8
Judah Makkabi kah Mulmetnah
1 Makkabi lamkhaw a khue uh Judah neh a hui rhoek te vang khuila duem kun uh. A huiko te a khue tih Judah tangnah dongah a cak rhoek te a tae uh hatah thawng rhuk tluk lo uh.
2 Te vaengah hlang boeih loh a hnaemtaek pilnam te sawt sak ham, lailak rhoek loh a poeih bawkim soah rhennah khueh hamla,
3 boeih a phae tih lairhi neh aka vai uh khopuei te rhen hamla,
4 cammoe cahmang hlangmuen rhoek loh a ngawn tih Boeipa ming dongah soehsalnah aka khueh rhoek te poek hamla, boethae a thinah te khaw tueng sak hamla Boeipa te a khue uh.
5 Makkabi loh a caem te a hueh van te namtom loh anih te oel thai voel pawh. Boeipa kah kosi khaw sitlohnah la mael coeng.
6 Yaak sak muehla, khopuei vang ca te hmai neh a hlup pah. Namtlam hmuen te khaw a loh dongah rhal aka yong rhoek te a yol mai moenih.
7 Te tla a tloek ham te khaw khoyin ah a kum ngai tloek. Anih thinom te khotom ah yilh thang.
8 Hlang loh paihmuen voehvoeh a dang tih, tanah patoeng neh a hmai la thoeih coeng ti te a hmuh. Te dongah Coelesyria neh Phoenicia kah khoboeih Ptolemy taengah manghai uknah neh bomnah hang khuen hamla ca a pat.
9 Te vaengah Ptolemy loh manghai kah paya puei Patroclus capa Nicanor neh tlek a tuek tih a tueih. Namtom boeih kah Gentile hlang thawng kul lakah a yol mueh te, Judae koca boeih thup hamla a tueih. Te te caemtloek bibi a ming tangtae rhalboei Gorgia loh a puei.
10 Nicarnor loh Judah tamna sal la a yoih dong lamloh talent thawng hnih te Roman taengah manghai kah mangmu la paek ham cai.
11 Te dongah tuipuei kaeng kah khopuei la hlang a tueih. Amih te Judah sal lai ham neh sal sawmko te talent khat la a kut dongah tloeng ham a hoe sak. Tedae Tlungthang taeng lamkah lailoeknah loh anih a phatawt ham te a ming moenih.
Caemtloek Ham Rhuengphongnah
12 Nicanor loh a muk thang te Judah taengla a phae vaengah tah rhal loh a paan kawng te Judas loh a hui rhoek taengah a thui.
13 Te vaengah rhalyawt la Pathen kah tiktamnah aka uepvawt rhoek tah yong tih vik cet uh.
14 A tloe rhoek long a hno khueh te a yoih uh tih, amih loh a hmuh noek pawh lailak Nicanor loh a yoih tangtae khui lamloh, hlawt hamla Boeipa te a khue uh.
15 Amamih kongah pawt mai cakhaw a napa rhoek taengkah a saii paipi ham ni. Boeipa amih te a ming cim neh thangpomnah ham ni ana khueh.
16 Tedae Makkabi loh a caem te a hueh vaengah hlangmih thawng rhuk lo. Te vaengah amih te rhalyawp pawt ham khaw, amih taengah halangnah neh aka cet Gentile hlangping te khaw rhih pawt hamla a thaphoh.
17 Kholong kah halangnah pung tih, khopuei cim a hnaemtaeknah soah khaw, pacut rhoek kah khosaknah longpuei boeih a palet soah khaw a mik paelki ham a uen.
18 “Amih te a lungpok haica neh a tlung dongah ni a pangtung uh. Mamih tah Pathen Tlungthang dongah ni m'pangtung uh. Amah loh lu ngawp a thuk vaengah mah, mamih taengla aka lo rhoek neh a ngoe atah diklai pum khaw boeih a ngawn thai,” a ti nah.
19 Te phoeiah amih ham te a napa rhoek taengah bomnah aka pai te khaw, Sennacherib tue vaengah hlang thawng ya khat phoeiah thawng sawmrhet thawng nga a duek kawng te khaw,
20 Galatian loh Babylon ah hmuen a loh tih caemtloek tue vaengah Judah hlang thawng rhet loh Mecdonian hlang thawng hli neh a tloek uh thae te khaw, caemtloek vaengah Mecedoniah hlang thawng li rhap a na. Tedae Judah hlang thawng rhet te vaan lamkah bomnah rhang neh caem thawng ya pakut te na tih kutbuem khaw muep a dang uh.
Judas loh Nicanor A Na
21 He ol rhangneh amih khuiah thinomnah khaw baetawt tih, a olkhueng neh a khohmuen ham tah duek ham khaw sikim uh. Te dongah a caem te hlop li la a paek.
22 A manuca rhoek Simon, Joseph neh Jonathan te a tuek tih boelnah rhip a khueh pah. A boel pakhat dongah hlang thawng khat ya nga rhip om.
23 Cabu cim te tha-ue la aka tae ham Eleazar te koep a tuek bal tih oltlueng la, “Pathen kah Bomnah” kawng te a tae sak. A boel lamhma cuek te amah loh a mawt tih, Nicanor te a vathoh thil.
24 Cungkuem a saii thai Tlungthang Pathen rhangnen tah, rhal te thawng ko lakah a yet a ngawn uh tih, Nicanor kah rhalkap te salaem neh tattloel la boeih om uh. Te dongah amih caem te tah boeih yong uh.
25 Judah sal lai hamla aka cai rhoek kah tangka te khaw boeih a tuuk pa uh. A hla tloe hil khaw a hloem ngawn coeng dae khonoek loh kholaeh a pha coeng dongah mael uh.
26 Te tah Sabbath huet hnin la a om dongah phat hloem uh voel pawh.
27 Sabbath te a yaeh uh phoeiah tah rhal pum dongkah hnopai te a loh uh tih kutbuem te khaw a kol uh. Boeipa koehnah neh uemnah te khaw muep a khueh uh. Te khohnin lamloh tah Boeipa loh amih te a rhen uh tih sitlohnah a tong vaengkah bangla khosak hamla a paek uh.
28 Sabbath phoeiah tah kutbuem te haemtaek aka yook rhoek, nuhmai neh cadah rhoek taengah a paek uh. A coih te amamih tael neh a ca rhoek tael uh thae.
29 Te tlam te a saii uh phoeiah tah rhaengpuei la thangthuinah a khueh uh tih, a sal rhoek taengah moeithennah a soepnah hamla Boeipa kah sitlohnah te a khue uh.
Judas loh Timothy neh Bacchides a Na
30 Timothy neh Bacchide kah caem neh a hmuh uh vaengah amih te thawng kul hlai a ngawn uh tih a pueh la hmuen sang hmuen cak khaw a loh uh. Kut buem khaw muep a loh uh tih, a hnaemtaek rhoek khaw, cadah nuhmai rhoek khaw, patong khaw amah ah vanat la a tael pa uh.
31 Rhal kut kah lungpok haica te a loh uh tih a cok a cok ah a then la a khoem uh. A coih te tah kutbuem khaw Jerusalem la a phueih uh.
32 Te vaengah hlang thae duet, Judah rhoek patangnah muep aka pae, rhalboei Timothy te khaw a ngawn uh.
33 A napa rhoek kah khopuei ah tanah a saii uh vaengah khaw hmuencim vongka te hmai neh a hlup. Im khuiah aka om Chiishes neh a hui rhoek te a ngawn. Te dongah amah kah a muen phuh te a tueng la thapang a dang van.
34 Kosi rhaepthum la aka yook Nacanor loh a khue tih Judah sal lai hamla aka lo thenpom rhoek te khaw,
35 Boeipa kah bomnah rhangneh boeih tlayae uh coeng. Nicanor loh Judah rhoek uihli bangla a poek ngawn dae a khuet la aka ta a caem te khaw a paci pah coeng dongah, rhimom himbai te a dul tih Antioc a pha hil sal yong bangla amah bueng yong.
36 Te dongah Jerusalem kah pilnam a yoih phuh neh Roman taengah mangmu paek ham aka cai Nicanor loh Judah rhoek tah a hulkung khaw om tih, a olhueng te Judah rhoek loh a vai uh dongah Judah rhoek aka noeng he om pawh tila a doek.