15
1 A LAILA mele aku la o Mose, a me na mamo a Iseraela i keia mele ia Iehova: olelo aku la ia me ka i ana aku,
Ia Iehova no wau e mele aku ai,
No ka mea, ua hoonani loa oia ia ia iho;
Ua kiola oia i ka lio, a me kona mea hooholo iloko o ke kai.
2 O Iehova no ko'u ikaika, a me ka'u mele,
Oia ko'u hoola, o ko'u Akua hoi ia,
E hoomakaukau no wau i wahi nona e noho ai.
O ke Akua no ia o ko'u makua,
A e mililani aku au ia ia.
3 He kanaka kaua o Iehova,
O Iehova no kona inoa.
4 Ua ka oia i ke kai i na kaakaua o Parao,
A me kona poe koa;
Ua poho ilalo o ke Kaiula kona poe kaua ma na kaa:
5 Ua poipu ka hohonu ia lakou;
Poho lakou ilalo me he pohaku la.
6 Ua nani kou lima akau, e Iehova, no ka mana;
Na kou lima akau, e Iehova, i paki iho i ka enemi.
7 I ka nui o kou nani, ua hoopuehu aku oe i ka poe i ala ku e mai ia oe;
Hoouna aku oe i kou huhu,
Pau iho la lakou me he opala la.
8 I ka hoohanu ana o kou mau pukaihu, ua hoakoakoaia mai na wai,
Ea ae la na wai iluna, me he puu la:
Lilo no ka hohonu i mea paa maloko o ka opu o ke kai.
9 I iho la ka enemi, E hahai aku no au,
E loaa no, a puunauwe aku i ka waiwai pio.
E maona auanei ko'u kuko ia lakou,
E unuhi au i ko'u pahikaua,
A e loaa hou no lakou i ko'u lima.
10 Pupuhi no oe me kou makani,
Uhi mai la ke kai ia lakou,
Poho iho la lakou ilalo i ke kai me he kepau la.
11 Owai ka mea iwaena o ka poe ikaika e like me oe, e Iehova?
Owai kou mea like, ma ka nani o ka hemolele?
He mea weliweli ka hoomana aku,
Ua hana oe i na mea kupanaha.
12 O aku la no kou lima akau,
Ale iho la ka honua ia lakou.
13 Ma ka lokomaikai no oe i alakai mai ai i na kanaka au i hoolapanai ai;
Me kou mana no oe i alakai ai ia lakou i kahi hemolele au i noho ai.
14 E lohe auanei na kanaka, a e makau hoi.
E loohia auanei ka poe noho ma Palisetina i ka weliweli.
15 Alaila, e weliweli mai na'lii o Edoma,
E loohia no hoi ka poe ikaika o Moaba i ka haalulu,
E hehee auanei ka poe a pau e noho ana ma Kanaana.
16 E kau mai no ka makau a me ka weliweli maluna o lakou;
No ka nui o kou lima e noho malie lakou me he pohaku la;
A hala'e kou poe kanaka, e Iehova,
A hala'e na kanaka au i hoolapanai ai.
17 Nau no lakou e hookomo,
A e hoonoho hoi ia lakou ma ka puu o kou hooilina,
I kahi au i hana'i i wahi e noho ai nou, e Iehova,
I ke keenakapu hoi a kou mau lima i hookumu ai, e ka Haku.
18 E noho alii mau loa aku no o Iehova.
19 No ka mea, hele ae la ka lio o Parao,
Me kona kaahaua, a me na hoohololio ona,
A iloko o ke kai,
A hoihoi mai la o Iehova i na wai o ke kai maluna o lakou;
Aka, o na mamo a Iseraela,
Hele ae la lakou ma kahi maloo mawaenakonu o ke kai.
20 A o Miriama, ke kaula wahine, ke kaikuwahine o Aarona, lawe
ae la ia i mea kuolokani ma kona lima, a hahai aku la na wahine
a pau mamuli ona, me na mea kuolokai, a me ka hula.
21 I mai la o Miriama ia lakou,
E mele aku oukou ia Iehova,
No ka mea, ua lanakila loa oia,
Ua kiola oia i ka lio a me kona mea hooholo i ke kai.
22 Pela i lawe mai ai o Mose i ka Iseraela, mai ke Kaiula mai, a hele mai la lakou i ka waonahele i Sura; hele mai la lakou maloko o ka waonahele i na la ekolu, aole hoi i loaa ka wai.
23 A hiki mai la lakou i Mara; aole hiki ia lakou ke inu i ka wai o Mara, no ka mea, ua mulea ia; no ia mea, i kapaia'ku ai ia o Mara.
24 Ohumu ae la na kanaka ia Mose, i ae la, Heaha la ko makou mea inu?
25 Uwe aku la oia ia Iehova; a hoike mai la o Iehova ia ia i kekahi laau, a hooleiia'ku la ia mea e ia iloko o ka wai, hanaia mai la ka wai a ono: malaila ia i hana'i i olelo kupaa no lakou, a i kanawai hoi, a maiaila oia i hoao ai ia lakou.
26 I mai la, A i hoolohe mau mai oe i ka leo o Iehova, o kou Akua, a e hana i ka mea pono imua o kona maka, a e hoolohe i ka mea ana e kauoha mai ai, a malama i kona mau kanawai, alaila aole au e kau maluna ou i kekahi o keia mau mai a'u i kau ai maluna o ko Aigupita; no ka mea, owau no Iehova, ka mea hoola aku ia oe.
27 A hele mai la lakou i Elima, malaila na punawai he umikumamalua, a me na laau pama he kanahiku: noho iho la lakou ilaila ma kahi o na wai.