40
Iyosepa anamimi itaaligeidi tetelina
1 E Iyosepa deri goi ikaaiyaka go, tuta tayamo da Itipita idi tolovina ina vedi ana tomatakavatayao adi tovakumgo be nakae ana beredi ina tokaigabunayao adi tovakumgo tolovinayana sibagali.
2 Tauna tovakumgo adi taiyuwokova yaidi goi Pero gamona igoyo.
3 Tuwo ina deri ana toyausayao adi tokalikumatana ilatuwoko idigo kana,
‘Kūna adi taiyuwo kuyoisīdi, e deri goi kuvaisīudi.’
Tuwo moitamo ina nakae iguinuwe; adi taiyuwokova ikabidi deri goi ivaisiudi sikaaiyaka. Ego amo deriyana goi Iyosepa nakae nava ikaaiyaka.
4 E tokalikumatanayana Iyosepa ivayoko deri ana tokaiyakoyao adi tovaita, e imatakaavatedi.
E tuta maanawena deri goi sikaaiyaka go,
5 sabamgo tayamo goi vedi ana tomatakavatayana be beredi ana tokaigabunayana adi taiyuwokova sikanamimi. Ago adi kanamimiyadi tamo tamo madi yagoina.
6 E simasisi vanuwo itomo, Iyosepa ina igitedi tauyadi madi nuwomou sikaaiyaka.
7 Tuwo ilumadadedi, idigo kana,
‘Kaga unana maisimi siiwówana?’
8 ‘Nuwobuna ama taiyuwo kakanamimi go, geya vatau tayaamo itoboine anamimiyadi italigeidi’, kidi kaedi.
E Iyosepayana idigo kana,
‘Anamimi adi yagoina Yaubada anetava itoboine ivaiteda ae? Tauna imi kanamimi kolatuwokoigu go, nakona Yaubada ivatulukoigu adi yagoina.’
9 Tuwo vedi ana tomatakavata igimibóbwara, idigo kana,
‘Guna kanamimi goi tayamo oine buyalina matagu goi ikaaiyaka.
10 E buyalayana itabolalavi aito go, mainao situpo, silala, niga sikéuwo, e keuwoidi sibólika.
11 Pero ina vedi nimagu goi aakavale. Tuwo keuwoinayadi aguwedi, vediyana tobuna goi abibidi. Abibidi ikavava, vediyana Pero avini.’
12 Iyosepa idigo kana,
‘Im kanamimi ana talígava ame nakae: Tabolalavina aito moe maliyalina aito.
13 Tauna maliyalina aito mlidi Pero bei ikilagasim be nakae kebam ivinimneim be ina vedi kuvini nakae boi tutayana kom tauyana ina vedi ana tomatakavata.
14 Go tutayana am dedevina kubabane, kunuwaisīgu ae? Siyagu, yau guna lokata kulolāse, e Pero kulatuwōko italigeigu.
15 Bogina kuyagoi. Boi kidi Iberiu idi kasa goi geya guna goyomo akaaiyaka go, tuwo koroto maniyedi sima siyoisigu, simegu ameko. Ameko nakae geya tayaamo goyo aguinuwe bego itoboine ame deriyana goi sivaisiugu.’
16 E kina tokaigabunayana inove bego anamimiyana ana talígava dedevina, tuwo Iyosepa ilatuwoko idigo kana,
‘Yau nakae akanamimi. Gwa. Guna kanamimiyana ame nakae: Beredi ma bayaoidi aito aavabedi go,
17 bayaoyana kanayaatanaina goi, e beredi ituli ituli Pero manuna sikaaiyaka. Sikaaiyaka go, mánuwo sima sikani.’
18 E kina Iyosepayana idigo kana,
‘Im kanamimi ana talígava ame nakae: Bayaoyadi aito moe maliyalina aito.
19 Tauna maliyalina aito mlidi Pero bei ikailagasim. Nukotom bei ibobo go, sakavaim isiko alova goi ivakosainem, e mánuwo bei sima sakavaimyana sikanikani.’
20 E tuwo moitamo maliyalina aito mlidi moe Pero ina bíbina ana maliyalina. Tuwo áika gagaina iwodugu go, ina tovakumgoyao paakonidi iduduwedi sima taiyao sikáika. Aikayana goi ina vedi ana tomatakavata be nakae ana beredi ana tokaigábuna nakae iduduwedi sima tovakumgoyadi matadi goi ikailagasidi.
21 Vedi ana tomatakavata ikailagasi ame nakae: Kebana ivinimnei, tauna Pero ina vedi imatakavate.
22 Go tokaigabunayana ikailagasi, wowona alova goi ivakosaine ikaumate nakae Iyosepa idige tutayana idi kanamimi italigeidi.
23 E kina go vedi ana tomatakavatayana ana dedevina ibabane go, Iyosepa ina livala geya inuwokavateyeta, go sem inuwoilave.