17
OYesu yeesabira iye onyere
1 Awo oYesu oweyamalire okutumula ebyo, nʼagangamula omutwe okulingirira omwigulu kaisi nʼasaba ati:
“Bbaabba, ekiseera kituukire. Aale atyanu
olage abantu ekitiisya kyʼoMwanawo ngʼowekiri
ekyʼamaani, kaisi yena ayezye okubalaga ekitiisyakyo ekyʼamaani.
2 Ekyo kityo olwakubba wamuwaire
obwezye oku bantu bonabona, kaisi ayezye
okubawa ibo nago abewamuwaire obwomi
obutawaawo.
3 Era ibwo obwomi obutawaawo
obwo busunika mu ngeri eenu eti: Abantu bali
nʼokukumanya niiwe oKibbumba wenkani
onanyerenyeere, era nʼokumanya oYesu Kurisito
oguwatumire okununula abantu.
4 Nze ndagire
abantu ekitiisyakyo ngʼowekiri ekyʼamaani omu
kukola era ni mmala omulimo oguwampaire okukola.
5 Bbaabba, aale atyanu tete onganye mbe
nʼekitiisya kidi ekinabbaire nakyo owenabbaire
na iwe omwigulu nga nʼekyalo kikaali nʼokubbaawo.”
OYesu asabira abeegibe
6 Awo oYesu ni yeeyongera okusaba ati,
“Mmanyikisirye abantu abewampaire, ikyo
ekyo ekyoli. Abantu abo nago niibo abewampaire
ngʼobatoola mu badi abakwikiririryamu. Ibo
abantu abo babbaire babo, nʼobampa era bakwaite
ekibonokyo.
7 Era atyanu bamaite bati obukwenda
nʼebyo byonabyona ebinkola bizwa giri niiwe.
8 Ekyo kityo olwakubba nabakobeire ebibono
ebiwampaire, era ni babiikirirya. Era bakakasiire nakimo
bati nazwire giri niiwe, era ni baikirirya bati
wantumire.
9 Kale mbasabira. Cooka
tindi kusabiranga bantu abatakwikiriryamu, wazira
nsabira baabo abewampaire olwakubba babo.
10 Era abo abendi nabo bonabona babo, nʼababo
era bange. Era balagire bati ekitiisya kyange
kyʼamaani.
11 Aale atyanu nze ngonu njaba okuzwa
oku kyalo era ndi kwiza egyoli neye ibo bakaali
bali oku kyalo. Iwe Bbaabba oMweru,
obakuumenge omu bwezyebwo obuwampaire kaisi
beezye okubbanga nakimo ooti niiswe owetuli ekimo.
12 Era owenabbaire nabo, cooka olwʼobwezye
obuwampaire, nabakuumire era ekigosi nandi
kibatuukaku. Era mpaawo kwibo eyagotereku
okutoolaku oyo eyabbaire ateekwa okugota kaisi
eKiwandiike kyezye okutuukirira.”
13 Awo oYesu ni yeeyongera okusaba ati,
“Aale ngonu atyanu njiza egyoli, neye ebyo
mbitumula nga nkaali ndi oku kyalo kaisi
eisangaalo lyange libbe mu bwizulye omu
basengereri bange.
14 Era nabawaire ekibonokyo
nʼolwekyo ekyalo ni kibacaawa olwakubba nti ibo
nago tibakaali bʼekyalo ooti ninze owentali
wʼekyalo.
15 Cooka tinkusaba nti obatoole oku
kyalo, wazira nti obakuume eeri omubbimubbi
oSitaani.
16 Nti ibo tibekyalo ooti ninze owentali
waakyo.
17 Aale obatukulye ngʼokolesya
obwezye bwʼekibonokyo. Nti ekibonokyo niigo
amazima.
18 Cooka ngʼowewantumire oku kyalo, ntyo
zena niiyo owembatumire oku kyalo.
19 Nze
newaayo egyoli kaisi bona abanyere beezye
okweweerayo nakimo egyoli.”
OYesu asabira abaikiriryabe
20 Awo oYesu ni yeeyongera okusaba ati,
“Tinsabira beegi banu bonkani, neye nʼabo
abalinjikiririryamu olwʼobukwenda bwa banu.
21 Era Bbaabba, ekyo kityo kaisi bonabona babbenge
bumo, ooti niiwe owooli obumo na nze, era zena
owendi obumo na iwe. Mbasabira nti bona
babbenge bumo na iswe kaisi abantu beezye
okwikirirya bati iwe wantumire.
22 Era
mbasuucirye okubba bʼekitiisya zena
ngʼowonsuucirye kaisi beezye okubbanga bumo ooti
ninze owendi obumo na iwe.
23 Ekikoba kiti, ntaka
ibo beegaite nga ibo owebali bagaite na nze era
nga iwe owooli mugaite na nze. Era mbasabira nti
babbeere nakimo bumo, kaisi abantu bategeere bati
wantumire, era obataka ngʼowontaka.”
24 Era oYesu ni yeeyongera ati,
“Bbaabba, abantu abewampaire, ntaka lubbe
lumo nga bali na nze omwigulu eeyo eginjaba okubba,
era babbeeyo okubonaku ekitiisya ekinalibbaamu.
Cooka ekitiisya ekyo wakimpaire olwakubba
wantakire nga nʼekyalo tikibbumbe.
25 Bbaabba
omutuukirirye, abantu tibakumaite, neye nze
nkumaite, era bamaite bati wantumire.
26 Era
nabamanyikisirye ikyo ekyo ekyoli, era njaba
okweyongera okubamanyikisya ikyo ekyo nago,
kaisi bona batakenge abantu abandi ooti niiwe
owewantakire era kaisi nze mbe kimo nabo.”