23
1 O Boeipa, a pa neh ka hingnah Boeikung aw, amih kah khoboe dongah kai he n'hlahpham boeh. Amih kongah ka cungku tarha boel mai eh,
2 Ka poeknah neh ka lungbuei cueihnah, a rhimong he a hlam lah ve? Ka lolhnah dongah khaw kai n'rhen boeh, ka tholhnah he khaw sut so mai boeh.
3 Ka tholhhiknah he pungtai vetih ka tholnah khaw ping tarha ve.
4 O Boeipa, a pa neh ka hingnah Pathen, Oekhlawnnah mik tah m'pae boel mai.
5 A thae huengainah te kai lamloh khoe saeh,
6 Calawm neh cukhalh long khaw n'gkhuk boel saeh, Cahoehnah rhaidaeng te khaw kai m'pae boeh.
Olka Tuemnah
7 Ka ca aw, hmuilai kawng ah tuituennah he, hnatun lah, te te aka paelki hlang tah man voel mahpawh.
8 Hlang tholh rhoek tah a hmuilai dongah man tih, soehsalkung neh thinlen long khaw te nen te hlang a hliphen.
9 Na ka te thaephoeinah neh ngaitoeih sak boeh, A Cim Pathen ming khaw nulnah aih boeh.
10 Dawnnah hmuiah khak aka om tueihyoeih bangla a pueitut te om mueh mapawt nim? Ol aka hlo vawtawp tih Pathen ming aka phoei khing khaw, a tholhnah lamloh a cim tloe moenih.
11 Thae muep aka phoei khaw a boethae te hah tih, rhuihet loh a imkhui te hlah mahpawh. A tholh la ol a hlo atah, a soah tholhnah om coeng, a poek bawt bal atah, rhaepnit la tholh bal coeng. Olhlo te a hong a thui atah, a nih te tang mahpawh, a imkhui ah citcai nen ni a bae eh.
Olthae
12 Dueknah neh aka tluk olthui longim he om, Jakob rho dongah te bang te phoe boel saeh. Tebang khoboe te hlang cim taeng lamloh hla saeh, Te dongah tholhnah khuila bol uh boel saeh.
13 Na ka te ol rhong ol ing ne ngaitoeih sak boeh, Te bang olcal dongah te tholhnah om coeng.
14 Hlang len laklo kah na ngol vaengah khaw, na nu neh na pa te poek. Amih hmai ah na hnilh uh vetih, boe thae neh hlang ang bangla kho na boe ve. Nang n'cun pawt ham te na hue vetih, na thangnah khohnin te na tap ve.
15 Olthae cal hamla aka ngaitoeih hlang tah, a hing khuiah khingai uh tlaih mahpawh.
Cukhalhnah
16 Hlang rhoi tah amah tholnah pung, Te vaengah a pathum loh kosi a yook. Cahoehnah khaw hmai bangla tak tih, boeih a tlum daengah ni a thih pueng eh. Amah hui rhep taengah aka cukhalh hlang tah, hmai a tlum daengah ni a paa pueng eh.
17 Uicuk kah buh he bahoeng tui sitoe cakhaw, a lakuengnah te a duek hil bawt mahpawh.
18 Rhukom thingkong soah aka tholh loh, “U long kai he m'hmuh? A hmuep loh n'thing tih, pabueng loh n'thung, Aka hmu om pawh, balae ka lakuengnah eh? Khohni loh ka tholhnah a poek moenih,” a ti.
19 Anih hlanghing mik loh a hmuh te ni a rhih. Boeipa kah mik te a poek moenih. Boeipa mik he tah khomik lakah a pueh thawng rha aa, hlang kah khoboe neh omih te khaw boeih a sawt, a huephael neh a kaelcong kah khaw boeih a hmuh.
20 Lunglai a suen hlanah amah taengla boeih tueng, Te dongah a thoeng phoeiah khaw a ming.
21 Tekah hlang te khopuei longpuei ah dan a tat vetih, a ngaihuet mueh vaengah anih te a tuuk ni.
22 Te tlam te huta loh a va a maa tih, hlang tloe neh a cun vik te a va kah rho a paek.
23 Anih long te lamhma la, Khohni kah olkhueng a aek tih, a pabae ah tah a va hman ah dumlai a saii. A pathum ah, cukhalhnah dongah samphaih coeng tih, a pali ah hlang tloe neh ca a cun.
24 Te dongah anih hlangping hmaila a khuen vetih, cawhnah te khaw a ca rhoek soah a yueng pah ni.
25 A ca rhoek loh a yung pael thai pawt vetih, a hlaeng dongah khaw a thueih cuen mahpawh.
26 Anih long te khosi yooknah ni a caeh tak vetih, a ming thae te khaw cim tlaih voel mahpawh.
27 Aka hing duen rhoek loh anih te poek vaengah, Boeipa rhihnah lakah aka then he om pawt tih, Boeipa kah olpaek dong luthuk lakah Aka tui ngai he om pawh,” a ti uh ni.