18
Ama Lamtua Allah ima-ii las dehet deng kota Babel in lea ka
1 Hidi nam, auk ngat net ima-ii mes didang pait niu maa deng sorga. Un muik kuasa nol langa muun, didiin laang papmes dale-dapa nia.
2 Un nini fala mumuun le tek noan,
“Lea son! Lea son! Kota Babel lea son!
Nahi son! Nahi son! Kota in leok isi ka, nahi son!
Un daid uikjale kas maan in dada son.
Un kon daid koo-dael daat tas ingu-mana son.
Un daid kee in kaa sisi ngas maan in nakbua son.
Un daid totoang hmukit in banan lo ngas mana son.
3 Un lea son, undeng totoang bangsa in se dale-dapa ki ngias,
taan in maa le niun mahus tutungus deng un anggor ra.
Un nahi son, undeng totoang ngala-ngaal in ne apan-kloma ki ngias,
taan in maa le nong nol kota na atuli nas.
Lahi-laih deng totoang negara lias maas,
le laok kula nol un atulin nas.
Atuil in sepo-dakang deng totoang kota las kon maas,
le sosa-hee didiin oen daid in muki.
Undeng kota na banansila el bihaat man kom le sos totoang sa-saa in banan, nol osa dui ngas.
Tiata kota na el bihaat hmama man kom le nuting totoang sa-saa in leko, banan, nol osa ngas.”
4 Hidim auk ming fala mes didang pait, man haman deng apan nu noan,
“Hoe! Auk atulin nas totoang!
Lail putim deng uam tia!
Nang soleng kota na tia!
Boel tao muid un atulin nas in daek daat ta deken,
le halin mi tom oen hukung nga deken.
5 Undeng oen in daek dadaat ta,
mamo isi son.
Nol oen in kula-sala ngas lapis-lapis apa,
lako lius ne apan nu son.
Oen lalan in nuil dadaat ela ka,
halas ni Ama Lamtua Allah nadidingun pait lo son.
Halas ni Ama Lamtua Allah mana hidi son,
le hukung kota la isin na.
6 Tiata musti balas oen in daat ta,
el asa man oen in daek dadaat saol atuil didang son na.
Mo mi in balas one ka,
musti didiin lalis dua.
Hmunan nu oen nole atuli,
le niun deng oen cangkir lil-mea, man inu nol anggor in susa-daat ta.
Mo halas ni oen esan,
man musti niun anggor in susa-daat na, lalis dua.
7 Oen tao apan nas muun isi.
Nol nikit oen apan nas lapa-lapa.
Oen suma kom in nuil liis-lasa tukun.
Oen suma kom in bana-banan nas tuun.
Undeng na le, oen in haup susa ka musti ngele.
Tiata, oen musti nuil susa-daat.
Ta hmunan nua, oen aa in koaok el bihaat hmama ka, noan,
‘Auk niam, bi-lahi!
Taon elola kon auk daid bebalu lo!
Taon elola kon, mam auk lilu hultotoen lo.
Mam auk pake net kai-baut mitang lo kon.’
8 Oen aa ela, didiin Ama Lamtua Allah komali nol oen son.
Didiin buitana kam, Ama Lamtua Allah hukung one.
Mam se lelo mes sii dalen,
oen luub mates,
oen lilu hultotoen,
didiin oen mates hidi.
Le atuli las kat soleng oen lakos ai dalen.
Didiin ai kaa nuli oen nitun nas.
Ta Ama Lamtua in kuasa dudui ka, man niung hukung nia.
Nol Ama Lamtua in muun-tes dudui ka, man nutus dais nia.
9 Lahi-laih hmunan nuas maas,
le len-langan nol kota na atuli nas,
nol nuil liis-lasa se na.
Mam lahi-lahi las net ai nus in saek deng kota na ka,
lam oen taan son noan, ai kaa nuli kota na son.
Hidim oen lilu hultotoen nol kota na.
10 Kon oen ngat atuil deng kota na ngas in susa-daat tam, oen lii isi.
Mo oen suma brain dil deng kakatang tukun,
le ngat-ngat deng na.
Hidim oen aa noan,
‘Idaah! Kasiang Babel le!
Idaah! Kasiang Kota leko-nataong nge!
Ta suma se jam mes sii dalen, ku haup in hukung son.
Ta suma nanapat tuun, mo ku dudus son.’
11 Ming ela kon, totoang atuil man hmunan nu maas deng ola-ol le sepo-dakang se na ngas kon,
lilu hultotoen.
Ta muik tahan atuli mes lo kon,
man kom le laok sos oen kai-batu las.
12 Muik in kom le laok sos oen sa-saa in lohas,
man dakes deng lil-mea, lil-muti,
baut kaloeꞌ, nol mutiara ngas lo.
Muik in kom le laok sos
oen kitu lenan, kitu sutra,
tamlom kitu duda mea nol mea-mamaten nas pait lo son.
Muik in kom le laok sos
oen sa-saa deng kai buin bingis, gading hdulat,
tamlom kai in tuis hdulat-hdulat tenga las lo son.
Muik tahan in kom le laok sos
oen sa-saa man dakes deng bis-muti, bisi, tamlom baut marmar ras pait lo son.
13 Muik tahan in kom le laok sos
oen kai kumis sas, tamlom kai kluit kumis bili-ngala ngas lo son.
Muik tahan in kom le laok sos
oen kemenyan nas tamlom mina buin bingis bili-ngala ngas lo son.
Muik tahan in kom le laok sos
oen ui anggor ras, mina saitun nas,
tarigu, tamlom gandum mas lo son.
Muik tahan in kom le laok sos
oen aus-sapi las, lae-blai las, tamlom ahlote las pait lo son.
Muik tahan in kom le laok sos
oen kereta in sakeng sa-saa ngas,
tamlom oen ata kas pait lo son.
14 Mam atuil in sepo-dakang ngas maingasar elia,
‘Idaah, Babel le!
Idaah, kota lekong nge!
Ku sa-saa osa man ku atulin nas in kom isi ngas
muik lo son.
Totoang ilang papmesa son, didiin nahis kasiang isi
le muik saa lo tetetas.’
15 Hmunan nu atuil in sepo-dakang ngas daid in muki, undeng bihatang hmama na.
Mo halas ni oen sabail apan hidi nutus lo.
Oen daid in lii muun isi,
nol in ngat kota na in susa-daat ta.
Oen daid in lii bosor,
nol in ngat un hukung nga.
Mo oen suma brain ngat deng kakatang.
Oen suma brain dil le ngat deng na tukun.
16 Hidim oen aa noan,
‘Idaah! Kasiang Babel le!
Idaah! Kasiang kota tene leko!
Hmunan nu, ku atulim mas pake kai-baut duda mea nol mea-mamaten,
deng kitu in osa dudui ngas.
Hmunan nu ku atulim mas lohas apan nas nini lil-mea, mutiara,
nol baut kaloeꞌ in osa dui ngas.
17 Mo se jam mes sii dalen,
ku sa-saa las muik lo son.
Suma nanapat sii kam,
ku in muki ngas ilang hidis!’
Hmunan nu kon kapten kapal las nol oen ima-ii las,
lail lako-pait deng kota na.
Mo halas nia lam, oen suma brain nauh deng kakatang tuun.
Nol oen kon suma brain ngat-ngat deng maan na tuun.
18 Oen lingut nus man puti deng ai la ka,
kon oen taan haup noan, ai kaa nuli son.
Ti oen maingasar le aa noan,
‘Idaah, kasiang! Muik tahan kota didang pait lo,
man tene leok el Babel.
Idaah, kasiang! Muik tahan kota didang pait lo,
man leko na tatai nol una.’
19 Oen dauk ahu, le taon laok se oen bon nas
undeng oen dalen nas susa.
Oen lilu mumuun,
undeng oen dalen nas dudus.
Hidim oen aa noan,
‘Idaah! Kasiang Babel le!
Idaah! Kasiang kota muun isi ke!
Kaim luan laa lako-pait le kil bel ku sa-saa son,
didiin kaim kon daid in muki el ku.
Kaim lep lai-niin ku in sakeng ngas son,
didiin kaim kon daid in nuil liis-lasa.
Mo suma se jam mes dalen tukun,
totoang nas, ilang hidis.
Mo suma nanapat tuun nam,
totoang nas, dudus hidis.’
20 Hidi nam, faal tene na aa taplaeng noan,
‘Hoe, mi in nuil ne sorga!
Mi dalen nas lukit bakun tia.
Hoe, Ama Lamtua atulin nas!
Mi dalen nas boel sus bakun tia.
Hoe, Ama Lamtua atulin in nutus son nas!
Nang le mi dalen nas koloꞌ.
Hoe, Ama Lamtua mee-baha las!
Nang le mi dalen nas koloꞌ.
Hmunan nu, Babel atulin nas tao sus mia.
Hmunan nu, kota na tudan-kida mia.
Mo halas ni, Ama Lamtua balas mi in susa-daat ta son.
Nol Un kon balas kota na atulin nas in daek dadaat ta son.’ ”
21 Hidim, auk net ima-ii mes deng sorga man kuat isi. Un maa nikit batu mesa, man tenen na el atuli mesa. Hidim un pasang tamang baut na lako tasi dalen. Un kon tek elia,
“Mam oen tao dudus kota Babel ela kon.
Mam oen tao ilang kota in leok isi na ela kon.
22 Muik atuil pait lo son,
man kuti sa-saa in kuit-lii se kota na.
Muik atuli in ming,
sasanu, gitar, ole,
nol kliung lin se kota na pait lo son.
Muik atuil in daek taan sa-saa
daek se kota na pait lo son.
Muik atuil in mol ale
se kota na pait lo son.
23 Muik atuli in hoet hadut
se kota na pait lo son.
Muik atuli in tao fesat in sapa
se kota na pait lo son.
Hmunan nu kota na atulin in sosa-hee sa-saa ngas,
daid in muki isi son.
Hmunan nu Babel atulin in sepo-dakang ngas,
nuli ka liis-laas son.
Mo oen pake kai,
le nole-lilung atuil in se dale-dapa ki ngias.
Oen huti-ulat,
le nole-lilung atuil in se apan-kloma ki ngias.
24 Babel haup in hukung ngele son nia,
undeng oen taan in keo tele Ama Lamtua mee-baha las si-sii.
Kota in leok isi na dudus son,
undeng un diku-puang nol tao tele Ama Lamtua atulin nas tutungus.
Ama Lamtua atulin nas teng kon tom in keo tele se mana-maan didang.
Mo Babel man musti lepa-haal kula-sala nas totoang.
Kota in muun isi na man lepa-haal in situ-tala ngas.”