4
Vatulúkwana kodovaatusidi
1 Guna kaloyao, ame tutayana tokabivalavala polapola badabadaidi bogina siisowóduwo poyapoya ame goi. Tauna taabu tomota tamo tamo idi vatulúkwana kouyaaonēdi tutayana kadi,
‘Kai ima livala Yaubada Balomaina goi ima.’
Go sem kodovaatusīdi be koogitēdi neta Yaubada Balomaina goi sima o geya.
2 Tomota idi vatulúkwana Yaubada Balomaina goi imamaima takinane ame nakae: Avatauwa neta sikamooitamo bego Yeisu Guyau ima poyapoya goi imalasakava, e moe tauyadi idi vatulúkwana Yaubada goi ima.
3 Ago avatauwa neta geya sikamoitamoita bego Yeisu imalasakava, e tauyadi idi vatulúkwana Yaubada goi geya imaita, go sem moe vatulukwanayana Guyau ana kaleya goi ima. Kaleyayana valena bogina konove bei ima go, moitamo ame tuta bogina ikaaiyaka poyapoya ame goi.
4 Natugowo, komi Yaubada ina bodao be nakae vatulúkwana mooitamoina bogina kouuyaone, tauna tokabivalavala polapolayadi bogina kotogagasavedi. Bogina koyagoi. Tauyana sinaemi goi ikitoogagemi ina togaga ivakaigaga toina; nakae tauyana da poyapoya sinaedi ikitoogagedi ina togaga ivakaigagasave.
5 Kidi tokabivalavala polapolayadi moe da poyapoya idi bodao. Idi vatulúkwana moe da poyapoya idi nuwonúwana goi ima. Moe pasina tutayana tokabivalavalayadi sitaalavaita, e kidi da poyapoya siinovedi.
6 Go kai Yaubada ina bodao, tauna avatauwa neta Yaubada siiyagoi, bei sinovema. Go avatauwa neta geya Yaubada ina bodao geya, tauyadi geya sinovemeta. Moeko goi tayagoi ava vatulúkwana moe Baloma Kimaasabaina goi ima, Tauyana Yaubada ana Nanamsa Mooitamoina ana tovagitákwana go, ava vatulúkwana moe Kaleya ina dimoni goi ima.
Sedao tamatakooiyēdi
unana Yaubada imatakooiyeda
7 Guna kaloyao, Yaubada matakoi unana, tauna sedao tamatakooiyēdi. Neta tamaatakoi, Tauyana goi tabibíbina be nakae Tauyana taayagoi.
8 Yaubada aderina moe matakoi. Tauna avatauwa geya simatakoita, Tauyana geya siyagoiyeta.
9 Ina matakoi yaida ivatulukoida ame nakae: Natuna kaakesaina ivamoleye ima poyapoya ame goi bego Natunayana ina guinuwa goi kita maa yawoida vau.
10 Matakoi mooitamoina ame nakae: Geya bego kita Yaubada tamatakoiye, go sem bego Tauyana imatakoiyeda, tuwo Natuna ivamoleye ima, iya ida goyo ana kaba núwala.
11 Guna kaloyao, moe nakae Yaubada imatakooiyeda, tauna kita nakae itoboineda sedao tamatakooiyedi.
12 Geya kada tayaamo tomota Yaubada igite geya go, neta kita sedao tamatakooiyedi, Yaubada yaida goi ikaaiyaka be ina matakoi ateda goi bogina imalatomota.
13 Tayagoi bego Yaubada yaida goi ikaaiyaka ame nakae: Balomaina bogina ivinida.
14 Kai toinima matama goi Yaubada Natuna bogina kagite, e yaimi kataalavaite bego Natunayana ivamoleye ima poyapoya ame goi, Tauyana ada Toyava.
15 Tauna avatauwa neta sikamoitamo bego Yeisu moe Yaubada Natuna, yaidi goi Yaubada ikaaiyaka, e nakae kidi Tauyana yaina sikaaiyaka.
16 Go Yaubada ina matakoi kita yaida bogina talotowo nakae tanumise. Yaubada aderina moe matakoi, tauna neta matakoi goi takaaiyaka, Yaubada taiyao taspwagógana.
17 Yaubada ina matakoi ateda goi bogina imalatomota bego takínona ana maliyalina goi mada katepatu kita bei dedevida. Ina matakoiyana imalatomota dókana yaida goi ame nakae: Nakonakae Guyau aderina, kita aderida nakae ida kaiyaka poyapoya ame goi.
18 Geya tayaamo aba matoita ikaaiyaka matakoi goi. Go sem, matakoi dókana matoita ikausaoli. Nakae neta Yaubada tamataakoiye, ina takínona mana liuna geya tamatoiteyeta. Bogina koyagoi. Matoita unana moe bego liuna tababane. E avatauwa neta Yaubada simaatoite, yaidi goi matakoi nava geya imalatomotadokoneta.
19 Yaubada igimimatakoiyeda, tauna kita tamaatakoi.
20 Avatau neta idigo kana, ‘Yau Yaubada amataakoiye’ go, siyana ikaaolilive, tauyana topola. Moitamo. Neta siyana igitegite go, geya imatakoiyeyeta, e manakaena bei Yaubada geya igitegite imatakoiye? Geya ae?
21 Lovina tayamo Yaubada bogina iivinida ame nakae: Neta Yaubada tamataakoiye, e sedao nakae tamatakooiyēdi.