32
Buhkung kah Moeiboe
1 Buhkung ah rhoiboei na bi atah namah pom uh boeh, amih khuikah hlang bangla amih taengah khaw om van. Amih te ngaithuen lamhma lamtah ngol, na hutnah te na coeng phoeiah mah ngolhmuen lo.
2 Te daengah ni a mih lakli ah khaw ng'uem uh vetih, mawtkung thenkah samkhuem te na dang eh.
3 A ham la na om atah thui van, te te namah hamsum ni, Tedae mingnah neh a khuetnet la om saeh, Te vaengah phungding ol te rholrhak boeh.
4 Omngaihbawtnah hmuen ah na olcal te hawk boeh, a tuetang pawt ah na boethen te yan boeh.
5 Sui rhaiphuelh soah aithilung a om bangla yukung buhkung ah tumbael neh lamnah khaw om.
6 Sui rhaiphuelh dongkah lungthen a om bangla yu a tui dongah tumding olthen khaw om
7 Na camoe dae a tueng atah thui ngawn, tedae voeinit lakah tah yet boel saeh, n'dawt bueng mah dawk thui.
8 Muep om cakhaw ol a yol neh bawt thui, a ming dae olka aka tuem hlang la om lah.
9 Hlang len lakli ah khaw vanat la thuenglaeng boeh, A tloe loh a thui vaengah caitawk mailai boeh.
10 Rhaek hmai lah khophaa a caeh lamhma bangla muelhtuet hmai ah oepnah khaw cet.
11 A tue then vaengah nong lamtah hnukkhoem la om boeh, im la koe mael lamtah calnat boeh.
12 Na thinko loh a huem bangla namah khaw umya mai, tedae hoem ol lamloh tholhnah he om boel saeh.
13 Cungkuem boeih lakah nang aka suen te uem lah, amah loh nang te kutdoe then n'kum sak bitni.
Pathen kah Khokhannah
14 Pathen aka tlap long tah amah toelnah a doe ni, amaih tlap hamla yueya aka tho tah kolonah a hmuh ni.
15 Olkhueng aka tlap tah te nen te baetawt veih, hlangthai palat tah te soah te paloe ni.
16 Boeipa aka rhih long tah laitloeknah khaw a thuem la boel ni, te vaengah duengnah te vangnah bangla a tok ni.
17 Hlang tholh long tah toelnah te a aek vetih, oltloeknah khaw amah kongaih bangla a tlap ni.
18 Aka khuel hlang long tah poeknah te a poek ni sawtrhoel pawh, thinthah neh thinlen tah rhihnah long khaw a cahoeh tloel.
19 Na thuep mueh la mebang khaw saii boeh, Tedae na sal bal atah yut boeh.
20 Caeh thae namtlak ah khaw cet boeh, longkoek ah hna voei la tongtah boeh.
21 Long then ah khaw hmae aih boeh, Na namtlak te a then la hnatungnah khueh.
22 Namah ca rhoek nawn khaw ngaithuen.
23 Bitat boeih dongah namah khoembael uh, he tlam ni olpaek na tuem eh.
24 Olkhueng aka tuem long tah amah khoembael uh, Boeipa tongah aka patung tah yawk tlaih mahpawh.