47
1 Samuel phoeiah tah Nathan phoe, David tue vaengah ol a phong.
2 Hmueih pumsoep dong lamkah a tha a hoep bangla, Israel khui lamloh David te hloep a coelh coeng.
3 Sathueng te maae ca bangla, Vom khaw tuping tuca bangla a luemnah.
4 A camoe ah a le khaw a ngawn tih, pilnam kah yahpohnah te khoe het pawt nim? Me vaengah lae payai neh lungcang a hil tih, Hlang hoem Goliath te mat a dae?
5 Anih long tah Boeipa, Khohni ni a khue, Te dongah a bantang kut te thadueng a paek. Te vaengah hlangtlung hlangrhalh khaw a tloek tih, pilnam kah saithainah te a pomsang.
6 Te dongah anih tah thawngrha khaw a noeng tila a thangpom, Boeipa loh yoethennah a khueh pa soah anih a koeh uh, Thangpomnah rhuisam te khaw anih a khuem sak uh bal
7 Kaepvai boeih kah a thunkha te a khoe tih, A rhal Philistine khaw a thup dongah Mamih kah khohnin duela amih te paep uh.
8 A saii boeih soah khaw A Cim Khohni, te a uemtih amah thangpomnah te a doek. Koehnah laa khaw a thinko boeih neh sak, Amah aka suenkung te khaw a lungnah.
9 Hmueihtuk hmaiah laasa rhoek khaw a khueh tih, Amih ol dongah phungding olding a khueh sak.
10 Amah loh khotue ham khaw sawthennah a khueh, Kum khat ham a tue boeih a soepsoei bal, Pathen kah a ming cim te a koeh uh vaengah, hmuencim tah mincang lamloh yue tuenpa coeng.
11 Boeipa loh a tholnah te a loh pah tih, a thaomnah te a yoeyah la a pomsang, Anih taengah manghi paipi neh, Irasael kah thangpomnah ngolkhoel a paek.
12 Anih hnukah capa hlangcueih koep phoe, Anih rhangneh bidip la kho a sak uh.
13 Solomon longtah rhalmongnah tue neh a manghai thil, Pathen loh a khorhi boeih ah rhalmongnah a khueh. Te daengah nih Boeipa ming te im a sak thai eh, Te dongah a rhokso te a yoeyah la a pai sak.
14 Na camoe vaengah mah na cueih tangkik tih, yakmingnah te tuiva bangla na long coeng.
15 Na tangluenah te diklai tom ah yilh cet. Nang tah olcueih thuingaihnah aka dung neh a baetawt.
16 Na mingthang loh khohla sanglak a pha tih, Rhoepnah neh na manghai dongah nang te n'lungnah.
17 Na laa khaw, na olcueih neh thuidoeknah khaw, Na hlatnah loh namtom khaw kopoekrhai a paek.
18 Boeipa Pathen ming rhangneh, Israel Pathen aka khue la om. Sui khaw thi bangla na kol tih, Ngun khaw kawnlawk bangla na hmoek.
19 Tedae na taengah aka yalh la yuu te na loh, Tedongah na pum te boengai oeng la na khueh.
20 Na rhuepomnah te dawih na koelh tih, na im ko te boeih na poeih. Te dongah na ca rhoek khaw kosi na loh pah, na ang dongah amih te nguekcoi uh.
21 Na poengnah ram khaw rhek tih, Epharaim lamkah a poe loh ram a tloelh.
22 Tedae Boeipa loh a rhennah te hlahpham pawh, a bibi te poci sak hamla pakhat khaw khueh pawh. A coelh cadil he tah khoe tlaih mahpawh, A lungnah hlang kah im ko te bit mahpawh. Jakob kah a meet te a khueh tih, a imkhui kah a yung lamloh David a poek sak.
23 Solom te a napa rhoek taengla duem, Te vaengah a ca rhoek te a caehtak, a cueih talh tih a ang ni a yaal Rehohoam, anih kah khoboe loh pilnam boe a koek sak. Nebat capa Jeroboam loh Israel te tholh khuila a mawt, Tholhnah longpuei Epharaim a tong sak.
24 Amih kah tholhnah te ta-oe ta-oe pungtai, a khohmuen lamloh saldong la a khuen hil.
25 Halang koi boeih te a tlap uh, amih soah tawnlohnah a pai duela.