29
Yakobo ina Padani Aram goi
Reitiyeli ivaalobode tetelina
1 Tuwo Yakobo ibóbwara ikavava, itáoya, e aiyuwoina iketoiya. Iketoiya ima isowóduwo boda bomatu dadavina idi kasa goi.
2 Go ikandobala náuna moteoina goi doelu igite. Doeluyana kikina goi sipi yauwo aito sikaaiyaka madi tomatakavatayao. Bogina kuyagoi. Doeluyana moe sipi adi bwae. E doeluyana tobuna aubodaina moe gurewa gagaina.
3 Neta sipi madabokidi bogina silamgogoidi doeluyana goi, e adi tomatakavatayao sima gurewayana siliu sikaibale masigava goi siyato go, sipi sivanimdi. Sipi sinim ikavava, e gurewayana sikabi, tobuna sikaubodemnei.
4 E tuwo Yakobo ibala ina tomatakavatayadi ilumadadedi idigo kana,
‘Segowo, komi nako korotoimi?’
‘Kai Karani korotoima’, tauyadi kaedi.
5 Yakobo idigo kana,
‘Go Nakori tubuna Lebani kooyagoi o geya?’
‘U, kaayagoi’, tauyadi kaedi.
6 Tuwo Yakoboyana idigo kana,
‘Manakae? Tauyana dedevina gea geya?’
‘U, dedevina. Kudobāla natuna Reitiyeli goamo. Tamana Lebani ina sipi imemedi’, tauyadi kaedi.
7 E Yakoboyana idigo kana,
‘Kaga unana sipi komedi? Ame dine, níyala ivakaigaga go! Ame geya idi tuta kolamgogoidi sabamgo manuna. Tuwo kovanīmdi baige kokaluvilemnēidi konavēdi limou sikáika.’
8 ‘Geya. Nava kaatuyáwata ana kadókana sipi madabokidi kalamgogoidi, namliyeta baige gurewa kaliu kakaibale, e sipi kavanimdi’, tauyadi kaedi.
9 E nava sibobóbwara, Reitiyeli isowóduwo ima tamana ina sipi imedi. Bogina kuyagoi. Tauyana sipi ana tomatakavata.
10 E tutayana Yakobo ikandobala Reitiyeliyana igite doiyana ina sipi imemedi, Yakobo anetava go, gurewa iliu ikaibale, sipiyadi ivanimdi.
11 Ivanimdi ikavava, ibala ina Reitiyeli iyowoi go, mana uyáwana itáiya.
12 E idigo kana,
‘Yau Yakobo, tamam osiyana, Ribeka natuna.’
Tuwo livalayana Reitiyeli inove, ilokoina ina tamana ilatuwoko.
13 E tutayana Lebani vala inove bego doiyana Yakobo ima, e ilokoina ina ivalobode. Ivalobode, ivayavau nakae iyowoi. Ikavava, ime ina vada goi. Amoko goi Yakobo ivatétala, ana kaibako ivateteli.
14 Tuwo Lebaniyana idigo kana,
‘Moitamo, kita boda tayamo, ikaikaida tayamo.’
Tuwo tukówana tayamo goi Yakobo doiyana taiyao sikaaiyaka.
Yakobo Reya be Reitiyeli iinaidi tetelina
15 Sikaiyaka aaa, tuta tayamo Lebani doiyana ilatuwoko, idigo kana,
‘Moitamo kom osiyagu, tauna neta kom kupaisewa yau manugu, latuwogu aemaisim. Kulatuwokoigu aivina goi aemaisim?’
16 Ego Lebani natunao vevina adi taiyuwo sikaaiyaka, botomoya yoina Reya, e bogomane yoina Reitiyeli.
17 Reyayana vavina kubuunuwaina go, ana gómana Reitiyeli vavina gumaboina toina.
18 E Yakobo Reitiyeli igite nuwona ikabi toina, tauna Lebani ilatuwoko idigo kana,
‘Bei apaaisewa tala ainima aiyuwo goi go, kom am bogomane Reitiyeli kutagone anai.’
19 E Lebaniyana idigo kana,
‘Dedevina. Bei avinim, govila ituli ta koroto ima ikabi inai. Tuwo yaigu goi kwaiyāka kupaaisēwa gobe avinim.’
20 Tuwo moitamo tala ainima aiyuwo goi ipaaisewa bego Reitiyeli ikabi inai go, ina matakoi Reitiyeli yaina pasina ina nuwonúwana paisewayana moe tuta giyaina.
21 Sikaaiyaka, sikaaiyaka, tala ainima aiyuwoyadi sikavava, e Yakobo doiyana Lebani ilatuwoko, idigo kana,
‘Natum kuvinīgu monegu bei taiyao katuyuwo. Guna tuta bogina alukavave.’
22 Tuwo Lebani idi nai aikanina gagaina iwodugu go, toni kasa liliudi iduduwedi sima taiyao sikáika.
23 Sikáika ikavava, vanuwo bogina isabamgo, Lebani natuna Reya ikabi inave Yakobo yaina goi bego taiyao simasisi, e moe bogina bei sinai. Kina go Yakobo ina nuwonúwana kana, ‘Reitiyeli bogina anai.’ Go Reitiyeli geya, go sem Reya taiyao simasisi, sinai!
24 Ego Lebani ina pákwana vavina yoina Silipa ikabi, Reya ivini bego kina ina pákwana.
25 E Yakobo ma monena simasisi vanuwo itomo, Yakobo itáoya ikandobala Reitiyeli geya, go sem Reya igitebabane. Tuwo ina doiyana Lebani ilatuwoko idigo kana,
‘Ame kaga kuguinuwe yau yaigu? Manakae? Yau im paisewa apaisewe Reitiyeli manuna gea geya? Moitamo Reitiyeli manuna ae? Go kom kaga unana kwatubaugu?’
26 Go kina Lebaniyana idigo kana,
‘Moe geya kai ima sinapu geya. Geya itoboineyeta bogomane igiminai.
27 Go tuwo, om inuwa. Nai aikanina ame tauyana manuna taguinūwe wiki ame goi. Ikavava, bogomane avinim kunai go, kom tala ainima aiyuwo tuwaina kupaaisēwa manugu.’
28 Tuwo moitamo nakae Yakobo itagona. E aikayana silukavave, Lebani natuna Reitiyeli ikabi, Yakobo ivini monena.
29 Ego Lebani ina pákwana yoina Bila ikabi, Reitiyeli ivini ina pákwana.
30 Tuwo Yakobo Reitiyeli taiyao simasisi sinai. E Reitiyeli imatakoiye gagaina namliyeta Reya. Tala ainima aiyuwo tuwaina ipaaisewa Lebani manuna.
Yakobo natunao adi bíbina tetelina
31 E tuwo sikaaiyaka, Yauwe ikandosobu Reya igite ana matakoi giyaina, tuwo ina guinuwa goi Reya itoboine ikéuwama, go sem Reitiyeli ikágala.
32 Tuwo moitamo Reya ikéuwama ivenátuna, natuna koroto. Tuwo idigo kana,
‘Yauwe guna kaiyakomou bogina igite. Nakona ame tutayana monegu bei imatakoiyegu.’
Moe pasina tauna natuna ivayou Rubeni.
33 Aiyuwoina ikéuwama, ivenátuna, natuna koroto, kana,
‘Yauwe itagona aavenátuna unana inove bego Yakobo geya imatakoiyeguta.’
Tuwo natuna ivayou Simion.
34 Sivatonina ikéuwama ivenátuna, natuna koroto, kana,
‘Nakona ame tutayana monegu bei ilokategu. Natunao adi taito bogina avini.’
Tuwo natuna ivayou Livai.
35 Sivavasina ikeuwamako ivenátuna, natuna koroto, kana,
‘Ame tutayana Yauwe ayapaliye.’
Tuwo natuna ivayou Yuda. Go Reyayana ivenatunaupa.