7
Haikakɨa 'Amuxi kemɨtiunieritɨarie
1 Yawé naimekɨmɨyɨwe mɨpaɨ kanetiniunieritɨani: Tupiriya kanitineikakaitɨni 'ari ti'aitame hetsiemieme tiuka'itsanatɨku, hikɨ Ti'aitame nekaniuxeiya 'utsikari wakuha'aritɨwame.
2 Kepaukari 'utsikari tupiriya kwiepa memukaxɨkai mɨpaɨ nekatiniuhiwa:
―Yawé nekakaɨyari, waɨkawa nepɨmatsiwawirie ketiniwareuyehɨwiri Kakuwu nuiwarimama. Pɨkayɨwe xɨari memukuwikweni, 'etsimekaniyupaɨmeni.
3 Hikɨ Yawé kaniwarutinenimayata, mɨpaɨ kaniutayɨni:
―Matsi mɨpaɨ pɨkatiyɨni.
4 Meta Yawé naimekɨmɨyɨwe mɨpaɨ kanetiniunieritɨani: Mana Yawé kaniuwekaitɨni, mɨpaɨ haitɨ kename 'aixɨa tiyurienikekai taikɨ, mɨkɨ haramara meukatewatsie naime pɨtaxɨxɨtsitɨwakai metatsiere kwiepa mu'ɨtsiyatsie.
5 Hikɨ mɨpaɨ nekatiniuhiwa:
―Yawé nekakaɨyari, waɨkawa nepɨmatsiwawirie, mɨpaɨ pepɨkatiyurieneni. Xɨari mepɨkakuwikweni Kakuwu nuiwarimama, 'etsimepuyupaɨme.
6 Hikɨ Yawé kaniwarutinenimayata, mɨpaɨ kaniutayɨni:
―'Ikɨ mɨpaɨta pɨkatiyɨni.
7 Yawé tawarita kanetiniuxeitsitɨani: Mɨkɨ 'akaniuwekaitɨni kuraru 'amatayewa 'aurie, mɨkɨ kii 'inɨnɨatame mahete pahanakai.
8 Yawé mɨpaɨ kanetiniuta'iwawiya:
―¿'Amuxi, tita petixeiya?
Mɨpaɨ nekatinita'eiya:
―Kii 'inɨnɨatame mahete pepahana.
Hikɨ Ti'aitame mɨpaɨ kaniutayɨni:
―Keneuxeiya, 'ikɨ kii 'inɨnɨatame mahete neteɨterima 'ixaheritsixi wahixɨapa nekaneikahɨamɨkɨ, 'ari tawariri nepɨkatiwareuyehɨwirieni.
9 »'Itsahaki kakaɨyarixi mɨtiwaratimawiriwakaitsie naitɨ kaniti'unimɨkɨ,
meta kaniti'unimɨkɨ 'ixaheritsixi watukite,
nekaninuamɨkɨ 'ixipara nehakwetɨ
Keruwuhani paratsiyuyata».
'Amatsiyaxi 'Amuxi maye'unie
10 Hikɨ 'Amatsiyaxi, mawari wewiwame Weteri kiekame, Keruwuhani niuki kanenɨ'airieni 'Ixaheritsie ti'aitame: «'Amuxi 'axakametinikuxatani 'ixaheritsixi yunaime wahɨxie. 'Ari 'ena kiekatari mepɨwaɨripie me'i'enietɨ,
11 mɨpaɨ kaniutaineni:
»“Keruwuhani 'ixiparakɨ kanimɨmɨkɨ,
'Ixaheri kwieyaritsie memɨtama mekananuhapaniekuni
'ateewa paitɨ kayukwietsie”».
12 Hikɨ 'Amatsiyaxi mɨpaɨ 'Amuxi katiniutahɨawe:
―Keneumieni 'ekɨ pemɨniere, mɨpaɨ petikuxatatɨ xɨka pereu'iwamɨkɨni, kenemie Kura kwieyaritsie.
13 Tawariri Weteri pepɨkarehekɨatani, 'ena ti'aitame tukieya manuwe kanihɨkɨtɨni, meta 'ikɨ kwieyaritsie tuki manuwe.
14 'Amuxi mɨpaɨ 'Amatsiyaxi katiniuta'eiya:
―Ne Kakaɨyari niukameya nepɨkahɨkɨ meta Kakaɨyari niukameya nu'aya nepɨkahɨkɨ, matsi ne muxatsi nepɨwahɨweme meta piní nekaniuka'etsani.
15 Peru Yawé muxatsi watsata kanenayewitɨni, mɨpaɨ kanetiniutahɨawe: “Kenemie neniukame pepayani ketiniwarutaxatɨa 'ixaheritsixi neteɨterima”.
16 'Ayumieme Yawé niukieya keneu'eni. 'Ekɨ mɨpaɨ peputaine:
»“'Ixaheritsixi pepɨkatiwakuxaxatɨwani,
'Itsahaki nuiwarimama wahamatɨa petikuxatatɨ ketineuhayewa”.
17 »'Ayumieme, Yawé mɨpaɨ kanaineni:
»“'A'ɨya tuminikɨ muyumayɨinɨa payani kiekaritsie,
'aniwema 'ukari meta 'ukitsi 'ixiparakɨ mepɨkwi'iwa.
'Akwie pɨti'inɨatsieni meta hipatɨ mepɨxatɨarieni,
'ekɨta pepɨmɨni kakaɨyarixi wakwieyaritsie.
Metatsiere 'ixaheritsixi mepanuhapanieni
'ateewa paitɨ mepuyuhayewa kayukwieyaritsie”».