15
Okno àwaymamsahotho yokarymatxhàrà on ha.
1 Taa. Txesusu hyaka nohsamnohyatxkon hatà, txenyeru yahosnye ro komo, atxke natxhe moxamo katxho komo xarha. Noro yonytxaxe nohsamnohyatxkon hatà.
2 Àro ke, noro hoko nàrwonatxkon hatà, Farysew komo, àyweronàhyamano ynye ro komo xarha. Atxke natxhe moxamo katxho komo yanyekyan hamà, mokà ymo, tàhyaka, ketxkon hatà. Nemtakmen xarha hamà, akoronye, ketxkon hatà, Txesus hoko.
3 Àro ke, kuknonano me onà wyaro nkekon hatà, Txesusu, àwyanye.
4 Àsok hana owoknàthàyamo mehoryatxow ha, kekon hatà, àwyanye. Àwaymamsahotho rma mehoryatxow hamà. Ehorhàra kat manatxowà. Mehoryatxow hamà, kekon hatà. 100 me owoknà komo yehtoko, 99 komo mànomyatxow hamà. Ahehnawo rma mànomyatxow hamà, towenyxanotho txko yohonàr horà, àwaymamsahotho txko yohonàr horà. Owyanye xenyhera ro rma haka, mehoryatxowà roro rma hamà, kekon hatà.
5 Owyanye xenyetxhe rma, teryehorye rma haxa manatxow hamà. Omotakanye manàmyatxow hamà.
6 Omàn kom yaka harha maryatxow hamà, kekon hatà. Okukur komo manyekyatxow hamà, ohoyen komo rma. Omohtxoko, teryehotatxe, màketxow hamà, àwyanye. Roknàtho txko wenyo ha, àro ke teryehotatxe, màketxow hamà, àwyanye, kekon hatà, Txesusu.
7 Onà wyaro àkehe, owyanye. Àro wyaro rma rha neryehotetxhe ha, kahe yawon komo, toto hoko, towenyxan hoko rma. Anar me harha tanhànàthàrà yonyenhàr hoko, neryehotetxhe ha, kahe yawon komo, kekon hatà. Eryehotahra mak natxhe ha, anar kom hoko, thenyenohnà kom hoko rma. Ranhàn ehxera naha kany kom hoko rma eryehotahra natxhe ha, kekon hatà. Anar me harha tanhànàthàyamo yonyehnà kom hoko rma, eryehotahra natxhe ha, kahe yawon komo, kekon hatà, Txesusu, toto komo wya.
Wos txenyerunutho atarymaxahotho yokarymatxhàrà on ha.
8 Kuknonano me xarha nàrwonàmye hatà, Txesusu. Àsok hana tàtxenyerunuthuru txko yohoryan ha, wos ha, kekon hatà. Atarymaxahotho rma yohoryan hamà. Ehorhàra kat naye, owyanye. Nehoryan hamà. 10 me nay hana, àtxenyerunu. Towenyxanotho txko natarymen hana. Àrotho rma yohoryan hamà. Weyu hotuhten hamà, xenyàr horà. Bàn yosnyen xarha hamà, kekon hatà. Tàwya xenyhera ro rma haka nehoryan roro rma haxa hamà.
9 Tàwya xenyetxhe rma, neryehoten hamà. Tkukur komo yanyekyan hamà, thoyen komo rma. Omohtxoko, teryehotatxe, ken hamà, àwyanye. Rotxenyerunutho txko wenyo ha, àro ke teryehotatxe, ken hamà, àwyanye, kekon hatà, Txesusu.
10 Onà wyaro àkehe, owyanye. Àro wyaro rma rha neryehotetxhe ha, kahe yawon komo, Khoryenkom yanoto komo rma, kekon hatà. Neryehotetxhe ha, toto hoko, towenyxan hoko rma. Anar me harha tanhànàthàrà yonyenhàr hoko, neryehotetxhe ha, kahe yawon komo, kekon hatà, Txesusu, toto komo wya.
Tàyàmà hyaka harha umuru totho yokarymatxhàrà on ha.
11 Kuknonano me xarha nàrwonàmye hatà, Txesusu. Onà wyaro nehxakon hatà, toto, kekon hatà. Thohke nehxakon hatà. Asak nehxatxkon hatà, umur komo, kekon hatà.
12 Onà wyaro nkekon hatà, umuru, àmahtàkàthàrà, tàyàmà wya. Apa y, amna hoko rma thoykaxem me nay hamà, akatxhothàrà, kekon hatà. Amnye rma rokatxho yahosnàr xe wehxaha. Tàmko, rowya, kekon hatà, àmahtàkàthàrà, tàyàmà wya, kekon hatà, Txesusu. Àro ke hoykay hatà, àyàm komo. Àhoye nàmye hatà, wahoto wya. Àhoye rma rha nàmye hatà, àmahtàkàthàrà wya xarha, kekon hatà, Txesusu.
13 Àho rma rha tkatxhothàrà yàmtàhkay hatà, àmahtàkàthàrà. Txenyeru hona nàmtàhkay hatà. Tàwya txenyeru yahosàtxhe rma, toy hatà, bàn yaye, kekon hatà, Txesusu. Monyen komo yowto hona toy hatà. Àto neryehotekonà rma haxa mak hatà, tàwya tàtxenyerunuthuru yàmrà ke hatà. Netxenyerunkekonà rma haxa mak hatà, teryehotatho hoko rma haxa tesnàr ke hatà, kekon hatà, Txesusu.
14 Taa. Netxenyerunkatxehkay haxa hatà. Àtoko rma ànyahpàra rma haxa nehxatxkon hakahpa tà, àton komo. Àro ke, tehetàhke rma haxa nehxakon hatà, nyahà. Tànyahrà yehekathàra ro mak nehxakon hatà, noro ha, àtxenyerumra ro mak tesnàr ke hatà, kekon hatà, Txesusu.
15 Àro ke toy hatà, horykomo hyaka tatamohtxoho me. Àton komo kukuru rma hatà noro ha, horykomo. Noro rma nanotomay hatà. Toknà komo nyahmanàr hoko ehxe nànyakye hatà, honyko wyaron komo rma nyahmanàr hoko ehxe hatà, kekon hatà, Txesusu.
16 Okno nyahàtho yonahrà xe rma nehxakon haryhe tà, tahyehrà ke rma haxa mak hatà. Ànyahrà yàmpàra ro mak nehxatxkon hatà, àton komo, àwya, kekon hatà, Txesusu.
17 Amnye nehutway harha tà. Onà wyaro nkekon hatà, tàwya rma. Apapa yanoto komo ryhe, tànyahke rma haxa natxow hamà, kekon hatà, noro ha, tàwya rma, kekon hatà, Txesusu. Enahrà yoho rma haxa tànyahke natxow hamà, nyamoro ha, kekon hatà. Urotho haxa ryhe, àwayehpaya wehxaha, rahyehrà, kekon hatà, tàwya rma, kekon hatà, Txesusu.
18 Àten hamà, apapa hyaka, kekon hatà. Apa y, ranhàn hoko rma haxa wehxaknano, àken hamà, àwya, kekon hatà. Khoryenkomo wanwekyaknano, omoro xarha kanwekyaknano, àken hamà, apapa wya, kekon hatà, tàwya rma, kekon hatà, Txesusu.
19 Apa y, romuru omoro katxho mehra harha tehxorye wehxaha, urotho, owya, atxke rma haxa ryesnàr ke, àken hamà, àwya, kekon hatà. Apa y, ayanoto me harha uro txeryko, àken hamà. Apa y, ohyaka tatamohxemà ro komo wyaro rma uro txeryko, àken hamà, apapa wya, kekon hatà, tàwya rma. Àro wyaro nehutway harha tà, kekon hatà, Txesusu.
20 Àro ke toy harha tà, noro ha, tàyàm màn yaka harha. Moxe ro rma nenyey hatà, àyàmà. Buru hnàn yawo rma haxa nehxakon hatà. Àro ke àhyaka kàtay hatà. Wakeryemekye hatà. Namtxuhkay xarha tà, kekon hatà, Txesusu.
21 Apa y, ranhàn hoko rma haxa wehxaknano, kekon hatà, umuru, tàyàmà wya. Khoryenkomo wanwekyaknano, omoro xarha kanwekyaknano, kekon hatà. Romuru omoro katxho mehra harha tehxorye wehxaha, urotho, owya, atxke rma haxa ryesnàr ke, kekon hatà, umuru, tàyàmà wya, kekon hatà, Txesusu.
22 Onà wyaro haxa nkekon hatà, àyàmà, tanoto komo wya. Moson hononà enyhoru rma suhtatxko ha, kekon hatà, àwyanye. Romuru màhonomtetxhe ha, kekon hatà. Amor hoko manewumtetxhe xarha, màhrowomumtetxhe xarha, kekon hatà, àyàmà, tanoto komo wya, kekon hatà, Txesusu.
23 Faka mxekàtho xarha mekyatxhe ha, kekon xarha tà, àwyanye. Ehsuryexahotho txko rma mekyatxhe ha, metahetxhe xarha, kasahxemtotho menye, keryehotatho menye, kekon hatà, tanoto komo wya, kekon hatà, Txesusu.
24 Àsok tawro hana. Àwayehsaho wyaro tan ehxera nehxaknan hamà, romuru, kekon hatà. Àwayehxemo kom waye asanàmsaho wyaro tan harha naha, kekon hatà. Àwaymamsaho wyaro rma ehxera nehxaknano, ehosaho wyaro rma kàhyawony harha naha, kekon hatà, àyàmà, tanoto komo wya. Àro ke nasahxemtotxownà hatà, kekon hatà, Txesusu.
25 Taa. Asahxemtontokonye rma, nomokye hatà, wahoto, umuru xarha. Tàyàm mararàn hoko ehxahotho rma nomokye hatà, bàn kom yaka harha, kekon hatà. Bàn komo hahnoke tehtoko, furwe txemeknyàrà yonytxay hatà. Àmanhonàr komo xarha yonytxay hatà, kekon hatà, Txesusu.
26 Àro ke tanoto komo kukuru yanyekye hatà. Àsok tawro furwe txemekyatxowà, kekon hatà, àwya. Àsok tawro manhetxowà, kekon hatà, tanoto wya, kekon hatà, Txesusu.
27 Oyowtà nomokno harha, kekon hatà, anoto, àwya. Faka mxekàtho yotahahono, oyàmà, kekon hatà. Ehsuryexahotho txko rma yotahahono, tàhyaka harha oyowtà yomoknàr ke, àwayehpàra esnàr ke, ohxe esnàr ke, kekon hatà, anoto, wahoto wya, kekon hatà, Txesusu.
28 Ewakhàra mak nehxakon hatà, wahoto, towtà hoko tatakuynyàr ke. Àro ke, bàn kom yaka owompàra ro mak nehxakon hatà, kekon hatà. Àro ke nahatakay hatà, àyàmà. Àhyaka nomokye hatà. Owomkot ha, kekon hatà, àwya, teryewrye ro hatà, kekon hatà, Txesusu.
29 Onà wyaro haxa tàyàmà yoyukye hatà, noro ha, kekon hatà. Mexe rma haxa tatamohxemà ro me wehxaha, uro, ohyaka, kekon hatà, noro. Owya ranotomantoko, ayanweknyehnà ro me wehxaha, kekon hatà. Rahxemtohra mak manaha, kekon hatà. Owoknà kom hoye tàmpàra ro mak manaha ha, rowya, kekon hatà. Oyeryehotatxoko, okukur kom yakoro, kahra ro mak manaha ha, rowya, kekon hatà, wahoto, tàyàmà wya, kekon hatà, Txesusu.
30 Nuxe haxa ryhe mahxemton hamà, kekon xarha tà. Noro ryhe, atxke nehxak hatà, onàmàthàràtho yàmtàhkek hatà, woràskomo komo wya, twayamon komo wya, kekon hatà. Omokàtxhe rma, mahxemtono yxak mak hamà, kekon hatà. Ehsuryexahotho txko metahahon hatà, owya noro ymo yahxemtotho me hatà, kekon hatà, wahoto, tàyàmà wya, kekon hatà, Txesusu.
31 Kàrà y, kekon mak hatà, àyàmà, àwya. Omoro ryhe, rohyawo roro manaha, kekon hatà. Rokatxhotho ryhe, akatxho me harha mpànà naha ha, omeroro, kekon hatà, àyàmà, buru wya, wahoto wya, kekon hatà, Txesusu.
32 Tasahxemtohorye mak tehxatxhe, kekon xarha tà, àwya. Àsok tawro hana, àwayehsaho wyaro tan ehxera nehxaknan hamà, oyowtà, kekon hatà. Àwayehxemo kom waye asanàmsaho wyaro tan harha naha, kekon hatà. Àwaymamsaho wyaro rma ehxera nehxaknano, ehosaho wyaro rma kàhyaw harha naha, kekon hatà. Àro ke tasahxemtohorye tehxatxow hamà. Teryehotahorye rma tehxatxow hamà, kekon hatà, àyàmà, buru wya, wahoto wya, kekon hatà, Txesusu. Àro wyaro Farysew komo kuknon me ryhe wahoto yehtxoho yokarymay hatà.