi loh nang n'cun te poek lah, amih rhoi loh nang m'paek te metlam na thuung thai eh?
29 Boeipa he na hinglu boeih neh rhih lamtah, a khosoih rhoek te khaw hinyah nah lah.
30 Nang aka suenkung te na thaomnah boeih neh lungnah lamtah a bibikung rhoek te khawt sut hnoo boeh.
31 Boeipa te rhih lamtah khosoih te hinyah nah, Nang n'uen bangla a taengah buhham khaw thak lah, Thaihcuek neh boirhaem khaw, kutdoe maeh laeng khaw, tholh dawthnah maeh neh hnocim thaih cuek boeih te khaw.
32 Kho daeng hamla na kut thueng pah lah, te daengah nih na yoethennah khaw a cungkuem eh.
33 Mulhing boeih te moeihoeih la pae, duek khui lamkah ah khaw sitlohnah neh sih boeh.
34 Mikphi aka bo te rhael boel lamtah, Aka uek rhoek taengah khaw nguek puei van.
35 Satlo na hip ham vaengah khaw uelh boeh, te bang khoboe te na lungnah ham om ta.
36 Na saii boeih dongah khaw na hinglung a bawtnah te poek, te daengah ni na tholh pawt eh.