3
Kakaɨyari niukameya 'Amuxi kemutayɨ
1 Xekeneu'eni 'ixaheritsixi, 'ikɨ Yawé niukieya kemaine xehepaɨtsita, yunaime nuiwari hetsiemieme 'Ekipitu nemɨwarayewitɨ:
2 «Xeme xeikɨa nekanixe'anayexeiya
yunaime kwiepa memɨtama watsata.
'Ayumieme, nekatinixe'akapitɨamɨkɨ
naimekɨ ke'axaxemɨte'uyuri».
3 Pɨkayɨwe yuhutatɨ muhunikɨ
yamekatexatawawetɨ.
4 Maye yeuta pɨkahayuhaxɨatɨwa
xɨka tixaɨtɨ katikwaka.
Maye nunutsi pɨkaha'a yuterɨta
xɨka tixaɨtɨ katikwaka.
5 Wiki winiyaritsie pɨka'uyewiere xɨka
mana katiuyewieka.
Winiyari pɨkakuyuane xɨka
tixaɨtɨ katiwieriweni.
6 Kuxineta kiekaritsie kaniutahɨtsieriwani
kiekatari mɨpaɨ memɨteyu'ɨwiyanikɨ.
Kiekaritsie yɨkɨ pɨkatiyɨni
xɨka Yawé mɨpaɨ kahaineni.
7 Yurikɨ, Yawé naimekɨmɨyɨwe yɨkɨ pɨkatiyurieni
yuniukamete katiwataxatɨawetɨ
kemɨtiyurieni.
8 Maye xɨka heyutahaxɨatɨani,
¿kemɨ'ane pɨkatimani?
Xɨka Yawé naimekɨmɨyɨwe haniukani,
¿kemɨ'ane niukameyatɨtɨ pɨkatitaxata?
'Ixaheri kemɨti'uximatɨarieni
9 'Ikɨ xeketenekuxatani kiekari 'aixɨa mɨrekukurarutɨiyarie 'Atsiruri
meta kiekari 'aixɨa mɨ'anene 'Ekipitu mieme:
«Tsamariya hɨriyaritetsie xekeneuyukuxeɨri
meke'uneniere kememɨtemama,
nanaimarika kemɨtixuawe mana».
10 «Yukii 'aixɨa mɨ'aneneta memɨtehɨniya
'inawari meta memɨtewanawairie hipame waɨriyarika
mɨkɨ mepɨka'imate tita heitserie muyeikani mɨranɨyɨne»,
Yawé mɨpaɨ kanaineni.
11 'Ayumieme, Yawé naimekɨmɨyɨwe mɨpaɨ kanaineni:
«Xewitɨ mɨmetsi'aye'unie 'akiekari kanika'unamɨkɨ,
kepemɨtitɨrɨkaɨye kamena'iwamɨkɨ
meta 'apiinite kametininawairiemɨkɨ».
12 Yawé mɨpaɨ kanaineni:
«Muxatsi wahɨweme maye kemɨtikunawairiwa
heiwa hutame 'ɨkate ya naka 'etsiyeume,
mɨpaɨ mekatenitawikweitsitɨariekuni 'ixaheritsixi,
Tsamariyatsie kiekatari
yu'utá 'etsikinayaritsie xeikɨa meta Ramatsikutsie».
13 Yawé naimekɨmɨyɨwe mɨpaɨ kanaineni, Kakaɨyari Naimekɨmɨtɨrɨkaɨye:
«'Ikɨ xeketeneu'eni xeketenekuxatani Kakuwu tɨɨriyamama wahepaɨtsita.
14 »Kepauka nemɨrekapitɨani 'Ixaheri 'axamɨtiuyurikɨ,
nekanika'unamɨkɨ mɨratimawatɨre Weteri,
mɨratimawatɨre 'awateya kanakainixɨamɨkɨ,
kwiepa kanikaxɨrimɨkɨ.
15 Nekaneti'unamɨkɨ kii muhaɨtɨnitsie mieme
meta witarita mieme.
Kanati'unixɨamɨkɨ kii maripirikɨ witsimɨreukuwewiyatɨka
meta waɨkawa kii witsimɨ'anene kanika'unixɨamɨkɨ»,
Yawé mɨpaɨ kanaineni.