36
Iso ina bodao adi liliu
1 Ame Iso mana bodao adi liliu, tauyana youyuwoina Idom. Liliuyana ame nakae:
2 Iso Kenani vevinaidi adi taiyuwo inaidi, tayamo yoina Eda, tauyana tamana Eloni go, ana dala moe yoina Eta. E monena aiyuwoina yoina Olivama. Tauyana tamana Ena go, tubuna Sibiyoni go, ana dala yoina Ivai.
3 Monena aitonina yoina Basemate, tamana yoina Isimaeli go, niuna yoina Navayota.
4-5 Iso natunao koroto Kenani goi sibíbina ame nakae: Eda ivenátuna, natuna koroto yoina Elipasi. Basemate ivenátuna, natuna koroto yoina Reuweli. Olivama ivenátuna, natunao koroto adi taito, tayamo yoina Yeusi, tayamo yoina Yalam, tayamo yoina Kora.
6-7 E Iso Yakobo madi bodao taiyao Kenani goi sikaaiyaka go, idi yoguyoguyao badabada sisaki, tauna geya itoboinedita amoko adi dedevina sibabane. Tuwo Iso latuwona ina ituli ta kasa. E monenao, natunao, ina bodao, konadi be nakae ina yoguyoguyao Kenani goi ikabidi inavedi asa yoina Seira goi.
8 Tuwo Koya Seirayana goi kidi Iso silokasa. Isoyana youyuwoina moe Idom.
9 E Iso tubunao adi liliu ame nakae:
Tubunaoyadi yoidi Idom go, asa Koya Seira goi sikaaiyaka.
10 Iso natunao koroto ame nakae: Tayamo yoina Elipasi, tauyana sinana yoina Eda. E tayamo yoina Reuweli, tauyana sinana yoina Basemate.
11 E Elipasiyana natunao koroto ame nakae: Temani, Omari, Sepo, Gatam be Kenasi.
12 E vavina paakonina yoina Timna moe Elipasiyana moneyuwoina. Tauyana ivenátuna, natuna koroto yoina Amaleki. Ame tauna Iso monena Eda tubunao.
13 E Reuweliyana natunao koroto ame nakae: Nakate, Serako, Sama, Misa. Ame tauna Iso monena Basemate tubunao.
14 E Iso monena Olivama, tauyana tamana Ena, tubuna Sibiyoni. E ivenátuna, natunao koroto adi taito ame nakae: Yeusi, Yalam be Kora.
15 E nunu aivaudi Iso goi sisowóduwo be nakae idi tovakumgoyao ame nakae:
Nunuyadi Iso natuna Elipasi goi sisowóduwo yoidi ame nakae: Temani, Omari, Sepo, Kenasi,
16 Kora, Gatam be Amaleki. Ame bodayadi asa Idom goi sikaaiyaka go, ame bodayadi moe Eda tubunao be nakae Elipasi tubunao adi tovakumgoyao taiyao.
17 Nunuyadi Iso natuna Reuweli goi sisowóduwo yoidi ame nakae: Nakate, Serako, Sama be Misa. Ame bodayadi tubudi moe Iso monena Basemate.
18 Nunuyadi Iso monena Olivama goi sisowóduwo yoidi ame nakae: Yeusi, Yalam be Kora. Ame bodayadi tubudi Iso monena Olivama, tauyana tamana Ena.
19 Ame bodayadi madabokidi Iso tubunao. Iso youyuwoina moe Idom.
20 E tutayana Iso mana bodao nava geya sinoita asa Idom goi, e Seira tubunao (adi dala yoina Kori) amoko goi nava sikaaiyaka.
Seira natunao koroto nunu vau unadi ame nakae: Lotani, Sovali, Sibiyoni, Ena,
21 Disoni, Eseri be Disani. Ame bodayadi Seira tubunao Idom goi sikaaiyaka. Tauyadi dala Kori adi tovakumgoyao.
22 Lotaniyana natunao koroto adi taiyuwo, tayamo yoina Kori, tayamo yoina Emam. Lotani niuna yoina Timna.
23 Sovali natunao koroto ame nakae: Alivani, Manakata, Evali, Sepo be Onam.
24 Sibiyoni natunao koroto adi taiyuwo ame nakae: Tayamo yoina Aiyaki, tayamo yoina Ena. Enayana boi bwae yaviyavi igitebabane náuna moteoina goi tutayana tamana ina ase imatakaavatedi.
25 Enayana natuna koroto yoina Disoni go, natuna vavina yoina Olivama.
26 Disaniyana natunao koroto ame nakae: Kemidani, Esibani, Iterani be Karani.
27 Eseriyana natunao koroto ame nakae. Bilani, Sayavani be Akana.
28 Disani natunao koroto adi taiyuwo: Uso be Arani.
29 Dala Kori sinaena nunu vau yoidi ame nakae: Lotani, Sovali, Sibiyoni, Ena,
30 Disoni, Eseri be Disani. Ame tauyadi dala Kori ina nunu Seira goi sikaaiyaka.
31 Boi nimatu tutayana Isileli tubunao nava geya adi tolovinamo, e asa Idom ana tolovinao ame nakae:
32 Baora natuna Bela Idom asaina Dinava goi igimilovina.
33 Tutayana Belayana ikámasa, ana katumapu Serako guma Bosira natuna yoina Yovava itaoya, ilovina.
34 Tutayana Iyovavayana ikámasa, ana katumapu Kusam guma Temani itaoya, ilovina.
35 Tutayana Kusamyana ikámasa, ana katumapu Bedadi natuna Edadi itaoya, asa Avita goi iilovina. Edadiyana boi Moabe goi da Midiyani ilauidi.
36 Tutayana Edadiyana ikámasa, ana katumapu Samla guma Masireka itaoya, ilovina.
37 Tutayana Samlayana ikámasa, ana katumapu Saulo guma Rakovota itaoya, ilovina. Asa Rakovotayana sákala Yuparetisi kikina goi ikaaiyaka.
38 Tutayana Sauloyana ikámasa, ana katumapu Akabori natuna yoina Baala Kanani itaoya, ilovina.
39 Tutayana Baala Kananiyana ikámasa, ana katumapu Akabori itaoya, asa yoina Pau goi iilovina. Tauyana monena yoina Maetaveli. Maetaveliyana sinana Matiredi go, tubuna Mesavi.
40-43 E tuwo Iso tubunao nunu vau yoidi liliudi ame nakae: Timna, Aliva, Yateta, Olivama, Ela, Pinoni, Kenasi, Temani, Mivasari, Magadiyeli be Iram.
Ame dala Idom ana nunu vau yoidi go, yoidiyadi moe idi kasa tamo tamo yoidi nakae.