43
Khomik kah Rhuepomnah
1 Sosang koekkah pomsangnah tah vaan khocil ke ni, Vaan mikhmuh kah sawt ham thangpomnah la om bal.
2 Khomik a thoeng vaengah, amah a thoeng te a phoe, Khohni kah kutngo kopoekrhai tubael om.
3 Khothun loh khohmuen a vo tih, u long lae kholing kah a do te a noeng thai.
4 Hmai-ulh dongah bi aka bi te hmailing loh a do, Te lakah khomik loh tlang a do te a pueh pathum la ling. Hmai hu te khaw a phuh tih, khosaeng kah a aa loh mik a dael sak.
5 Te te aka saii Boeipa tah len tangkik, A olpaek khaw a longpuei cet paitok.
Hla Kah Rhuepomnah
6 Hla tah khoning a hoi vaengah noeknah la om khonoek a uk tih, dungyan miknoek la om.
7 Hla dong lamloh khotue hnin kah miknoek khaw om, hla a lum vaengah tah a coengnah khaw soep.
8 Hla sae khaw, a ming a paek bangla, koep thai, he tla a hoilae khaw khobaerhambae pawn ni. Sosang kah caempuei taengah hmaidi la om tih, vaan kah vaikhap dongah vaang.
Aisi Pampacung kah Rhuepomnah
9 Aisi kah thangpomnah tah vaan kah sakthennah la om, Boeipa kah hmuen sang a aa loh a tueng sak.
10 A Cimkoek kah olpaek rhangneh Pai hmuen a hmoel pah dongah rhip pai uh. A bibinah dongah khaw ha sak tlaih pawh.
11 Pampacung ke so lamtah, te aka suen te koeh lah, a aa dongkah a thennah khaw khuet coeng.
12 Thangpomnah payaicung bangla vaan ke a hil, Khohni kah kut te a yueng phai.
Lunglai kah Khobaerhambae
13 A olpek rhangneh vuelsong a tlak sak, Te vaengah a laitloeknah rhaek khaw thui.
14 Te dongah a khai-im ong uh tih khomong te vaa bangla ding.
15 Khomai khaw a rhuepomnah rhang thadueng a paek, Te dongah rhaelnu khaw a nuei la boeih rhek.
16 Amah a thoeng vaengah tlang khaw hinghuen tih, a kongaih rhang neh tuithim yil khaw cu.
17 A rhaek ol loh diklai a ho vaengah tah, Tlangpuei lamkah hli thae neh humhae halo. Amah loh vuel te vaa aka ding bangla a haeh, kaisih a rhum bangla lukluk khoi.
18 A bokthik kah a then loh mik phak tue, te a tlak vaengah a lungbuei khaw a ngaihmang.
19 Diklai ah tuihu te lungkaeh bangla a phul, te vaengah hling ka a hmui bangla a sum.
20 Tlangpuei yilh ding a caeh vaengah, tui soah khaw tuikhal la khal coeng. Te te tubuem tui boeih dongah a khueh, te dongah tui te rhangpho bangla a poeh sak.
21 Tlang khaw a hlup tih khosoek khaw a hoeh, rham tlim te khaw hmai bangla a koh sak.
22 Dotui loh a cungkuem te koe a hoeih sak, Buem a bo vaengah kholing lamloh a hilhoem uh.
23 A mangtaengnah rhangneh a dung kahw a duem sak, Te dongah a sokah tuisanglak te tloep a hol pah.
24 Tuipuei hlaikan rhoek loh a rhihom khaw a thui, mamih loh n'yaak vaengah n'ngaihmang uh.
25 Te khuiah tah aka lang tih kopoekrhai mulhing khaw om, aka hing hno boeih neh tuiham puei khaw om.
26 Boeipa rhangnen ni a puencawn rhoek khophoeng a pha, A ol rhang neh a cungkuem te a cului bal.
27 Muep n'thui thai dae a thui n'hah pawh, a hnukkhueng ol lamtah, “Amah tah a cungkuem la om”.
28 Amah koehnah ham thadueng te melam m'hmuh eh, Amah tah a bibi lakah khaw khuet ngai coeng.
29 Boeipa tah khuet tih len tangkik, a saithainah khaw khobae rhambae pawn ni.
30 Boeipa te thangpom lamtah na coengnah boeih neh amah te pomsang lah. Amah long tah a cungkuem khaw a poe, Amah na pomsang vaengah na thayung boeih huel Te vaengah tawnbanah khaw khueh boeh, Boeipa te a hah la na koeh thai pawt ve.
31 U long a hmuh thai vetih, uh long a thui thai eh, Boeipa a coengnah bangla u long a pomsang thai eh.
32 A huep kah aka yalh lakah he a len muep om pueng, a bibi dongkah a yol ca ni ka hmuh bal pueng.
33 Boeipa loh a cungkuem a saii coeng, tedongah Pathen hlang ni cueihnah a paek.