11
Lamtua Yesus nol atuil in muid Una ngas taam lakos Yerusalem, nol atuli mamo naka-naka Una, banansila el atuil tene ka
(Matius 21:1-11; Lukas 19:28-40; Yuhanis 12:12-19)
1 Nikit oen lakos dadani kota Yerusalem, lius se ingu dua ngalan, Betfage nol Betania, ne leten Saitun na, kon Yesus nol Un ima-ii las tenes bubuit. Hidim Un tadu Un ima-ii las at dua le lakos muna.
2 Un hidas noan, “Mi duam laok muna se iung nua. Eta mi taam lakom mam, mi net keledai ana mes butun. Atuli saek netan lo bii. Mi laok loat un tali la, le pel nolan maa se nia.
3 Mo etan muik atuli keket mi noan, ‘Tasao le mi loat keledai na lia?’ Lam mi siut noan, ‘Kaim Lamtuan nu le pake una. Eta Un pake hidi son nam, Un tunang pait meman.’ ”
4 Hidi kon atuil dua nas lakos, kon oen ngat net keledai ana na butun se uma mes hnitan, se lalan suut ta. Ta oen loat le kil nolan lako bel Yesus.
5 Mo atuil in dil se na ngas keket noan, “Hoe! Tasao le mi loat atuli keledai kia?”
6 Kon oen duas siut noan, “Kaim Lamtuan nu le pake. Eta pake hidi son nam, kaim pel nolan pait maa meman.” Kon atuli las nang oen le pel lai-niin keledai ana na lako.
7 Oen pel nolan lako bel Yesus. Hidim oen lekat oen seman nas laok se keledai blepo ka, le Yesus saken.
8 Dedeng oen le taam lakos el kota la ka, muik atuli mamo kat oen seman nas, nol oen hlendang ngas, le lekat se lalan na. Atuil tenga las lakos dait kai klehen muda, le hehan laok se lalan hlala ka. Nini ela lam oen tulu bel noan, oen sodo-sium Lamtua Yesus nol in todan, banansila el taom oen in sodo-sium atuil tene ka.
9 Hidim muik atuli teng pait lakos muna Yesus se hmunan, nol tenga las pait muid deng klupu. Oen nakaa mumuun le tek noan,
“Hosana! Kit naka-nahalit Ama Lamtua Allah!
Hangun banan bating atuil man in maa nini Ama Lamtua ngala ka!
10 Hosana! Kit naka-nahalit Ama Lamtua Allah!
Undeng Ama Lamtua le bangun pait Laih Daud in prenta ka!
Hosana! Kit naka-nahalit Ama Lamtua Allah!
Undeng Ama Lamtua kil bandu meman son, ne apan-dapa man lapa dudui kua!”
11 Lakos lius se kota dalen kon, Yesus nol Un ima-ii las taam lakos se Ama Lamtua Allah Um in Kohe-Kanas Tene ka kintal la. Kon Yesus ngat pukiu kintal la babanan. Mo undeng muik oras lo son, tiata oen pait lakos iung Betanias.
Lamtua Yesus bahang kai ina mesa
(Matius 21:18-19)
12 Ola ka ohkaong bii kon, oen putis deng Betanias le taam lakos pait bus el kota Yerusalem. Mo se lalan hlala kam, Yesus lubu.
13 Kam Un ngat net kai ina mes se lalan suut ta. Atuli taom kaa un isin na. Tiata Yesus lako dadani le ngat naan kai na muik isin tam lo ka. Mo Un lako lius kai ina na lam, Un ngat net kai isin mes lo kon. Ta le meman kai ina na oras in isin lo bii, un halas-sam klehen tukun.
14 Kon Yesus tek kai ina na noan, “Undeng ku muik isin taung Auk lo, tiata deng leol neot nia, ku boel isin bel atuil didang pait lo ka!”
Un ima-ii las ming Un in bahang kai ina na ela ka.
Lamtua Yesus tama lako Um in Kohe-Kanas Tene ka, le sukun didaan maan in sosa-hee se na ka
(Matius 21:12-17; Lukas 19:45-48; Yuhanis 2:13-22)
15 Hidi na lam oen laok napiut lakos luis se Yerusalem, kon Yesus taam lako pait se Ama Lamtua Allah Um in Kohe-Kanas Tene ka. Se Um na kintal la, atuli las taon daid maan in sosa-hee son, le hee tiul-tuan, man taom atuli pake taung in tunu-dadung se oras in kohe-kanas. Net ela kon, Yesus laok nulut puting one. Un late soleng mija-mija man oen pakes le silin nini duit tas. Nol late bali bangku-bangku man oen pakes le hee kee se na ngas.
16 Un kon kaing atuli las totoang, le boel kil sa-saa in hee maa laok deng kintal la pait lo ka.
17 Hidim Un tui oen noan, “Mi taan asa man Ama Lamtua mee-baha la in dul son noan, ‘Auk bangun-pii Auk Uma lia, le halin atuli-atuil deng nusa ngias totoang maa le kohe-kanas se nia.’ Mo mi tao Um ni daid atuil in nako ngas maan in nakbua lolen son!”
18 Dedeng tulu agama Yahudi las tene-tenen nas, nol guru-guru agama las ming Yesus in tao ela ka, kon oen kom Un lo isi. Tiata oen mulai nuting lalan le keo tele Una. Mo oen siin-tidu, lole atuil hut mamo kas kom isi nol Yesus in tui-tikang nga.
19 Lelo la le dene kon, Yesus nol Un ima-ii las putis deng kota Yerusalem, le pait lakos ninis se iung Betanias.
Etan kit parsai baktetebes se Ama Lamtua lam, mam Un bel kit asa man kit in nodan na
(Matius 21:20-22)
20-21 Ola oskaong bii kon, oen pait lakos bus el Yerusalem. Oen maa lakos deng kai man lahin Yesus in bahang nga. Kon Un ima-ii las herang, undeng kai ina na tuu-tanga son lako pes un klaput tas. Ti Petrus nangan net Yesus in aa lahin na. Tiata un tek noan, “Papa! Ngat le! Kai man lahin Paap in bahang nga, mate son!”
22 Yesus situs noan, “Meman toma! Tiata sadi mi parsai baktetebes se Ama Lamtua Allah!
23 Ta eta mi parsai ela lam, mi tadu nal leten mes le hoboka lako se tasi kua, sadi mi parsai tailuang tuun lo! Mo mi musti parsai baktetebes se Ama Lamtua Allah.
24 Nadidingun lo koo! Sadi mi parsai baktetebes noan Ama Lamtua Allah bel nal asa man mi in nodan na lam, Un tao bel mi ela!
25 Mo eta muik atuli in kohe-kanas, molota un dalen na banan isi lo nol atuil didang ngam, un musti babanan nol atuling na muna le. Ela halas-sam, mi Aman in ne sorga ku kom le kose soleng mi in kula-sala ngas.
26 [Eta deng mia li muik in pesang dale, nol dai bel ampong atuil didang lo kam, mi Aman in ne sorga ku kon nadidingun mi in kula-sala ngas lo.”]
Oen keket-ketan nol Lamtua Yesus hak ka
(Matius 21:23-27; Lukas 20:1-8)
27 Hidi kon, oen lakos napiut. Lakos lius se Yerusalem kon, oen taam lakos pait se Ama Lamtua Allah Um in Kohe-Kanas Tene ka. Oras oen taam lakos se kintal la ka, tulu agama Yahudi las tene-tenen nas, guru-guru agama las, nol blalan-blalan hadat Yahudi las maas,
28 le keket Yesus noan, “Lahin sii man tadu ku maa tao lobo-lau se ni lia? Nol sii man bel ku hak ka!”
29 Mo Yesus taan son noan oen nuting lalan le tao nahu Una. Tiata Un situs noan, “Auk kon le keket mia. Mi siut Auk muna le, halas-sam Auk siut mia.
30 Auk in keket ti elia: mi totoang taan Yuhanis in Sarain Atuli ka ta lo? Asii man tadu un laok sarain atuli lia? Ama Lamtua Allah tam, atuli lia?”
31 Kon oen huli-bali lako-pait, ti oen nangan noan, “Inah! Kit toman son nia! Eta kit siut noan, ‘Ama Lamtua Allah man tadu’, kam Un siut noan, ‘Eta ela lam, tasao le mi parsai Yuhanis lo kia?’
32 Mo kit kon bisa siut lo noan, ‘Atuli li man tadu.’ Ta lo kam atulis totoang hangus keng nol kita. Lole oen parsai noan Yuhanis nam mo, Ama Lamtua Allah mee-baha.”
33 Tiata oen siut Un tuun noan, “Kaim tanan lo!”
Kon Yesus siut balis noan, “Eta ela lam, Auk kon tek mi lo noan, asii man tadu Au lia.”