3
Xowawu wya Khoryenkomo rwonà yokarymatxhàrà on ha.
1 Tàrwon yokarymahoy haxa hatà, Khoryenkomo, Xowaw heno wya. Àsokentok hana. Sesa me Txekmeryu yehtoko, nekarymahoy hatà, àwya. Homayana komo kayaryet me rma, 15 me àtxemnyehàntaxaho mok nehxakon hatà, Txekmeryu. Àtoko rma, Xukneya yamtar hon komo kayaryet me nehxakon hakahpa tà, Ponseyu Peratusu. Àtoko rma, Karyeryeya yamtar hon komo kayaryet me nehxakon hakahpa tà, Eroknesà. Àtoko rma, noro yowtà ryhe, Feryepe rma, anar komo kayaryet me nehxakon hakahpa tà. Eturyeya yamtar hon komo kayaryet me rma, Tàrakonetes yamtar hon komo kayaryet me xarha, nehxakon hakahpa tà, Feryepe. Àtoko rma, Akmeryene yamtar hon komo kayaryet me nehxakon hakahpa tà, Ryesanyasà.
2 Àtoko rma Khoryenkom màn yonye ro komo yoh me nehxatxkon hakahpa tà, Anas komo, Kayfas xarha.
Nyamoro yehtoko rma, tàrwon yokarymahoy hatà, Khoryenkomo, Xowaw heno wya. Sakaryeyas heno murunho rma mok nehxakon hatà, Xowawu. Ahehnawo rma tehtoko, Khoryenkomo rwonà yonytxay hatà.
3 Àro ke toy hatà. Xoknaw horye ro rma tekon hatà, àwararo, mahorye xarha, othoyehra mak hatà. Khoryenkomo rwonà yokarymekon hatà, toto komo wya. Atxke manatxhe, kekon hatà, àwyanye. Anar me harha ayanhànàthàyamo xenytxoko. Ataymompotxok xarha, ohokonye Khoryenkomo yoseryewhokatxho me, àwya ayanhànàthàyamo yowtoho me, kekon hatà, Xowaw heno, toto komo wya.
4 Noro hoko rma menhoy hatà, amnyehra, Esaeyas heno, Khoryenkomo rwonà yokarymanye ro heno. Noro heno karyehtan yawo rma, onà wyaro nkehe, ànmenhothàrànhàrà rma.
Onà wyaro nkehe hampànà, ahehnawono, teryewrye ro. Kohkomo ryhe nomokyan hatà, àro ke osonyhoryetxoko, kehe hampànà, toto komo wya. Tkayaryet komo yomoknàtoko, esamar komo yonyhoryetxow hamà, àmryenon komo. Àro wyaro rma rha, oyowan komo enyhoryetxoko, owyanye Kohkomo rwonà yonytxatxho me, kehe hampànà, ahehnawono.
5 Takawanke asamatho yehtoko, nanohketxow hamà, kehe hampànà. Tàhànke ehtoko, àheterunuthuru yowyatxow hamà, kehe hampànà. Tokemxe ehtoko, hàràsàhse harha neryatxow hamà, kehe hampànà. Ketxetx me ehtoko, ketxetxenketxow hamà, kehe hampànà. Asamatho wyaro, atxke manatxhe, omnyam ha. Àro ke, osonyhoryetxok xaxa mak hampànà, kehe hampànà.
6 Konyhoryenye ro komo nyakyan hatà, Khoryenkomo. Noro yonyatxhe xaxa mak hampànà, toto komo, omeroro, kehe hampànà, ahehnawono, toto komo wya.
Àro wyaro rma nkehe, Esaeyas heno nmenhotho.
7 Xowawu hyaka nomokyatxkon hatà, toto komo, thenyenohnà komo. Àwya ataymomposo nomokyatxkon haryhe tà. Onà wyaro haxa nkekon hatà, Xowawu, àwyanye. Okoye wyaro atxke manatxhe, kekon hatà. Ayataymomrà komo xe rma manatxhe haryhe, oyoseryehrà komo ke mak ha. Ewakhàra Khoryenkom yehtxoho hona moseryehyatxow hamà. Amnye kanàhnohyatxhe hampànà, Khoryenkomo, katxho hona rma moseryehyatxow hamà, kekon hatà. Àro wyaro rma rha, weheto krunke nekahtàmyaha, okoye, kekon hatà, Xowawu, toto komo wya.
8 Anar me harha ranhànàtho wenyaha, màketxhe rma haryhe. Àhnànkahra mak manatxhe ha, kekon hatà. Anar me harha ranhànàtho wenyaha kany me oyehtokonye, ayanhàn komo àhnànkatxoko, ohxe harha oyosonyhotho menye. Onà wyaro rma màketxhe haryhe, kekon hatà. Ohxe rma haxa tehxatxhe, Akmaraw heno yohamàtho kaxe, màketxhe rma haryhe. Àro wyaro kahra ehtxoko, kekon hatà. Onà wyaro haxa ryhe àkehe, owyanye. Akmaraw heno yohamàtho me marma oyehtxoho komo ryhe, ohxehra ro mak naha, Khoryenkomo wya, kekon hatà. Àsok tawro hana. Akmaraw heno yohamrà me marma toto yesnàr xehra nay hamà, Khoryenkomo, kekon hatà. Noro heno yohamrà me marma toto yesnàr xe tehtok haxa, tohu txkotho yakàhtonàràtho haryhe àwya, Akmaraw heno yohamrà me harha. Ehnyahnà ro kax mak naha ha, noro ha, kekon hatà, Xowawu.
9 Àsok hana nay ha, natàtho ha. Ehetahra ehtoko, tamaxem me nay hamà, kekon hatà. Àmxathàr me ro rma tawotosom me nay hamà. Amaxahotho rma, weheto waka tarymaxem me xarha nay hamà, kekon hatà. Àro wyaro rma rha tanàhnohsom me rma manatxhe hampànà. Ayanhàn komo hnànkahra oyehtokonye, mexehra rma haxa ayanàhnohtàketxhe hampànà, Khoryenkomo, kekon hatà, Xowawu, toto komo wya.
10 Àsoke ryhe amna naye, ketxkon hatà, toto komo. Àsoke ryhe amna naye, ohxe harha amna yehtxoho me, ketxkon hatà.
11 Onà wyaro neyuhtxownà hatà, Xowawu. Owakryeno txetxoko, kekon hatà. Owakryeno txetxoko. Twomunke oyehtokonye, 2 me ehtoko, 1 me rma tàmtxoko, toto wya, àwomumnutho wya, kekon hatà. Àro wyaro rma rha, tànyahke oyehtokonye, àhoye rma tàmtxoko, toto komo wya, ànyahpànàtho komo wya, kekon hatà, Xowawu.
12 Tkayaryet komo txenyerunu yahosnye ro komo xarha, ataymomposo nomohtxownà hatà. Khananàhnye y, ketxkon hatà, Xowawu wya. Àsoke ryhe amna naye, ohxe harha amna yehtxoho me, ketxkon hatà.
13 Onà wyaro neyuhtxownà hatà, Xowawu. Owyanye toto komo txenyerunutho yahosnàtoko, eho nyhe ahohsàra ro mak ehtxoko. Oyoh komo rwonàmàthàr yawo ro rma ahohtxoko, kekon hatà, Xowawu, àwyanye.
14 Àto nehxatxkon xarha tà, arymano ynye ro komo. Àsoke ryhe amna naye, ohxe harha amna yehtxoho me, ketxkon hatà, nyamoro xarha, Xowawu wya. Onà wyaro neyuhtxownà hatà, noro ha. Àsok hana manatxow ha, kekon hatà, àwyanye. Àsok hana manatxow ha. Toto heno komo yotahany me manatxow hatà, omnyamo, owyanye àtxenyerunuthuyamo yahohtoho me. Anatoko toto komo wàràhyakany me manatxow hatà, owyanye àtxenyerunuthuyamo yahohtoho me, kekon hatà. Àro hokohra harha ehtxok hampànà. Otxenyerunu ro kom hoko rma teryehorye ehtxoko. Ayanotomany komo nàmàtho hoko rma, teryehorye ehtxoko, kekon hatà, Xowawu, arymano ynye ro komo wya.
15 Koo, onokà ryhe mosonà, ketxkon hatà, toto komo, tàhnawonye. Onà wyaro katxhàr me moson naye. Amnye nomokyaha hampànà Kryestu katxhàr me moson naye, ketxkon hatà. Àro wyaro rma nehutwetxkon hatà, tàhnawonye. Xowaw hoko noseryehoketxkon hatà, toto komo, omeroro.
16 Àro ke, onà wyaro nkekon hatà, Xowawu, àwyanye. Tuna kwaka ryhe kaymomyatxhe, uro ha, kekon hatà. Nomokyaha, anaro, rohryetayo. Rohono rma haxa noro ha. Àhrorà womun yasotà wompokahra wehxaha, esnaka rma haxa ryesnàr ke, kekon hatà. Noro ryhe, anar me ayaymomyatxhe ha. Khoryenkom yokato nyakyaha, ohonanye. Ayaymomtoho komo rma àro ha, noro wya, kekon hatà. Ayaymomyatxhe xarha. Weheto waka txexaho wyaro ayaymomyatxhe, oyonyhoryenàr kom horà, kekon hatà, Xowawu.
17 Àsok hana natxow ha, nasànasà hotnye ro kom ha. Uhpunkatxho yaryatxow hamà. Nasànasà hpunketxow hamà, kekon hatà. Nasànasà ryhe, enyhoru rma yohamnohyatxow hamà, nyah màn yaka. Uhpunuthur haxa ryhe yaknyohyatxow hamà, weheto waka, kekon hatà. Àro wyaro rma rha wahanonkano yeryaha hampànà, noro ha, tomohsomà. Mexehra rma haxa wahanonkano yxe nomokyaha. Enyhoru komo yohamnohyaha hampànà, bàn yaka. Anhàtho kom haxa ryhe yanàhnohyaha hampànà, meya roro, kekon hatà, Xowawu.
18 Àro wyaro nekarymekon hatà, toto komo wya. Anaro rha ke thenyehra nekarymekon hatà. Tonytxahoryemà rma yokarymekon hatà, Xowawu.
19 Àtoko rma, Karyeryeya yamtar hon komo kayaryet me nehxakon hakahpa tà, Eroknesà. Towtà hetxenho yahosày hatà, noro ha. Erokneyasà rma yahosày hatà. Anaro rha tanhàn hoko xarha atxke rma haxa nehxakon hatà. Àro ke noro yoyey hatà, Xowawu.
20 Amnye, tanhànàthàr yoho rma haxa, onà wyaro atxke nexey hatà, Eroknesà. Xowaw heno yahryempoy hatà, watxa ymo yaka.
Txesusu yaymomàthàrà on ha.
21 Toto komo yaymomtàhkatxownà hatà, Xowaw heno. Txesus xarha yaymomye hatà. Noro heno wya taymomàtxhe rma, Khoryenkom yakoro nàrwonakon hatà, Txesusu. Àrwonàmnàtoko rma, natahurmakay hatà, kahe.
22 Nàhtoy hatà, Khoryenkom yokato. Tohànke rma nàhtoy hatà. Watkuk me rma nàhtoy hatà, Txesus hona. Nàrwonàmye hatà, kahe yawono. Romuru omoro, kay hatà. Ronàhnàn xaxa omoro ha. Ohoko teryehorye rma haxa wehxaha, kay hatà, kahe yawono.
Txesus horyen heno yosot komo on ha.
23 Hananàhno yxe nomokye haxa hatà, Txesusu. 30 me àtxemnyehàntaxah me hana nehxakon ha. Xose muru me noro hutwetxkonà rma haryhe tà, toto komo. Txesus horyen heno yosot komo on ha.
Erye heno muru me nehxakon hatà, Xose.
24 Matate heno muru me nehxakon hatà, Erye heno.
Ryefe heno muru me nehxakon hatà, Matate heno.
Mawke heno muru me nehxakon hatà, Ryefe heno.
Xanay heno muru me nehxakon hatà, Mawke heno.
Xose heno muru me nehxakon hatà, Xanay heno.
25 Matateyas heno muru me nehxakon hatà, Xose heno.
Amos heno muru me nehxakon hatà, Matateyas heno.
Naun heno muru me nehxakon hatà, Amos heno.
Esrye heno muru me nehxakon hatà, Naun heno.
Nakay heno muru me nehxakon hatà, Esrye heno.
26 Maate heno muru me nehxakon hatà, Nakay heno.
Matateyas heno muru me nehxakon hatà, Maate heno.
Semey heno muru me nehxakon hatà, Matateyas heno.
Xose heno muru me nehxakon hatà, Semey heno.
Xokna heno muru me nehxakon hatà, Xose heno.
27 Xoanan heno muru me nehxakon hatà, Xokna heno.
Hesa heno muru me nehxakon hatà, Xoanan heno.
Sorokmakmew heno muru me nehxakon hatà, Hesa heno.
Sarateyew heno muru me nehxakon hatà, Sorokmakmew heno.
Nerye heno muru me nehxakon hatà, Sarateyew heno.
28 Mewke heno muru me nehxakon hatà, Nerye heno.
Akne heno muru me nehxakon hatà, Mewke heno.
Kosan heno muru me nehxakon hatà, Akne heno.
Ewmaknaw heno muru me nehxakon hatà, Kosan heno.
Er heno muru me nehxakon hatà, Ewmaknaw heno.
29 Xoswe heno muru me nehxakon hatà, Er heno.
Eryeyeser heno muru me nehxakon hatà, Xoswe heno.
Xoryen heno muru me nehxakon hatà, Eryeyeser heno.
Matate heno muru me nehxakon hatà, Xoryen heno.
Ryefe heno muru me nehxakon hatà, Matate heno.
30 Semyaw heno muru me nehxakon hatà, Ryefe heno.
Xukna heno muru me nehxakon hatà, Semyaw heno.
Xose heno muru me nehxakon hatà, Xukna heno.
Xonan heno muru me nehxakon hatà, Xose heno.
Eryeyaken heno muru me nehxakon hatà, Xonan heno.
31 Meryeya heno muru me nehxakon hatà, Eryeyaken heno.
Mena heno muru me nehxakon hatà, Meryeya heno.
Matata heno muru me nehxakon hatà, Mena heno.
Natan heno muru me nehxakon hatà, Matata heno.
Dafe heno muru me nehxakon hatà, Natan heno.
32 Xese heno muru me nehxakon hatà, Dafe heno.
Okmekne heno muru me nehxakon hatà, Xese heno.
Boas heno muru me nehxakon hatà, Okmekne heno.
Sara heno muru me nehxakon hatà, Boas heno.
Nasaw heno muru me nehxakon hatà, Sara heno.
33 Amenaknakme heno muru me nehxakon hatà, Nasaw heno.
Aknemen heno muru me nehxakon hatà, Amenaknakme heno.
Ahne heno muru me nehxakon hatà, Aknemen heno.
Esraw heno muru me nehxakon hatà, Ahne heno.
Peryes heno muru me nehxakon hatà, Esraw heno.
Xukna heno muru me nehxakon hatà, Peryes heno.
34 Xako heno muru me nehxakon hatà, Xukna heno.
Esake heno muru me nehxakon hatà, Xako heno.
Akmaraw heno muru me nehxakon hatà, Esake heno.
Tera heno muru me nehxakon hatà, Akmaraw heno.
Nakoh heno muru me nehxakon hatà, Tera heno.
35 Seruke heno muru me nehxakon hatà, Nakoh heno.
Rakawu heno muru me nehxakon hatà, Seruke heno.
Faryeke heno muru me nehxakon hatà, Rakawu heno.
Ekmeh heno muru me nehxakon hatà, Faryeke heno.
Sara heno muru me nehxakon hatà, Ekmeh heno.
36 Kaynan heno muru me nehxakon hatà, Sara heno.
Ahfaxakne heno muru me nehxakon hatà, Kaynan heno.
Sem heno muru me nehxakon hatà, Ahfaxakne heno.
Nowe heno muru me nehxakon hatà, Sem heno.
Rameke heno muru me nehxakon hatà, Nowe heno.
37 Metusaryen heno muru me nehxakon hatà, Rameke heno.
Enoke heno muru me nehxakon hatà, Metusaryen heno.
Xaryete heno muru me nehxakon hatà, Enoke heno.
Maryeryew heno muru me nehxakon hatà, Xaryete heno.
Kaynan heno muru me nehxakon hatà, Maryeryew heno.
38 Enos heno muru me nehxakon hatà, Kaynan heno.
Setxe heno muru me nehxakon hatà, Enos heno.
Aknaw heno muru me nehxakon hatà, Setxe heno.
Aknawu ryhe, Khoryenkom muru me nehxakon hatà, noro nakàhtotho kaxe.