49
1 Josiah kah ming tah botui ka saii thai loh a hmoel, Hmueihmuei botui a thungnom bangla la om. Anih poekkoepnah he hlang ka ah khoitui bangla didip, yukung buhkung kah phungding ol bangla om.
2 A thuem he a saii tih pilnam a tlaih a vong, Te vaengah halang kah tueilaehkoi ne boeih a khoe.
3 A thinko khaw Boeipa taengah rhep a khueh, cungpoeh halang tue te Pathen khoboe neh a uk.
4 David, Hezekiah neh Josiah phoeiah tah, a tloe boeih he hlangtholh koek la om uh. Khohni kah olkhueng te a hno uh dongah, Judah manghai rhoek tah a palthamnah la poeh.
5 Amih kah thaomnah te hlang tloe taengla, amih thangpomnah te namtom kholong taengla a paek.
6 Jeremiah kut dongah a thui bangla, a coelh hmuencuen khopuei te a hoeh pah tih, longpuei caetung te khopong la a khueh pah.
7 Amih loh Jeremiah te khaw a hnaemtaek uh, Anih te a manu bung khuiah Boeipa loh a ciim coeng, aka phu ham, a tulh ham neh aka phae ham khaw, a thoh ham te koep aka phung ham khaw.
8 Ezekial loh thangpomnah mangthui a hmuh, Pathen loh anih cherubim kah a ngol sak.
9 Boeipa loh Job te khaw a thui, anih tah tiktamnah longpuei te khak a tuuk.
10 Tonghma hlainit kah a rhuh khaw thui saeh, te rhoek a yalh nah lamloh hingnah thai khaw om. Te rhoek loh Jakob kah pilnam te a hloep, ngaiuepnah thenkoek neh amih te a hlawt.
11 Zeubbabel te metlam n'koeh lah eh, anih tah bantang kut kah kuha kutcin banghui ni.
12 Te phoeiah Jozadak capa Jeshua he khaw, amih tue vaengah im a sak uh tih. Boeipa kah bawkim cim khaw a thoh dongah dungyan thangpomnah la a khueh.
13 Manghai hnukkhueng Nehemiah khaw poekkoepnah om saeh, anih loh votung aka bung tangtae koep a thoh, Vongka khaw koep a khueh tih thohkalh a saii, mamih kah imkhui aka bung tangtae koep a thoh bal.
14 Diklai hmanah Enoch bangla ana suen hlan, anih tah diklai lamloh vik a pom sang coeng.
15 Joshep bang he pakhat thang vai pawh, Te dongah a rhuh khaw a then la a khoem uh,
16 Shem, Seth neh Enosh khaw hinyah kap, Adam tah a suen mulhing boeih khuiah tanglue la om.