15
ABayudaaya bagotesya ebiragiro bya Kibbumba
(Mak 7:1-13)
1 Awo abamo oku Bafalisaayo nʼabakugu omu byʼaMateeka ga Musa ni bazwa e Yerusaalemi, ni baaba egiri oYesu, ni bamubuulya bati,
2 “Lwaki abeegibo tibasengererya obulombolombo bwa bazeiza baiswe? Ekyo kityo olwakubba ibo owebabba baaba okulya, tibanaaba omu ngalo!”
3 Neye oYesu nʼabairamu ati, “Kaisi lwaki inywe nywena muvuna ekiragiro kya Kibbumba olwʼokutaka okusengererya obulombolombo bwanywe?
4 Iye oKibbumba yakobere ati, ‘Oiteewo nʼomaawo obawenge ekitiisya,’ era ati, ‘Eyazumanga oiteeye ooba omaaye, bamwitenge-bwiti.’
5 Neye inywe mukoba muti singa omuntu akoba oiteeye ooba omaaye ati, ‘Ekinandikuwaire ngʼobubbeeri, nkiwaire Kibbumba.’
6 Awo omuntu oyo nga takaali abbaaku nʼakantu kadi kamo akaakolera oiteeye ooba omaaye. Omu ngeri eyo oKibbumba ekyakoba ni mukidibya ni musengererya bulombolombo bwanywe.
7 Bananfunsi inywe, kaisi ekibono kya Kibbumba onaabbi Isaaya ekiyabalagwireku kituuce, oweyakobere ati:
8 ‘Abantu banu bampa ekitiisya mu bibono-bubono,
neye emyoyo gyabwe gimbulaku.
9 Era nʼengeri egibansinzamu tintuuce,
olwakubba ebibono ebyʼabantu-obuntu,
niibyo ebibeegesya bati Mateeka ga Kibbumba.’ ”
Omuntu okubba owa muliko
(Mak 7:14-23)
10 Awo olundi oYesu nʼayeta ekiziima kyʼabantu, ni kyaba egyali, nʼakikoba ati, “Mumpulisisye era mutegeere
11 Ekyo omuntu ekyalya tiniikyo ekimusuuca okubba owa muliko omu maiso ga Kibbumba, neye ekyo ekizwa omu mwoyogwe niikyo ekimusuuca okubba owa muliko.”
12 Awo abeegibe ni baaba egyali, ni bamubuulya bati, “Omaite oti aBafalisaayo kibanyiigisirye owebawuliire ekyo?”
13 OYesu nʼabairamu ati, “Buli kimera oBbaabba aali omwigulu ekinandi nʼakoma balikiiya ni kizwayo paka nʼemiri.
14 Mubaleke, abo abali ooti beekubbemberi aboofu. Singa omwofu yeekubbembera omwofu omwinaye, bonabona bagwa omu kiina.”
15 Awo oPeetero nʼamukoba ati, “Otusonzolere amakulu gʼolugero oolwo.”
16 OYesu nʼakoba ati, “Nywena mukaali okutegeera?
17 Timubona muti buli kintu ekibalya kyaba mu kida, era kizwamu ni kiwuluka omu mubiri?
18 Neye omuntu ebyatumula bizwa mu mwoyo, era ebyo niibyo ebisuuca omuntu okubba owa muliko omu maiso ga Kibbumba.
19 Ekyo kityo olwakubba omu mwoyo gwa muntu niimwo omuzwa ebiseego ebibbibibbi, nʼobwiti, nʼobulendi, nʼobudankaani, nʼobwibbi, nʼokusibirirya oku bantu, nʼokutumula ebyakalebule oku bantu.
20 Era ebintu ebyo niibyo ebisuuca omuntu okubba owa muliko omu maiso ga Kibbumba. Neye omuntu okulya nga tanaabire omu ngalo, tikimusuuca owa muliko.”
Omukali eyabbaire nʼokwikirirya
(Mak 7:24-30)
21 Awo oYesu nʼabeegibe ni bazwa omu kifo ekyo, ni baaba omu kitundu ekiriraine ebibuga oTiiro nʼoSidoni.
22 Omukali oMukanani, neye nga mutyami wʼomu kitundu ekyo, nʼayaba egiri oYesu, ngʼamwaminkirira ati, “Musengwa, iwe oKurisito oMwizukulu wa Dawudi, onkwatire ekisa! Omwala wange aliku omuzimu, era gumugadya ino!”
23 Neye oYesu nandi nʼamwiramu kadi. Kale abeegibe ni baaba egyali ni bamwegairira bati, “Omuseebule ayabe olwakubba atusengererya ngʼatuceererera!”
24 Awo oYesu nʼabairamu ati, “Nze bantumire eeri bantu bʼe Isirairi bonkani abali ooti ntaama egyagotere.”
25 Neye era omukali oyo nʼayaba nʼakomera oYesu amazwi era nʼamukoba ati, “Musengwa, ombeere!”
26 OYesu nʼamwiramu ati, “Tikituuce okutoola ekyokulya kyʼabaana ni bakimumira embwa gyabwe.”
27 Omukali nʼakoba ati, “Niikyo ekyo Musengwa, neye nʼembwa gyona, girya obukunkumukira obuzwa oku menza ya Musengwa waagyo.”
28 Awo oYesu nʼamwiramu ati, “Mukali iwe, oli nʼokwikirirya kwʼamaani! Aale kibbe kityo ngʼowootaka.” Era omwalawe nʼalamirawo omu saawa eyo.
OYesu alamya abantu abangi
29 Awo oYesu nʼabeegibe ni bazwa omu kifo ekyo, ni baaba oku mbale kwʼenyanza oGaliraaya, nʼaniina oku lusozi nʼatyama.
30 Era ebiyindi byʼabantu ebinene ni byaba egyali nga bamutwalira abaleme, nʼaboofu, nʼabanialuuki, nʼababbubbu, nʼabalwaire abandi bangi. Era abalwaire abo ni babateeka omu maisoge, nʼabalamya.
31 Kale abantu ni bawuninkirira nga babona ababbaire babbubbu batumula, ababbaire banialuuki nga babba kusani, ababbaire abaleme batambula, ababbaire aboofu nga babona. Era ni bagulumalya oKibbumba wa Isirairi.
OYesu aliisya abantu 4,000
(Mak 8:1-10)
32 Awo oYesu nʼayeta abeegibe, ni baaba egyali, nʼabakoba ati, “Abantu banu bankwatisirye ekisa olwakubba bamalire na nze enaku isatu nambirira, aate atyanu badambaku ekibalya. Tintaka okubaseebula ngʼenzala ebaluma, bademba babbalikira omu nzira.”
33 Abeegibe ni bamwiramu bati, “Omu kitundu kinu omunambula muntu twatoola yaina ekyokulya ekimala okwikutya ekiziima kyʼabantu ekityo?”
34 OYesu nʼababuulya ati, “Muliwo nʼemigaati mimeka?” Ni bamwiramu bati, “Musanvu, nʼobunyanyi obukafingiri butono buti.”
35 Awo nʼalagira abantu batyame ansi,
36 nʼatoola emigaati omusanvu nʼobunyanyi, ni yeebalya oKibbumba. Era nʼabivunavunamu, nʼabikwatisya abeegibe, era bona ni babigabira abantu.
37 Era abantu bonabona ni balya ni baikuta. Era abeegibe ni bakumbaania ebitundutundu ebyafiikireku, ni baizulya ebiibo musanvu.
38 Obungi bwʼabantu abaliire, babbaire abasaiza 4,000, nga tibabaliireku abakali nʼabaana.
39 Awo oYesu nʼaseebula abantu, kaisi nʼaniina omu lyato, ni baaba omwitwale lyʼe Magadani.