86
क्हिए खोंयोंइ आनुबै म्हाँया बेल्ले थेब मुँ
दाऊदए प्राथना
1 ओ याहवेह, ङए प्राथना थेमिंन् धै ज्वाफ पिंन्,
तलेबिस्याँ ङ ङ्हाँदु नेरो आयों आख्युब् मुँ।
2 क्हिजी बिबै ताँ ङइ ङिंम्, ङलाइ रक्षा लमिंन्।
क्हि ङए परमेश्वर ग। छतसि क्हिए के लबै म्हिलाइ जोगेमिंन्,
ङइ क्हिए फिर भर लम्।
3 ओ प्रभु, ङए फिर दयाम्हाँया लमिंन्,
तलेबिस्याँ ङ त्हिंइतिमिन् क्हिए मिं किंरिम्।
4 क्हिए के लबै म्हिलाइ सैं तोंल् लमिंन्,
तलेबिस्याँ ओ प्रभु, ङ क्हिलाइन प्राथना लरिम्।
5 तलेबिस्याँ ओ प्रभु, क्हि स्वाब नेरो क्षमा पिंरिब् मुँ,
क्हिए मिं किंब्मैं ताँनलाइ क्हिजी खोंयोंइ आनुबै थेबै म्हाँया लम्।
6 ओ याहवेह, ङए प्राथानर क्हिए न्ह तोमिंन्;
ल्होमिंन् बिसि ग्वार ह्रिमा ङए ताँ थेमिंन्।
7 ङए दुःखए त्हिंइर ङ क्हिने ग्वार ह्रिमुँ,
तलेबिस्याँ क्हिजी ज्वाफ पिंब्मुँ।
8 ओ प्रभु, क्हि धों तब अरू देवतामैं खाबै आरे,
क्हिजी लब् धों तबै केमैं अरू खाबज्यै या लल् आखाँ।
9 ओ प्रभु, क्हिजी बनेबै ताँन् ह्रें-ह्रेंमैं
क्हिए उँइँर कुरब्मुँ,
धै चमैंइ क्हिए मिं थेब् लब्मुँ।
10 तलेबिस्याँ क्हि बेल्ले थेब मुँ धै औदिबै केमैं लम्;
घ्रि मत्त्रे परमेश्वर क्हि ग।
11 ओ याहवेह, क्हिए घ्याँर प्रबर ङलाइ लोमिंन्,
धै क्हिए क्ह्रोसेंन्बै घ्याँर ङ प्रब्मुँ;
क्हिए मिंलाइ ङइ मान लल् खाँरिगे बिसि
ङए सैं खोंयोंन् बिलै क्हि ङाँइन तल् पिंन्।
12 ओ याहवेह ङए परमेश्वर, ङए खों न्होंउँइँले ङ क्हिए मिं थेब् लब्मुँ,
धै ङ खोंयोंन् बिलै क्हिए मिं क्वेब्मुँ।
13 तलेबिस्याँ ङए फिर क्हिए खोंयोंइ आनुबै म्हाँया बेल्ले थेब मुँ;
धै क्हिजी ङए सो क्रोंर्बै गैरु क्ल्ह्योउँइँले फ्रेमिंइमुँ।
14 ओ परमेश्वर, घमण्डि म्हिमैं ङए बिरोधर रेइमुँ;
दयाम्हाँया आरेब्मैंइ ङलाइ सैल् म्हैइमुँ;
धै च म्हिमैंइ क्हिलाइ आमैं।
15 दिलेया ओ प्रभु, क्हि ल्हयो खब नेरो दयाम्हाँया मुँबै परमेश्वर ग,
युनन् ह्रिस आखब, ताँनए फिर खोंयोंइ आनुबै म्हाँया लब नेरो भर लल् खाँब मुँ।
16 ङए फिर दयाम्हाँया लसि ङ ङाँइ तोमिंनु;
ह्रोंसए के लबै म्हिलाइ क्हिए शक्ति पिंनु,
धै ह्रोंसए केब्स्योए च्हलाइ जोगेमिंनु।
17 ओ याहवेह, क्हिजी ङ ल्होमिंइमुँ धै ङए सैं क्होमिंइमुँ।
छतसि क्हिजी ङिए फिर छ्याँबन् लम् बिसि ङलाइ चिनु घ्रि उँइँमिंन्,
धै ङलाइ आखोब्मैं च चिनु म्रोंसि फापिरिगे।