11
Yaubada da poyapoya
niyadi ikinigonigo tetelina
1 E mainao tomota liliudi da poyapoya niyadi tayamo be nakae idi bóbwara tayamo.
2 E tutayana tomota situliya sina bomatu dadavina, dúmiya gagaina Sinari goi sibabane. Tuwo amoko goi silokasa.
3 Silokasa, sidigo kadi,
‘Tawou, vaega taodugudi paaevaidi be kalabadaabadaidi. Ikavava, tagabudi sikasa.’
Tuwo moitamo nakae siguinuwe. Kidi amo dadavayana goi gurewa paaevaidi geya, tauna adi vaboda moe vaega aiigabudi! Kidi simenti geya, tauna adi bwada moe taa!
4 Vaega aiigabudi siwodugudi ikavava, sidigo kadi,
‘Tawou, vaega aigabudiyadi takabīdi, tavapopōidi ida vada taodugūdi asa vau manuna go, vada tayamo maanawena taodūgu ituko ina be ana saku moe yábana goi, e bei yoida gagaina. Nakae taguinūwe, govila bei tasapa.’
5 E Yauwe isou ima asayana be nakae vadayana maanawena tomota siiwodugu igitedi.
6 Igitedi, idigo kana,
‘Iyaa! Kaga tuwaina bei siguinuwe? Tauyadi boda tayamo be nakae niyadi tayamo. Tauna neta ame vadayana silukavave, e kaga neta latuwodi, itoboinedi siguinuwe.
7 Tawou, tasōu niyadi takinigonigōe; tamo tamo niyadi ituli ituli, e bei geya itoboinedita sediyao niyadi siyagoi.’
8 Tuwo moitamo Yauwe ikausapesapedi poyapoya liliuna goi, e idi vada be idi kasa geya silukavavedita.
9 E amoko goi tomota liliudi niyadi kina Yauwe ikinigonigoe nakae tomota liliudi ikausapesapedi, tauna moe pasina amo asayana sivayou Babeli.
Eberam mana bodao tetelidi
(Aba Vatowo 11:10—25:18)
Semi tubunao adi liliu: Eberam isowóduwo
10 Ame Semi tubunao adi liliu. Tala ana badabada aiyuwo mluwa mlina, tutayana Semi ana tala ana badabada tayamo andedi (100) natuna koroto Arepakasadi ibíbina.
11 Arepakasadi ana bíbina mlina, Semiyana ikaaiyaka tala ana badabada paibi andedi (500) tuwaina. Ego amo talayadi goi natunao koroto be vevina liliudi sibíbina.
12 E Arepakasadiyana ana tala ana badabada tetipaibi (35) tutayana natuna koroto Selaka ibíbina.
13 Selaka ana bíbina mlina, Arepakasadiyana ikaaiyaka tala ana badabada poa andedi teri (403) tuwaina. Ego amo talayadi goi natunao koroto be vevina liliudi sibíbina.
14 E Selakayana ana tala ana badabada teti (30) tutayana natuna koroto Iberi ibíbina.
15 Iberi ana bíbina mlina, Selakayana ikaaiyaka tala ana badabada poa andedi teri (403) tuwaina. Ego amo talayadi goi natunao koroto be vevina liliudi sibíbina.
16 E Iberiyana ana tala ana badabada tetipoa (34) tutayana natuna koroto Pelega ibíbina.
17 Pelega ana bíbina mlina, Iberiyana ikaaiyaka tala ana badabada poa andedi teti (430) tuwaina. Ego amo talayadi goi natunao koroto be vevina liliudi sibíbina.
18 E Pelegayana ana tala ana badabada teti (30) tutayana natuna koroto Reu ibíbina.
19 Reu ana bíbina mlina, Pelegayana ikaaiyaka tala ana badabada tu andedi nain (209) tuwaina. Ego amo talayadi goi natunao koroto be vevina liliudi sibíbina.
20 E Reuyana ana tala ana badabada tetitu (32) tutayana natuna koroto Seruga ibíbina.
21 Seruga ana bíbina mlina, Reuyana ikaaiyaka tala ana badabada tu andedi seven (207) tuwaina. Ego amo talayadi goi natunao koroto be vevina liliudi sibíbina.
22 E Serugayana ana tala ana badabada teti (30) tutayana natuna koroto Nakori ibíbina.
23 Nakori ana bíbina mlina, Serugayana ikaaiyaka tala ana badabada tu andedi (200) tuwaina. Ego amo talayadi goi natunao koroto be vevina liliudi sibíbina.
24 E Nakoriyana ana tala ana badabada tuwentinain (29) tutayana natuna koroto Tera ibíbina.
25 Tera ana bíbina mlina, Nakoriyana ikaaiyaka tala ana badabada tayamo andedi naintin (119) tuwaina. Ego amo talayadi goi natunao koroto be vevina liliudi sibíbina.
26 E Terayana ana tala ana badabada seventi (70) tutayana natunao koroto Eberam, Nakori be Arani sibíbina.
Tera natuna Eberam
27 E ame Tera tubunao tetelidi. Tetalayana ame nakae:
E kina go Terayana natunao yoidi Eberam, Nakori, Arani. E kina go Arani natuna yoina Loti.
28 Araniyana ina kasa yoina Ura moe Babiloni dadavina. Amoko goi tamana Tera nava maa yawoina go, Araniyana ikámasa.
29 E kina Eberam inai, monena yoina Serai. Nakori inai monena yoina Milika, tauyana Arani natuna. Ego Arani natuna aitonina yoina Isika.
30 Ago kina Serai ikágala, tauna Eberam be Serai geya natudimo.
31 Tuwo Tera itaoya, natuna Eberam be tubuna Loti (moe Arani natuna) be nakae yaona Serai ikabidi idi kasa Ura Babiloni sinaena sikalave, bego taiyao sina Kenani go, tutayana sinonoina, sina asa Karani goi silokasa, e geya sinoita Kenani goi.
32 E Tera yawoina ana madabokina moe tala ana badabada tu andedi paibi (205), e asa Karani goi ikámasa.