3
Iyoni tosayóyova ina katubayásina
Yeisu ina sowóduwo manuna
(Maki 1:1-8; Luke 3:1-9; Iyoni 1:19-28)
1 E sikaaiyaka aaa, gomanayana bogina ikaitubuwaumatuwo. E amo tutayana Iyoni tosayóyova ina Yudiya yoyowoina goi tomota yaidi itaalavaita
2 idigo kana,
‘Kotugavīla! Yaubada ina kalibúbuna bogina imaiyaba bei itoboinemi kosiu.’
3 Ame tauyana manuna tokabivalavala Aiseya boi nimatu bogina igini idigo kana,
‘Toduduwo niyana gagaina yoyowo goi iiduduwo kana,
“Yauwe ina kenao kounāi
be nakae kokitotomōi!” ’
Aiseya 40:3
4 E kina go Iyoniyana ana kwama moe Yaubada ina tokabivalavala ana kwama nakae tuta liliuna ilosilosi. Ana kwamayadi kameri unuununa goi siwodugudi. Ana gadíwana tolobona goi moe yoguyogu sakavaina. Ago avana moe tatabole be mokava.
5 E tuwo Iyoni itaalavaita go, da Yerusalema be tomota madabokidi Yudiya dadavina goi be nakae tomota asa liliudi sákala Iyoridani kikina goi sima tauyana sitaiyakeke
6 be nakae idi goyo sitalavaitedi namliyeta bwae Iyoridani goi isayoyoidi.
7 E Iyoniyana ikandobala Parisi be Sadusi badabadaidi igitedi simamaima; latuwodi adi sayóyova go, ilatuwokoidi idigo kana,
‘Komi siyasiyaimi moteta nakae! Manakae? Konuwonúwana bego sayóyova kaka goi itoboinemi Yaubada ina egamogamogu imamaima yaina kosiya ae? Sayóyova kaka geya ivaitemita! Mainao imi goyo goi kotugavīla!
8 Tauna neta sayóyova vavagimi koma bego Yaubada ina egamogamoguyana yaina kosiya, e mainao imi tugavilayana goi keuwoimi dedevidi koguinuwēdi.
9 Ago taabu taumiva kodigoopopōita kami,
“Kai tuwo unana kai Eberamo tubunao, tauna liuna bei geya kababaneyeta.”
Nakae geya go, ame alatuuwokoimi konōve: Eberamo tubunaoyadi kaga? Yaubada itoboine gurewa ame ikabidi, e Eberamo tubunao imadagidi. Tauna neta komi Eberamo tubunao, moe geya ivaitemita.
10 E Yaubada ina egamogamoguyana kíyama nakae. Kiyamayana bogina alova lamdi goi iyokaabubune, tauna ava kalovava neta sikéuwo goyogoyo, bei itaunanedi go, ikabidi ilavedi yeu goi igabudi. Tauna nakae ina egamogamogu giyakainava isowóduwo yaimi neta geya kotugavileta.
11 Yau bwae goi asaayoyoimi. Moe imi tugavila ana kaba kinana. Go koroto tayamo mligu goi imamaima itobukukuyuigu; nakae geya itoboineguta bei ana sendoro akavaledi unana yau sobuyekoina. Tauyana Baloma Kimaasabaina be yeu sabeninimina goi bei isayoyoimi.
12 Tauyana ina kaba takínona bogina iyokaabubune; giyakainava bei witi kutukutuna be mosamosaina itakinodokoidi. Ikavava, ana kutukutu bei ikabidi, ina sánala goi idodoidi go, mosamosayana, bei ikabidi yeu aiyako vaatayaina goi igabudi.’
Yeisu ana sayóyova tetelina
(Maki 1:9-11; Luke 3:21-22)
13 Amo lavayana Yeisu itáoya Galili goi ina sákala Iyoridani bei Iyoni goi isayóyova.
14 E kina go Iyoniyana ipoikíkina Yeisu isanabode kana,
‘Itoboine yau kusayoyoigu go, kom kuma bego asayoyoim?’
15 E tuwo kina Yeisuyana idigo kana,
‘Ame tuta kutagōna kusayoyoigu. Moe nakae Yaubada ina nuwonúwana madabokina ina yava ana kenao manuna bei takibobosidoko.’
Tuwo moitamo itagona.
16 E Yeisu ana sayóyova mlina mainao bwae goi isinalaga go, Yaubada matabuwona yábana ikatupáeve. Yeisu ikandolaga, Yaubada Balomaina igite, ana kaigigita bunabuna nakae isou imamaima Tauyana goi itowo.
17 Níyana tayamo matabuwona yábana goi itumasobu idigo kana,
‘Moe natugu guna kakaya. Tauyana auyaonedoko.’