38
Siboei neh Sadingnah
1 Siboei rhoek he a bibinah dongah a hinyah Amih te Boeipa long a suen khoem.
2 Amih kah hoeihnah kutdoe tah Khohni taeng kah ni Te dongah manghai loh amih te thapang a paek.
3 Siboei rhoek kah thoemthainah loh amih a lang sak, pilnu mikhmuh ah khaw amih te khobae rhambae pawn ni.
4 Diklai dong lamkah si khaw Boeipa loh a phueng, aka cueih long tah te te a sit moenih.
5 Thing hlaeng loh tui a didip sak moenih a? te khaw Boeipa thaomnah ming saek a ti dongah ni.
6 Amah loh hlang taengah thoemthainah a paek, Te khaw kopoerhai bibi te amah n'thangpom saeh a ti dongah.
7 Te neh ni siboei long tloh khaw a koeih pah, Si aka sai long khaw amah te a thoek.
8 Boeipa kah bibi tah bawt mahpawh, amah taengkah sadingnah tah diklai pumah yilh cet ni.
9 Ka ca aw, na tloh vaengah te mong boeh, Boeipa taengah thui lamtah, n'hoeih sak bitni.
10 Na tholhhik te hnawt lamtah na kut a dueng la khueh, na thinko khaw tholhnah khui lamloh cim sak.
11 Botui hmueih neh, buhham poeknah cang sawt khaw nawn, Na hmueih soah situi suep, na saithai khuiah sai.
12 Siboei te a hmuen pae, Boeipa long ni anih te a suen, Anih te na ngoe dongah, na taeng lamloh nong sak boeh.
13 Siboei kut dong lamloh hoeihnah a thoeng he, A tuetang khaw muep om coeng.
14 Amih khaw Pathen taengah ni a thangthui uh, Hoeinah he tah hingnah aka hlawt la om.
15 Suenkung taengah aka tholh tah Siboei taengah khaw birhih van ni.
Duek vaengkah Rhahnah
16 Ka ca, hlang duek ham mikphi bo pai saeh, a tloh muep a ya tah rhah a rhuem ta. Rhokom vaengah khaw na pum rhep pae, Rhok thak hil khaw hlahpham boeh.
17 Na rhahnah khaw khahing sae lamtah na guek khaw nul saeh, na rhungnah khaw aka kum te tungta la khueh. Hnin nit, hnin at tah coelcanah khaw rhael mai, te vaengah a nguekcoinah lamloh na mong bitni.
18 Dueknah lamloh nguekcoinah thoeng maini, thinko kothaenah loh hlang thadueng a caep.
19 Kothae voelh long khaw hlang a khum sak, Khodaeng kah hingnah long khaw thiko a nan.
20 Dueknah khuiah ni nguekcoinah khaw a puek, te khaw boeih khoe lamtah na hmailong mah poek.
21 Ha mael voel pawt te khaw poek, Aka duek coeng ham a then na sai thai moenih, Te dongah namah ni na ngawn uh rhoeng eh.
22 A yoekam te khaw na yoekam la om tila poek Hlaem ah tah anih kah la om, ti hnin tah nang ham om coeng.
23 Duemnah dongah a duek coeng dongah, anih poekkoepnah khaw duem van coeng. Anih tah a mueihla khaw cet coeng, te dongah anih ham te hal mai laeh.
Thenpom neh Kutthai
24 Cadaek rhoek kah cueihnah he a hoenghoepnah tuethen dongah om Bitat aka yanghoep hlang khaw hlangcueih la om thai.
25 Thae cung aka pom tih ma-ae mul aka rhuep khing, Anih te metlam lae hlang cueih la a om thai eh? Anih te vaito a vai, a bibi bueng a khuituk tih, sael kawng bueng la puet a thui.
26 A thinko te laikok kah hmakhuen dongah a hong tih, Saelca kah a kamvuelh bueng la a ngaithuen.
27 Kutthai neh kutthai boeih khaw te tlam ni, amih te khoyin neh khothaih ah khaw thakthae uh. Amih loh kutbuen kutnoek khaw a picai uh, a comluem neh ngaih om koila bahoeng a saii uh. Muei te mueihing bangla a hluk vaengah thingko a hong uh, bibi a coengnah rhi hil amih tah ngaithuen uh.
28 Te tlam te thidae khaw om tih, thilung neh ngol A thi dongah ne a paelki a pumsa a duih hil ah hmai te a hmuh, hmai-ulh hmailing neh thingthuel uh. A thilung ol khaw a hna dongah khang cu, a mik khaw tubael kah rhimong dongla om. A kutthai bibi a coeng hil a thinkoe a paek, a picainah a cung hil te a ngaithuen.
29 Te tlam ni ambop long a bibi a ngol thil, hmuikil lung te a kho neh a tinghil sak, a bisainah dongah a dung la a poek thil, te dongah a thaih khaw muep a thoeng sak.
30 Amlai te a kut neh a hlom, a phaldaep ca khaw a kho neh a saii a bibi a coeng ham khaw a thinko a paek, thoo neh a hluk vaengah khaw a ngaithuen.
31 He boeih he amih kut dongah om, Hlang boeih he amah bibi dongah boeih thoemthai uh.
32 Amih te a om pawt atah khopuei khaw a thoh thai moenih, A hing tue khuiah khaw bungpong la van uh mahpawh.
33 Tedae pilnam rhaengpuei loh amih te toem uh pawt tih, Hlangping kah humtunnah dongah khaw thum sak uh pawh. Amih tah laitloeknah ngolkhoel dongah ngol uh pawt tih, Laitloek yung kah laitloeknah te khaw a ming uh moenih. Amih tah rhilam neh laitloeknah khaw thuicaih thai pawt tih, ukkung lakli ah khaw amih te a thum ngawn moenih.
Cadaek kah Pongthohnah
34 Tedae amih long ni diklai kah rhoengnah a khoembael tih, Te dogah a ngaihuetnah ngawn tah thenpom bibi ham ni, Te dongah hlang amah pum a hloeh la lang van.