11
Atha neh Mangthuinah
1 A pabae hlaem ah tah mang ka man. Tuipuei lamloh atha pakhat ha luei tih, a phae mul hlainit neh a lu pathum om.
2 A phae loh diklai pum te a khuk tih vaan kah kholi boeih long khaw a hmuh. Te vaengah khomai te a taengvai ah tingtun.
3 A phae kah khatben ah a phae pathum cawn. Tedae tekah yiit tih a phae ca la om.
4 A lu rhoek tah mong uh dae a laklung kah tah a tloe lu lakah len. Te khaw amah khui ah tah bahoeng mong.
5 Atha te a phae neh a ding te ka hmuh. Te vaengah diklai amah khosa boeih soah a poeng.
6 Vaan hmuikah aka om hno boeih loh amah taengah a kuepkol te khaw ka hmuh. A taengah aka cal om pawt tih, diklai dongah mulhing pakhat khaw mueh pawh.
7 Atha te amah khobom dongah phuel uh tih a phae te a pang thil khungdaeng.
8 Te vaengah, “A tue pakhat dongah amah vaengah rhen so boeh, amah hmuen ah rhip ip saeh lamtah amah la koep mael uh saeh,
9 a lu he a bawt duela om saeh,” a ti.
10 Koep ka sawt vaengah ol he a lu dong lamkah ha lo pawt tih, a pum bangli lamkah ni ha thoeng.
11 A phae yung te ka tae vaengah a pum la parhet lo uh.
12 A sawt vaengah bangtang phae te phuel uh, te long te diklai pum a uk.
13 A uknah tue te khaw a bawtnah a pha tih tueng voel pawh. Te te a omnah hmuen te khaw tueng voel pawh. A phae pabae te phuel uh tih a uk bal. Te long tah a tue a sen phat a uk.
14 A uknah te a bawtnah loh a pha bal tih, lamhma kah bangla vik hma bal.
15 Te vaengah ol pakhat ka yaak tih,
16 “Kai ol he hna tun lah, nangmih tah tahae tue boeih ah diklai a uk. He he nang lamloh a hma hlan ah kan thui.
17 Nang hnukkah long tah na uk bangla uk pawt vetih pathuem pataeng lo mahpawh,” a ti.
18 A phae pathumnah te phuel uh tih a uknah khaw lamhma kah a saii bangla a khueh dae vik hma bal.
19 Te dongah a phae neh boeih cet van. A thaa te khaw pakhat lamloh pakhat taengla a pak dae koep phoe voel pawh.
20 Phat ka sawt ngawn. A tue a pha vaengah a hnukah a phae khaw uktaem ham a bantang ah a thoeng pah. A khuiah a uk rhoek te khaw om ngawn dae bang khum bal.
21 A tloe rhoek te ha phoe bal dae uknah te tu uh thai pawh.
22 Te phoeiah ka sawt hatah a phae hlainit neh a phae ca panit te khaw vik hma bal.
23 Atha pum dongah a lu pathum, a phaca parhuk phoeiah tah bang khaw om voel pawh.
24 Phat ka sawt bal vaengah a phae ca rhoi te khaw parhuk taeng lamloh nong tih bantang kah a lu hmuiah om bal. Te vaengah pali tah amah hmuen ah om uh.
25 Ka sawt vaengah a phae ca rhoek loh amamih phuel uh tih uknah te tuuk hamla cai.
26 Ka sawt het mai, a pacuek te hlah uh dae pahoi hma.
27 A pabae khaw hma bal tih a pacuek lakah loe ngai.
28 A hoei rhoi tekhaw ka sawt li vaengah amah neh amah lako ah poeng hamla cai rhoi.
29 A cai rhoi li vaengah a lu aka om (a laklung kah aka om te) hlat haenghang. Te tah a tloe rhoi lakah len.
30 A lu rhoi metlam a pha uh te khaw ka sawt tih,
31 a lu te metlam a mael tih uktaem ham aka cai a phae ca rhoi a caak te khaw ka sawt.
32 He kah a lu he diklai loh a tuuk tih khosa rhoek kah hnaemtaeknah loh a vueinan. Lunglai kah a thaomnah loh lamhma kah aka khum a phae rhoek lakah muep a nan.
33 Te phoeiah ka sawt bal hatah a phae dongkah a saii bangla a laklung kah a lu te khaw vik hma bal.
34 A lu panit te om pueng dae diklai neh a khosak soah kah uktaemnah bangla a saii bal.
35 Ka sawt li vaengah bantang kah a lu loh banvoei kah a lu te a dolh.
Khohong Lamkah Sathueng
36 Ka taengah ol ka yaak loh, “Na hmai te so lamlah na hmuh te poek lah,” a ti.
37 Ka sawt vaengah taih khohong lamkah sathueng aka thoo phek la ka hmuh tih kawk.
38 Hlang mai te atha kah ol ka a cal khungdaeng te khaw ka hmuh. Te vaengha cal tih, “Hnatun lamtah na taengah kan thui eh, Khohni loh nang taengah a thui.
39 Mulhing pali khuiah pakhat aka sueng te nang moenih a? Te khaw kamah lunglai ah aka taemkung ham ni ka saii. Te dongah ka bawtnah he amih dong lamloh hapai pawn ni.
40 Nang tah a palinah la na lo coeng, lamhma kah aka khum mulhing khaw boeih na ta coeng. Nang tah lunglai soah mueirhih a len neh, diklai pum soaha hnaemtaeknah neh thinhulbat la na yoka coeng. Diklai hmankah vuelvaeknah neh kho na sak coeng.
41 Diklai ah lai na tloek dae oltak nen hae moenih.
42 Kodo te na hnaemtaek tih hlangmong te kut na yook sak. Oltak aka thui te na thiinah tih laithae te na lungnah, a thaih aka om sak rhoek kah imlo te na tal sak tih, nang tloh aka pae pawt kah pangbueng te a dang la na yalh sak.
43 Na omthae te Khohni taengla, na hoemdam khaw Tlungluen taengla a pha coeng.
44 Khohni loh amah tue te a sawt tih a bawtnah a pha coeng. A diklai tue loh a soepnah a pha coeng.
45 Te dongah atha nang ngawn tah namah khaw, rhihom na phae khaw, na laithae lu te khaw, aka thae khaw na kutbom khaw, a honghing na pum khaw yip hma pawn ni.
46 Te dongah diklai pum he nang kah kuthlahnah lamloh loeih ni. Vuelvaeknah lamloh a hil hoem ni. Laitloeknah dongah ngaiuepnah om saeh lamtah te te aka saii soah rhennah om nawn saeh.