☰ IYONA 2
2
Iyona ina kawanoi
1 E tuwo Iyonayana íyana sinaena goi ikawanoi Yauwe ina Yaubada yaina 2 idigo kana,
 
‘Guna kategeda goi Yauwe atumadadem,
e kukatumapugu.†a
Same 120:1
 
Ámasa dadavina goi apodeda vaita manuna,
e guna kawanoi kunove.†b
3 Boi kulavegu asou ana dimówana tututu goi,
e négwasa ilataoigu
be nakae im kaivaya gagaidi sikautumgu.†
 
4 Tuwo yau guna nuwonúwana kagu,
“Matam goi bogina kuvatapiyegu.”†
 
Go tuwo nava bei im Vada Kimaasabaina‡ agitemnei.
5 Asou négwasa ituko ima nukotogu goi,†
nakae dimówana ilataoigu,
e dodouna dabagu ipaimi.
6 Asou ana niku unana toina goi.
Ana kaigigita aliupa ikaaiyaka ikaubodegu,
tauna deri nakae akaaiyaka.
Go Yauwe, guna Yaubada,
ámasa goi ma yawoigu kwabimneigu.†
 
7 E guna lotówana alotowo bego akámasa go,
Yauwe anuwookavate.
Tuwo akawanoiyem,
e guna kawanoiyana ituko iwo
im Vada Kimaasabaina‡ goi kunovegu.†
 
8 Avatauwa neta siinumisa tokwalu
geya basabasaidimo yaidi goi,
e Yauwe ina lokata geya sibabaneyeta.†
 
9 Go yau sem magu vesi kaauyaguna
bei yoguyogu akasale kom yaim.
Kaga boi akaatotuli moitamo nakae bei aguinuwe.†
 
¡Ada yava Yauwe goi ima!’
Same 3:8
 
10 E iyanayana kina Yauwe ilovinae Iyona ilagobe. Tuwo moitamo ilagobe ina mamaya goi itowo.
†a 2:2 Sam 3:4; Tkk 3:55. †b 2:2 Sam 118:5. † 2:3 Sam 42:7, 88:6. † 2:4 Sam 31:22. ‡ 2:4 Im Vada Kimaasabaina: Ame nakona Yaubada ina Vada Kimaasabaina gagaina Yerusalema goi. † 2:5 Sam 69:1; Tkk 3:54. † 2:6 Sam 103:4. ‡ 2:7 Im Vada Kimaasabaina: Ame nakona yábana idigedige, moe Yaubada ina Kaba Kaiyaka. † 2:7 2Te 30:27; Sam 142:3. † 2:8 Sam 31:6. † 2:9 Sam 50:14,23.
☰