3
Tehutwatxhàrànhàrà hutwamohsoye Khoryenkomo rowya katxhàrà on ha.
1 Àro wyaro Khoryenkom màn me manatxhe. Àro ke, noro yakoro tàrwonyemà ro me wehxaha, uro, Pawru rma, ohokonye. Tahuso rma wehxaha, onà ymo yawo, Kryestu Txesus yano me mak ha. Àsok tawro hana. Rowya ahananàhàthàyam hoye ro tahuso wehxan hamà, rowya Xuknewyanahnà komo hananàhàthàr hoye ro rma.
2 Khoryenkomo wya ranotomatxho muhutwetxow hamà. Towahke xaxa tehtxoho hoye ro ranotomaye, ohyakanye rotonàr horà, Xuknewyanahnà komo hyaka rma rotonàr horà.
3 Tàwya ranotomantoko rma, tehutwatxhàrànhàrà hutwamohsoye, rowya. Uhutwahnà rotho rma hutwamohsoye. Rowya tosonyhontoko rma, hutwamohsoye, Kohkomo. Àro rma wekarymano, owyanye, on yawo, ronmenhotho yawo.
4 Owyanye onà rwonàhyamantoko rma, onà wyaro màketxow hamà. Khoryenkomo yehutwatxhàrànhàrà ryhe hutwen hamà, Pawru, màketxhe. Kryestu yoh me kehtxoho komo rma hutwen hamà, màketxhe.
5 Amnyehra uhutwamohsotàhkahra rma hak nehxakonà, Khoryenkomo, toto heno komo wya. Nyamoro heno rma, hutwetxkonà rma haryhe, atxke txko mak ha. Amnye rma haxa ryhe, hutwamohsotàhkaye, tanoto komo wya, tànwahanonkatxhàyamo wya, tànànyaketxhàyamo wya, tàrwonà yokarymanye ro komo wya. Àwyanye rma, tehutwatxhàrànhàrà hutwamohsohoye, Khoryenkomo, tokato wya.
6 Àsok katxho me hana nay ha, Khoryenkomo yehutwatxhàrànhàrà, uhutwahnà rotho rma. Onà wyaro katxho me nay hamà. Noro rye me harha natxhe, Xuknewyanahnà komo, Xuknewyana kom yakoro, katxho me rma naha. Khoryenkomo wya, kowakryetxhe xaxa mak hampànà katxho me rma rha natxhe, Xuknewyanahnà komo xarha, Kryestu Txesus yoh me tesnàr kom ke, tàwyanye àrwo yonyhorunu yonytxanàr ke, katxho me xarha naha, uhutwahnà rotho. Kahe yawo Khoryenkomo newakryenàr me rma rha natxhe, Xuknewyanahnà komo xarha, katxho me xarha naha, uhutwahnà rotho, Khoryenkomo yehutwatxhàrànhàrà rma.
7 Àro rma àrwo yonyhorunu rma yokarymany me ranotomaye, Khoryenkomo, rohoko towahke xaxa tesnàr ke mak ha. Tahoxet hoye ro rakoronomehe, tanoto me ryehtxoho me.
8 Norohnàtho me rma haxa wehxaha, urotho. Khoryenkomo mryenon komo yosnaka rma haxa wehxaha, norohnàtho komo yosnaka rma haxa mak ha. Norotho rma yeryeye, tanoto me, Xuknewyanahnà komo hyaka rototho me, àwyanye Kryestu yokarymatxho me. Onà wyaro k any me wehxaha, àwyanye. Towahke rma haxa naha, Kryestu, ohokonye, kany me wehxaha. Noro wya oyowakryetxho komo rma, thenyehra rma haxa naha, owyanye uhutwanàr yoho rma haxa mak ha, kany me wehxaha, Xuknewyanahnà komo wya.
9 Khoryenkomo yehutwatxhàrànhàr xarha wekarymehe, àwyanye, omeroron komo wya, uhutwany me harha ehtxoho menye. Amnyehra uhutwamohsohra rma hak nehxakonà, noro, toto heno komo wya. Noro ryhe, omeroron komo yakàhtonyenhàrà rma, nehutwekonà rma, amnyehra.
10 Tehutwatxhàrànhàr hoye ro, anaro rha yana komo yeryaha, tàmryenon me harha, tàyweron me tosonyhonàr horà. Tàywero rma haxa tehtxoho hoye ro, tàmryenon komo yowakryehe, anar me rha mak ha, thenyehra mak ha. Àro wyaro tàyweron me nosonyhehe, kahe yawon komo wya. Tàwyanye xenyetoko rma, onà wyaro nketxow hamà, nyamoro, kahe yawon kayaryet komo rma, kahe hokon yoh komo xarha. Tàywero rma haxa nay hamà, Khoryenkomo, ketxhe. Tàywero tehtxoho hoye ro, anaro rha yana komo yeryan hamà, tàmryenon me harha. Nyamoro rma yowakryen hamà, thenyehra mak ha, ketxhe, naymoro ha.
11 Yukryeka komo ehxera rma hak ehtoko, tàmryenon komo hutwekonà roro rma, Khoryenkomo. Nyamoro hutwanye rma, Kryestu Txesusu wayehrà hutwekonà. Kohkomo rma wayehrà hutwekonà.
12 Noro hona tenyatxhe. Noro hona xenye rma, towankaryhe tomokyatxhe, Khoryenkomo hyaka. Noro yakoro àrwonàmso tomokyatxhe, ewankaramra rma, Kryestu Txesus yoh me kesnàr kom ke.
13 Àro ke, onà wyaro àkehe, owyanye. Towankaryhe rma ehtxoko. Teryewhamnohsom me wehxan hamà, rowya ahananàhrà kom ke, rowya Xuknewyanahnà komo rma hananàhrà ke. Teryewhamnohsom me ryehtxoho hoye ro, anatoko oyowankaranatxow hana. Ewankaramra ro mak ehtxoko. Àsok tawro hana. Ryeryewhamnohtoho hoye ro ryhe, ohxe roro rma haxa oyeryatxhe, Khoryenkomo.
Thenyehra rma haxa kxeny nay hamà Kryestu katxhàrà on ha.
14 Àro wyaro kowakryetxho komo hutwekonà, Khoryenkomo, amnyehra. Àro ke, rosoknar ho keryewtehe, noro yakoro rorwonàmrà horà.
15 Noro ryhe, kyàmkom me naha. Kyàmkom me noro yehtxoho hoye ro, royàm mosonà katxho me rma rha natxhe, toto komo xarha, yukryeka hon komo rma, kahe yawon komo xarha. Noro yakoro rma kàrwonaha, ohokonye.
16 Onà wyaro àkehe, àwya. Apa y, ehonomnà me rma haxa manaha, omoro. Àro hoye ro, tahoxerye rma haxa nyamoro txeryko, àhnawonye, àkehe, àwya, ohokonye. Apa y, oyokato hak nakoronomatxowà, àhnawonye, tahoxerye rma haxa ehtxoho menye, àkehe, àwya.
17 Apa y, Kryestu hona nenyatxow hatà. Àro ke, àhnawo rorony hak nahko, noro, àkehe, àwya, ohokonye. Apa y, osoxe rma haxa hak nahtxoko, ohxe roro tehtxoho menye, orwon yawo ro rma haxa tehtxoho menye, àkehe, àwya.
18-19 Apa y, tàxenye Kryestu yehtxoho hutwatxehkanye ro me hak nahtxoko. Anar komo wyaro, omryenon komo wyaro rma, tàxenye Kryestu yehtxoho hutwatxehkany me rma rha hak nahtxoko, nyamoro xarha, àkehe, àwya, ohokonye.
Àsok hana kxeny nay ha, Kryestu ha. Thenyehra rma haxa kxeny nay hamà. Àsok tawro hana. Kxenye ehtxoho kuknomahra tehxatxow hamà. Uhutwahra tehxatxow hamà. Ukuknomatxehkahnà rma kuknomanàr xe wehxaha, owyanye. Uhutwatxehkahnà rma hutwanàr xe wehxaha, owyanye.
Àro ke, onà wyaro àkehe, kyàmkomo wya. Apa y, tàxenye Kryestu yehtxoho hutwatxehkany me hak nahtxoko, àkehe, àwya, ohokonye. Apa y, amna yowakryenye ro me rma haxa manaha, omoro, thenyehra mak ha, tkatxehkaxe ro mak ha. Àro hoye ro, onewakryenàr me rma haxa hak nahtxoko, nyamoro, àkehe, àwya, ohokonye.
20 Àsok hana kowakryetxow ha, Khoryenkom ha. Kàhnawonye tahoxet yehxoho hoye ro kowakryetxow hamà, thenyehra rma haxa, kàrwonàmtoho kom yoho rma haxa, kehutwatxho kom yoho rma haxa.
21 Àro ke, onà wyaro katxho roro me hak nahko, noro ha. Ehonomnà me xaxa naha, katxho roro me hak nahko, meya roro, amnyeno rma komo wya, amnyen komo wya xarha, omeroron komo wya. Ehonomnà me Kryestu Txesus yehtxoho hoye ro, ehonomnà me xaxa naha katxho roro me nay hamà, Khoryenkomo. Enyhoru ro me àmryenon kom yehtxoho hoye ro xarha, ehonomnà me xaxa naha katxho roro me naha.