47
Iyosepa tamana be tuwowonao
sisiu Pero sigite tetelina
1-2 E tuwo Iyosepa tuwowonao adi tainima ikinavedi taiyao sina Pero yaina go, Iyosepayana igimisiu ina Pero ilatuwoko idigo kana,
‘Guna tomoya, tamagu be segowo Kenani goi bogina sima. Idi yoguyoguyao be konadi liliudi nakae simedi. Ame tuta Goseni dadavina goi sikaaiyaka.’
Ibóbwara ikavava, isowóduwo senaoyadi adi tainima ikabidi imedi Pero matana goi ivagitakoidi.
3 Tuwo Peroyana idigo kana,
‘Komi kaga imi paisewa?’
‘Ima tomoya, kai ima paisewa sipi adi tomatakavatayao nakae tubumao boi nimatu’, kidi kaedi.
Kadi,
4 ‘Kama ameko goi bego kasuvadavada. Ima poyapoya bogina ilogoyo, tauna ima yoguyoguyao geya avadimo. Bogina kuyagoi. Kenani goi loga gagaina. Go ima tomoya manakae? Kutagona bego Goseni goi kakaiyaka gea geya?’
5 E Pero idigo kana,
‘Iyosepa, tamam be semowo bogina simekoim.
6 Bogina atagona. Ava poyapoya Itipita goi kugite dedevina yaidi, e toinim kulovina. Neta latuwom bego Goseni goi sikaaiyaka, dedevina. Ago neta yaidi goi maniyedi idi nanamsa gagaina yoguyogu manudi, e kuvayokōidi kidi yau guna yoguyoguyao adi tomatakavatayao.’
7 E Iyosepa ina tamana Yakobo ikabi ime Pero matana goi ivagitako go, kina Yakobo Pero ikaipakuye.
8 E Pero idigo kana,
‘Aivina am tala?’
9 ‘Poyapoya ame goi atuliyaliya tala ana badabada tayamo andedi teti (130). Guna talayadi geya sibadebadeta go, talayadi goi mou badabadaidi ababanedi. Yau guna tala geya tubugowo nakae geya. Kidi adi tala maanawedi’, Yakobo kaena.
10 Tuwo Yakobo aiyuwoina Pero ikaipakuye. Ikavava, Pero ikalave go, isowóduwo ina.
11 E Iyosepa iguinuwe nakae Pero idige. Poyapoya dedevina toina Itipita goi tamana be senao ivinidi. Poyapoyayana moe Ramasesi goi. Ramasesiyana youyuwoina moe Goseni.
12 Ivinidi ikavava, tamana, senao be idi bodao ivaitedi. Adi boda ana badabada nakae, e avadi nakae ivinidi.
Iyosepa poyapoya iigimona tetelina
13 E Itipita goi be nakae Kenani goi awoinu geya, geya toina. Logayana ivakaigaga toina, tauna Itipita be Kenani goi tomota bogina sineneta logayana pasina.
14 E tuwo Iyosepa witi ikaigimona da Itipita yaidi be nakae da Kenani yaidi. Ago idi mani ikabidi, ietunedi sina Pero ina vada goi.
15 Tutayana da Itipita be nakae da Kenani idi mani ikavava, e da Itipita liliudi sideli sima Iyosepa silatuwoko sidigo kadi,
‘Iyosepa, avama kuvinima. Manakae? Bego matam goi kakámasa? Kai ima mani bogina ikavava!’
16 E Iyosepayana idigo kana,
‘Neta imi mani ikavava, e imi yoguyoguyao komēdi bei tatalamapu. Imi yoguyoguyao kovinīgu go, yau awoinu avinimi.’
17 E tuwo moitamo, idi yoguyoguyao sikabidi: Idi osi, idi sipi, idi goti, idi bulumakau be nakae idi ase. E sikabidi, simedi, Iyosepa sivini go, awoinu ivinidi. Tuwo amo talayana goi idi yoguyoguyao liliudi sitalamapuyedi avadi manuna.
18 E tutayana amo talayana ikavava, da Itipita sikaluvila sima Iyosepa silatuwoko sidigo kadi,
‘Ama tomoya, ima mou geya kavamouyeta kom yaim. Ima mani bogina ikavava, ima yoguyoguyao liliudi bogina kwabidi. Tauna konama liliudi sikavava, go sem ima poyapoya ikaaiyaka be nakae kai amema kakaaiyaka.
19 Manakae? Latuwom bego matam goi kakámasa be nakae ima poyapoya ilogoyo? Kai kugimonēma bei kai Pero ina pakonayao. Ima poyapoya nakae kugimonēdi. Ago awoinu kuvinīma kakáika be nakae witi kutukutuna kuvinīma kana kabágula kom manum, e bei kai ma yawoima be nakae poyapoya geya ilogoyoita.’
20 Tuwo poyapoya ana madabokina Itipita goi Iyosepa igimonedi Pero ina poyapoya. Da Itipita liliudi idi poyapoya sikaigimonedi. Bogina kuyagoi. Logayana ivakaigaga toina. Tauna poyapoyayana ana madabokina moe Pero ina kaba lovina.
21 Ago tomota liliudi Itipita goi, e Iyosepa ikabidi kidi Pero ina pakonayao.
22 Ego kidi Tonúwala idi poyapoya geya sikaigimonedita. Moitamo. Tala tamo tamo Pero witi ikaiguyau yaidi goi. E kidi idi kaiguyauyana bogina yoiyadi, tauna loga geya sikamaseta. Ame pasina idi poyapoya geya sikaigimonedita.
23 E da Itipitayadi kina Iyosepa ilatuwokoidi idigo kana,
‘Konōve. Ame bogina imi poyapoya agimonedi be nakae agimonemi komi Pero ina pakonayao. Gwa, imi witi kutukutudi avinimi kōna kobāgula Pero manuna.
24 Go tutayana kodibayoya, dibayoyayana kokaiguyāuye gúguna ainima ainima go, gúguna tayamo Pero kovīni. Ago gúguna aivasi moe komi imi kutukutu be nakae avami, komi be nakae natumiyao.’
25 Kidi sidigo kadi,
‘Bogina kuyavema! Bogina kukanuwoiyema. Go ima tomoya, kai bei Pero ina pákwana.’
26 Tuwo amo tutayana Iyosepa lovina tayamo Itipita goi iyato. Lovinayana ame nakae: Tutayana tomota sidibayoya, dibayoyayana sikaiguyauye gúguna ainima ainima go, gúguna aivasi toinidi manudi, tayamo moe Pero manuna. Lovinayana nava ame tuta ikaaiyaka. Tonúwala idi poyapoya kaka Pero geya ikabiyeta. Tauna lovinayana geya sikabikaoneyeta.
27 E Isileli ina bodao Itipita goi silokasa go, moe asa Goseni dadavina goi. Amoko goi poyapoya sivinidi, e sisusáila, bogina sibadabada.
Yakobo ina kawanoi
ina valiwoga manuna tetelina
28 E Yakobo Itipita goi ikaaiyaka tala ana badabada seventin (17) go, ana tala ana badabada madabokina bogina tayamo andedi potiseven (147).
29 E kina ina lotówana ilotowo bego tuta giyaina bei ikámasa. Tuwo natuna Iyosepa iduduwe ima ilatuwoko idigo kana,
‘Iyosepa, neta itoboinegu im kanuwóiya ababane, e nimam kuvaisīu dibuwatugu kuyōisi go, Yauwe matana goi kukatōtula bego kulokategu be nakae kom aba numisa yau yaigu. Guna kawanoi bego taabu Itipita goi kuvaliiwogēgu,
30 go sem tutayana akámasa ana tamagowo yaidi, e wowogu kunāve tauyadi adi valiwoga goi kuvaliwogēgu. Adi valiwogayadi Kenani goi sikaaiyaka.’
‘Nakae bei aguinuwe’, Iyosepa kaena.
31 E Isileliyana idigo kana,
‘Kukatótula yaigu bego nakae bei kuguinuwe.’
Tuwo Iyosepa ikatótula. Ikatótula ikavava, e Yakobo nukotona iuyáwana, ina kaba masisi goi ivatugúyala isakululu Yaubada yaina.