21
Yuhanis net apan nu nol dale-dapa ki hnika balu
1 Hidi nam auk ngat net apan nu nol dale-dapa ki hnika balu, undeng apan blaan na nol dale-dapa blaan na ilang son. Tasi ka kon ase son.
2 Hidim auk ngat net Ama Lamtua kota niu ka, na Yerusalem Balu, man niu maa deng sorga. Kota na lohas hidi son, tuladang el sapa-bihatan man laok sodo-sium un sapa-bikloben na ka.
3 Hidim auk ming fala mes muun puit maa deng del prenta la, le tek noan,
“Ngat babanan!
Ninin deng leol nia, Ama Lamtua Allah Uma la muik ne atuli li hlala.
Deng leol neot nia, Ama Lamtua Allah nuli leo-leo nol Un atulin nas son.
Ta Un daid oen Lamtuan, Allah.
Nol oen kon daid Un anan son.
Mam Un leo-leo nol oen tutungus.
Nol Un kon nang soleng oen lo didiin son na.
4 Mam Un kose soleng oen matan uin nas,
le oen lilu mumuun pait lo ka.
Undeng se na lam, muik in ili pait lo.
Nol se na kon, muik in mate pait lo.
Totoang man in bosor deng lolo hmunan nua ngas, ase son.
Totoang man in tao susa-daat lolo hmunan nua ngas kon, ilang son.”
5 Hidim Ama Lamtua Allah, man daad se del in kil prenta ka, aa noan, “Tinang babanan, ta Auk tao totoang nias daid balu son.” Hidim Un aa nol auk pait noan, “Dulan tia! Totoang atuli li parsai nal Auk in Teka-teka nia, ta totoang nias meman toma!”
6 Hidim Un tek auk pait noan,
“Totoang man Auk hida lolo hmunan nua ngas, daid son.
Ta Auk niam,
Alfa lako pes Omega,
Nol Auk niam,
A lako pes Z,
Totoang daid deng Au,
ninin deng hmunan na lako pes puis.
Totoang atuil man meen tuu ka,
mam Auk beles le niun mosa-mosa,
deng ui mata man tao atuli li le nuil tom tutungus sa.
7 Totoang atuil in tahang le muid Ama Lamtua lalan lolo ka ngas,
mam sium nal hangun nias totoang.
Ta mam Auk daid oen Lamtuan Allah,
nol oen daid Auk anang.
8 Mo mam kon muik atuli teng tom in pasang soleng,
lako tasi ai blirang man kaloe tutungus sa.
Tuladang el atuil in lii daat,
atuil man bali kudi Yesus,
atuil in nuil hmomos,
atuil in nong dadahut daat,
atuil in keo atuil tutungus,
atuil in hui-langus tutungus,
atuil in nodo-kit daat,
nol atuil in nole-lilung daat tas.
Mam oen totoang tom in pasang tamang lakos tasi ai dalen,
man atuli noken noan, ‘man in mate oe dua la.’ ”
Yuhanis net kota Yerusalem hnika balu
9 Kon auk ngat net at mes deng ima-ii at iut man in deng sorga, man hmunan nu kil bokor in nisi Ama Lamtua in komali ngas. Un maa tutnaal au, hidim un tek noan, “Maa se ni le! Ta auk le tulu bel ku sapa-bihatan man le saap nol Lae-blai Ana ka ka.”
10 Kon nam auk tom Ama Lamtua Koo Niu ka, ta ima-ii mes deng sorga nikit nol auk lakong se leten lapa tene mes dapa. Se na, un tulu bel auk kota Yerusalem, na Ama Lamtua Allah kota niu ka, man niu maa deng Ama Lamtua in se sorga kua.
11 Kota na leok isi! Muik langa man bisain puti deng Ama Lamtua Allah in muun-tes sa, banansila el baut intan in kaloe ka. Didiin kota na langa papmesa.
12 Muik tembok tene lapa pukiu kota na, nol un hnita tene hngul dua. Muik ima-ii hngul dua deng sorga kon doh hnita nas. Ngala-ngaal Israel las hngul duas dulas ne hnita hngul dua nas.
13 Hnita tene tiul saol laok bus el leol-saken, tiul saol bus el leol-denen, tiul saol el blai-ahen, nol tilu las pait saol laok bus el loet-ahen.
14 Tembok na dil se baut netes tene hngul dua dapas. Se baut netes sas mesa-mesa, dul Lae-blai Ana ka atulin in nutus hngul dua kas ngalan.
15 Ima-ii in aa nol au ka, kil hnikan in sukat mesa deng lil-mea, le sukat kota la hnita tene kas, nol un tembok ka.
16 Un sukat muna kota la tembok ka. Un blatas sa, blehan na, nol lapa ka, totoang tatai tuun, kilu 2.220.
17 Hidim un sukat tembok ka babakun na lam, meter 65, muid atuli li in sukat.
18 Tembok na oen daken nini baut kaloeꞌ man ngala yaspis. Nol totoang man in se kota na dalen nas, oen dakes nini lil-mea isin, man kaloe banansila el kaca ka.
19 Baut netes hngul dua nas, lohas nini baut permata bili-ngala man osa isi ngas. Hmunan na, pake baut yaspis man kaloeꞌ kunis kai klehen. Nomer dua la, pake baut nilam man kaloeꞌ kunis el apan nua. Nomer tilu la pake baut mirah man mea kaloeꞌ. Nomer aat ta pake baut samrud man kaloeꞌ kunis kai klehen.
20 Nomer lima la pake baut unam man muti, lapis nol mea-mamaten. Nomer eneng nga pake baut sardius man mea kaloeꞌ. Nomer itu la, pake baut ratna cempaka man kaloe kunis el lil-mea ka. Nomer palu la, pake baut beril man kaloe kunis el apan nua, kutang nol kunis kai klehen. Nomer sipa la pake baut krisolit man kaloe kunis naen bunga. Nomer hngulu la, pake baut krisopras man kaloe kunis kai klehen muda. Nomer hngul esa ka, pake baut lasuardi man kaloe kunis el tasi ka. Nol nomer hngul dua ka pake baut kecubung man kaloeꞌ mea-mamaten.
21 Nol hnita tene hngul dua nas, dakes nini mutiara buu hngul dua. Hnita mesa lam daken nini mutiara buu mesa. Nol kota na lalan tuan na, oen daken deng lil-mea isin, man kaloe el kaca ka.
22 Mo auk ngat tam, muik Um in Kohe-kanas se kota na lo. Undeng Ama Lamtua Allah in kuasa dudui ka, nol Lae-blai Ana ka, se as tutungus. Tiata atuli li laok todan-lahing se Oen esan.
23 Kota na kon nuting lelo nol bulan le laang un lo, undeng Ama Lamtua Allah kaloen na man bel langa se na. Nol Lae-blai Ana ka daid el hadut in kaloe ka.
24 Mam atuil deng totoang bangsa in se apan-kloma ki ngias, maas le lako-pait se langa na dalen. Lahi-laih in se dale-dapa ki ngias kon, kil nol oen hmukin nas lakos se na.
25 Se na lam, muik duman pait lo, undeng na le oen parlu in hep kota la hnitan nas lo.
26 Mam oen kon kil tamang laok se kota na, totoang in banan nol totoang in todan, deng totoang negara in se dale-dapa ki ngias.
27 Mo in boel taam laok se na lo ka, totoang in daat tas, el atuil in hui-langus tutungus sas, atuil in nong daat tas, nol atuil in nole-lilung daat tas. Ta in boel taam laok se na ka, suma atuli-atuil man oen ngalan nas dulas son, ne Lae-blai Ana ka buku la ngas. Buk na dul ngala-ngaal deng atuil man haup in nuil napiut nol Ama Lamtua Allah ngas.