1 Timoti
Timoti ana leta vakuumgoina
Livala Aba Vaita
Leta ame Timoti ana leta vakuumgoina Paulo igini. Nakona tala 62 sinaena igini.
Timoti Epeso goi ikaaiyaka, Yeisu ana totugugunayao imatakaavatedi. Ago tovatulukwana polapola maniyedi bogina sisiu idi tapwaroro goi tomota idi numisa sikaigoyaidi. Tauna leta ame goi Paulo latuwona Timoti ikatuliwole bego tovatulukwana polapolayadi isanabodedi. Aiyuwoina Paulo Timoti ivatuluko manakaena itoboine idi tapwaroro ana topaisewa ikinavedi. Aitonina Paulo Timoti ivatuluko ina sinapu nakonakae itoboine boda tamo tamo tapwaroro goi yaidi.
Leta Luluna
1. Leta ana togínina be ana tokatuyaivayao 1:1-2
2. Lovina tovatulukwana polapola manudi 1:3-20
3. Tapwaroro ana lovina 2:1—3:13
4. Leta ame ana masi 3:14-16
5. Paulo ina vatulúkwana Timoti ina sinapu manuna 4:1-16
6. Timoti ana lovina ina guinuwa boda tamo tamo yaidi manuna 5:1—6:2a
7. Paulo ina liwola vaamliyaidi 6:2b-19
8. Lovina vaamliyaina Timoti yaina 6:20-21
Leta ana togínina be ana tokatuyaivayao
1
(1 Timoti 1:1-2)
1-2 Timoti,
Ida numisa tayamo pasina tauna kom natugu toina nakae.
Yau Paulo, Guyau Yeisu ina vamoléyana Yaubada ada Toyava be nakae Guyau Yeisu talootutae idi lovina goi. E leta ame agini iwo yaim.
Tamada Yaubada be ida Tomoya Guyau Yeisu idi kanuwóiya be idi nuwokapisi be nakae idi tuboina bei sivinim.
Lovina tovatulukwana polapola manudi
(1 Timoti 1:3-20)
Timoti itoboine
tovatulukwana polapola isanabodedi
3 Tomota maniyedi moeko Epeso goi sikaaiyaka, ituli ta vatulukwana polapola sivaatulúkwana. E leta ame goi akatuliwolem nakae tutayana boi bogina bei atulavem anonoina Mesadoniya parovinsi akatuliwolem bego moeko goi kwaaiyaka bei moe tomotayadi kulovinaēdi ituli ta vatulúkwana taabu sivaatulūkwana.
4 Kulovinaēdi taabu sikaasalēdi vatuta be tubudao adi liliu badabadaaidi yaidi goi. Dogoiyadi moe aumakimaki besobeso sivaaituwedi go, Yaubada ina paisewa moe numisa goi, e geya sivaituweyeta.
5 E guna lovinayana unana, moe bego tomota simatakooiyedi. Go idi matakoiyana itoboine atedi maavadaidi goi be nuwodi geya isabutukoidita goi be nakae idi numisa dókana goi.
6 Ame sinapuyadi tomota maniyedi bogina sivasulaigidi, tauna siketoiya besobeso be aumakimaki geya basabasaidimo sitaiyakekedi.
7 Tauyadi bego Yaubada ina Katukeda ana tovatulukwanayao go, kaga kaga siidigedi be nakae kaga manuna sikaugeogéona geya siyagoidita.
8 E tayagoi bego Yaubada ina Katukedayana dedevina, nakae aba vaita, neta taetakodoko nakae itoboine.
9 Bei taetakodoko neta ame tanuwokavate: Bego Yaubada ina Katukeda iyato geya tokibóbwata manudi geya, go sem Atukedayana ikaaiyaka ame tauyadi manudi: Tomota Atukedayana ana tokapipilova be tokadoinana, Yaubada ana tokaoliliwoyao be toogoyoidi, kaga liliuna kimaasabaina Yaubada umana kidi sikibaibailidi be nakae taviileidi Tauyana yaina, avatauwa neta sinadiyao o tamadiyao silauidi, tokaumata,
10 toroerata be tomasisi goyogoyo, tauyadi koroto koroto taiyao, tauyadi tomota siipakoidi, topola, tokanatamada polapola be nakae kaga liliuna tomota siguuinuwedi go, vatulukwana dókana isanaabodeda taabu taguuinuwēdi.
11 Vatulukwana dokanayana unana moe Yaubada ina togaga ana káeyana Valena Dedevina. Valayana moe Tauyana tubooinina be nakae kaakesaina bogina inumisegu ataalavaite.
Paulo aba gita tayamo
Yaubada ina kanuwóiya goi ada yava tababane
12 Guna tokitogaga ida Tomoya Yeisu Guyau yaina akauyagu bego inuwonúwana yau aba numisa, e ina paisewa manuna ikawoigu.
13 Boi Tauyana ataagiwoi be ina tonumisayao ayogedeegededi be nakae Tauyana avakaaleyedi. Tauna itoboinegu liuna ababane go, Tauyana geya ikatumapuguta, go sem inuwokapisiyegu unana tutayana dogoiyadi aguinuwedi, geya anumiseyeta be nakae atamogemogeye, tauna inuwokapisiyegu.
14 E ida Tomoya ina kanuwóiya ilausiwosiwo yau yaigu, e numisa be matakoi ababanedi guna spwagógana Guyau Yeisu taiyao pasina.
15 Livala ame livala aba numisa nakae itoboineda tauyaonedoko: Guyau Yeisu bogina isou ima poyapoya goi bego toogoyoida iyaveda. Ego togoyoidayada yaida goi yau moitamo toogoyoigu toigu go, liuna geya iviniguta geya,
16 go sem inuwokapisiyegu unana ame: Bego yau toogoyoigu toigu yaigu goi Guyau Yeisu ina aramaitana dókana ivagitakoigu. Ina aramaitanayana yau yaigu aba gita tomota yaidi bego avatauwa Tauyana sinumise, yawoidi vata sibabane.
17 E Tokalibubuna vata geya ikamaseta nakae geya tagiteyeta. Tauyana anetava Yaubada. Ame Tauyana aba wowoina be aba taimámina ame tuta be nakae tuta simamaima.
E nakae!
Timoti itoboine ina sinapu goi aba numisa
18 Natugu Timoti, moe lovinayana bogina nimam goi ayato moe nakae Yaubada ina nuwonúwana kom manum boi ina tokabivalavala bogina sikabivalevaledi yaim. Idi livalayadi kunuwokaavatēdi be kuutogāga bego yaviya dedevina kuvayaviye ame nakae:
19 Im numisa be nakae kaga nuwom iiyagoi dedevina Yaubada matana goi, e kuyoisikaavatēdi. Ago maniyedi tomota nuwonúwana dedevina bogina sikalave, tauna idi numisa sibugoyai.
20 Moe tauyadi yaidi goi koroto adi taiyuwo, tayamo Aimeniyo, tayamo Alekisanda. Tauyadi adi taiyuwokova bogina Kaleya nimana goi ayatoidi bego matadi ivasabudi be siyagoi Yaubada taabu sitaagiwōi!