JOSHUA
(Joshua)
Joshua Cabu Kawng
Joshua a ti he tah Yahovah-Shua tih Yahovah Tah khangkung Boeipa. Greek ol lamtah (Jesuh) la om. He cabu he Moses a dueknah hnukah Israel ca rhoek mawt hamla a tuek Joshua ming la a khueh. Joshua mawtnah hmuiah Israel ca rhoek loh Kannan ram a lohnah, Israel koca hlainit hamla khohmuen a taelnah kawng a thui. Abraham taengah Pathen loh ol a khueh kawng he olpuei la a tueng sak. Te Boeipa kah kutdoe khohmuen te amih taengla a pha coeng. Israel ca rhoek loh Boeipa taengah huek boe a ngai uh vaengah Kannan khopuei rhoek te a loh uh thai. Jerekho bangla khopuei vongcak pataeng tim. Kannan te Israel kut hmuiah boeih om hlan dae Pathen loh Joshua taengah, “Jordan tuiva khotlak te koca hlainit ham tael pah laeh,” a ti nah. Cabu he Joshua kah olrho phihnah ol neh bawt. Joshua loh pilnam te Pathen taengah uepom la om ham a uen. Olpuei la Shekhem kah a tingtun uh vaengah YHWH Pathen bueng te bawk ham neh, pathen tloe bawk pawt ham paipi a ok uh.
Sawt Yoeinah
Khotlak Kanan a lohnah 1. 1—12. 24
Khohmuen taelnah 13. 1—22. 34
Joshua 23. 1—24. 33
1
Joshua kah Thalohnah
1 BOEIPA kah sal Mosesa duek phoeiah Moses aka bong Joshua, Nun capa te BOEIPA loh a voek tih,
2 “Ka sal Moses duek coeng. Te dongah thoo lamtah namah neh pilnam pum loh Jordan he kat lamtah kai loh Israel ca rhoek taengah ka paek khohmuen la kun lah.
3 Moses taengah ka thui vanbangla na khopha loh a cawt hmuen boeih te nangmih kam paek bitni.
4 Khosoek lamkah Lebanon tuiva puei duela, Khitti khohmuen pum Perath tuiva khotlak tuili puei due pataeng nang khorhi la coeng ni.
5 Na hingnaha tue khui boeih na hmai ah hlang loh m'pai thil thai mahpawh. Moses taengkah ka om bangla nang taengah ka om van ni. Nang te kang rhael pawt vetih nang kan hnoo mahpawh.
6 Amih taengah paek ham a napa rhoek taengah ka caeng tangtae khohmuen te pilnam nang loh na pang sak coeng dongah thaahuel lamtah namning sak.
7 Ka sal Moses loh nang ng'uen olkhueng te boeih ngaithuen tih saii hamla thaahuel lamtah nam khak ning sak. Anih taeng lamloh banvoei bantang la taengphael boeh. Te daengah ni na caeh nah takuem ah lungming la na om uh eh.
8 Olkhueng cabu he na ka dong lamloh na hlong mahpawh. Khoyin khothaih na thuep daengah ni a khuikaha daek bangla boeih saii ham na ngaithuen eh. Te vaengah na longpuei thaihtak vetih lungming la na om uh ni.
9 Nang kang uen moenih a? Thaahuel lamtah namning sak. Na caeh nah takuem ah BOEIPA na Pathen loh nang taengla a om coeng dongah na sarhing sak boeh, rhihyawp boeh,” a ti nah.
Pilnam a Rhuengphong sak
10 Te dongah pilnam kah rhoiboei rhoek te Joshua loh a uen tih,
11 “Rhaehhmuen khui la cet uh laeh. Pilnam te uen uh lamtah thui pah. Na lampu ham te sikim uh laeh. Hnin thum dongah ngawn tah Jordan te m'poeng uh pawn ni. BOEIPA na Pathen loh nang pang sak ham m'paek khohmuen te pang hamla paan uh laeh,” a ti nah.
12 Tedae Reuben koca, Gad koca neh Masnasseh koca hlangvang te Joshua loh a voek tih,
13 “BOEIPA kah sal Moses loh nangmih taengah n'uen olka te poek lah. Nangmih duem sak ham te BOEIPA na Pathen loh a thui tih khohmuen he nangmih taengah m'paek coeng.
14 Huta camoe neh na boiva tah Moses loh nangmih taengah m'paek Jordan rhalvangan kah khohmuen ah om uh mai saeh. Tedae nangmih tatthai hlangrhalh boeih long tah na manuca rhoek kah a hmai ah caem la cet uh lamtah na manuca rhoek te BOEIPA loh nangmih banglaa duem sak due amih te bom uh.
15 BOEIPA na Pathen loh amiha paek khohmuen te amih long khaw pang uh van saeh. Te phoeiah namih kah rho khohmuen la bal uh lamtah BOEIPA kah sal Moses loh khocuk Jordan rhalvangan ah nangmih m'paek te huul uh van,” a ti nah.
16 Te dongah Joshua tea doo uh tih, “Kaimih nang uen boeih te ka saii uh vetih kaimih nan tueih nah boeih la ka cet uh ni.
17 Moses ol te boeih ka ngai uh bangla nang ol te ka ngai uh van ni. Moses taengkaha om bangla BOEIPA na Pathen loh nang taengah om van saeh.
18 Nang kah olthui aka koek tih nang kah olka nan uen te pakhat kangna khaw aka hnatun pawt hlang boeih tah duek pai saeh. Tedae thaahuel lamtah namning sak,” a ti nahuh.