Adama mana bodao adi liliu
5
(Aba Vatowo 5:1—6:8)
Adama ina bodao: Adama ina Nowa
1 E buki ame moe Adamayana ana liliu bukina: Tutayana Yaubada tomota iwodugu, toinina ana tapata nakae iwodugu.
2 Tomotayadi koroto be vavina iwodugudi. Ikavava, ikaipakuyedi go, ivayokoidi tomota tutayana iwodugudi.
3 E Adama ana tala ana badabada tayamo andedi teti (130) tutayana natuna koroto ibíbina. Gomanayana tamana Adama ana tapata, e Adamayana nakae. E ivayou Seti.
4 Seti ana bíbina mlina, Adamayana ikaaiyaka tala ana badabada eita andedi (800) tuwaina. Ego amo talayadi goi natunao koroto be vevina liliudi sibíbina.
5 Tauyana yawoina ana madabokina moe tala ana badabada nain andedi teti (930), e ikámasa.
6 E Setiyana ana tala ana badabada tayamo andedi paibi (105) tutayana natuna koroto yoina Enosi ibíbina.
7 Enosi ana bíbina mlina Setiyana ikaaiyaka tala ana badabada eita andedi seven (807) tuwaina. Ego amo talayadi goi natunao koroto be vevina liliudi sibíbina.
8 Tauyana yawoina ana madabokina moe tala ana badabada nain andedi tuwero (912), e ikámasa.
9 E Enosiyana ana tala ana badabada nainti (90) tutayana natuna koroto yoina Kenani ibíbina.
10 Kenani ana bíbina mlina, Enosiyana ikaaiyaka tala ana badabada eita andedi piptin (815) tuwaina. Ego amo talayadi goi natunao koroto be vevina liliudi sibíbina.
11 Tauyana ana tala madabokina moe nain andedi paibi (905), e ikámasa.
12 E Kenaniyana ana tala ana badabada seventi (70) tutayana natuna koroto yoina Malaleli ibíbina.
13 Malaleli ana bíbina mlina, Kenaniyana ikaaiyaka tala ana badabada eita andedi poti (840) tuwaina. Ego amo talayadi goi natunao koroto be vevina liliudi sibíbina.
14 Tauyana yawoina ana madabokina moe tala ana badabada nain andedi ten (910), e ikámasa.
15 E Malaleliyana ana tala ana badabada sikstipaibi (65) tutayana natuna koroto yoina Yeredi ibíbina.
16 Yeredi ana bíbina mlina, Malaleliyana ikaaiyaka tala ana badabada eita andedi teti (830) tuwaina. Ego amo talayadi goi natunao koroto be vevina liliudi sibíbina.
17 Tauyana yawoina ana madabokina moe tala ana badabada eita andedi naintipaibi (895), e ikámasa.
18 E Yerediyana ana tala ana badabada tayamo andedi sikstitu (162) tutayana natuna koroto yoina Enoki ibíbina.
19 Enoki ana bíbina mlina, Yerediyana ikaaiyaka tala ana badabada eita andedi (800) tuwaina. Ego amo talayadi goi natunao koroto be vevina liliudi sibíbina.
20 Tauyana yawoina ana madabokina moe tala ana badabada nain andedi sikstitu (962), e ikámasa.
21 E Enokiyana ana tala ana badabada sikstipaibi (65) tutayana natuna koroto yoina Metúsela ibíbina.
22 Metúsela ana bíbina mlina, Enokiyana iiketoiya nakae Yaubada iuyaone tala ana badabada teri andedi (300). Ego amo talayadi goi natunao koroto be vevina liliudi sibíbina.
23 Tauyana yawoina ana madabokina moe tala ana badabada teri andedi sikstipaibi (365).
24 Ego talayadi goi iiketoiya nakae Yaubada iuyaone namliyeta baige ikabiyamo, tauna geya maisinamo.
25 E Metuselayana ana tala ana badabada tayamo andedi eitiseven (187) tutayana natuna koroto yoina Lemeki ibíbina.
26 Lemeki ana bíbina mlina, Metuselayana ikaaiyaka tala ana badabada seven andedi eititu (782) tuwaina. Ego amo talayadi goi natunao koroto be vevina liliudi sibíbina.
27 Tauyana yawoina ana madabokina moe tala ana badabada nain andedi sikstinain (969), e ikámasa.
28 E Lemekiyana ana tala ana badabada tayamo andedi eititu (182) tutayana natuna koroto ibíbina.
29 Tuwo idigo kana,
‘Nakona ame gomanayana ibíbina gagaina baige isawoilaveda ida paisewa moumouna goi; paisewayana moe poyapoya Yauwe boi ikatubolate pasina.’
Tauna natuna ivayou Nowa.
30 E Nowa ana bíbina mlina Lemekiyana ikaaiyaka tala ana badabada paibi andedi naintipaibi (595) tuwaina. Ego amo talayadi goi natunao koroto be vevina liliudi sibíbina.
31 Tauyana yawoina ana madabokina moe tala ana badabada seven andedi seventiseven (777), e ikámasa.
32 E Nowayana ana tala ana badabada paibi andedi (500) mlina natunao koroto Semi, Em be Diyepeta sibíbina.