28
1 खाबज्यै आल्हालैया दुष्ट म्हि न्हेयाम्,
दिलेया ठिक के लबै म्हिमैं बिस्याँ सिंह धोंले आङ्हिंल्ले टिरिम्।
2 ह्युलर्बै म्हिमैंइ आछ्याँबै के लमा चलेबै नेतामैं ल्हें त्होंम्,
दिलेया बुद्धि मुँबै म्हिइ ह्युल चलेमा
चए ग्याल्सर्बै म्हिमैंइ ल्हें त्हे समा सुख योंम्।
3 ङ्हाँदुमैंलाइ ह्रुगुदिबै क्रथे मिथेमैं
म्ल्ह नारिमैं तोइ आचैल्ले नास लवाबै नाँ-तिस्यु धों तब् ग।
4 ठिमर्बै ताँ आङिंब्मैंइ दुष्ट म्हिमैंलाइ थेब् लम्;
दिलेया ठिमर्बै ताँ ङिंब्मैंइ दुष्ट म्हिमैंए ताँ थोम्।
5 दुष्ट म्हिमैंइ ठिक के खैले लल् त्हुम् बिब आसे;
दिलेया याहवेहजी बिबै ताँ ङिब्मैंइ च ताँमैं छेनाले क्होम्।
6 छलु म्हिलु लसि प्लब् भन्दा
ठिक के लसि ङ्हाँदु तब छ्याँब ग।
7 ठिमर्बै ताँइ बिब् धोंले प्रब बुद्धि मुँबै च्ह ग;
दिलेया चब् थुँबै लिलि मत्त्रे प्रबै च्हइ ह्रोंसए आबालाइ फापिन् लम्।
8 ब्याज ल्हें किंसि ह्रोंसए सै न्होर ल्हें लबै म्हिइ
ङ्हाँदुमैंए फिर ल्हयो खबै म्हिए ल्हागिर सै न्होर खुम्!
9 ठिमइ बिब् धों आलबै म्हिए प्राथना
याहवेहजी आखो।
10 सोजो म्हिलाइ वाँसि आछ्याँबै घ्याँउँइ बोयाबै म्हि
ह्रोंसन् ङोर फेम्,
दिलेया सोजो म्हिइ आशिक योंम्।
11 प्लबै म्हिइ ह्रोंसलन् ह्रब्-सेब् प्हैंमुँ।
दिलेया ङ्हाँदुन् तलेया ताँ क्होबै म्हिइ च खैतब् मुँ बिसि सेम्।
12 ठिक के लब्मैंइ ट्होमा ताँन् सैं तोंब्मुँ,
दुष्टमैंइ ट्होमा म्हिमैं लोबर होंम्।
13 पापमैं लोइरि थेंबै म्हिल खोंयोंइ छ्याँब आत,
दिलेया “पापमैं लइमु” बिसि पिवाबै म्हिइ आशिक योंम्।
14 याहवेहलाइ म्हाँदिरिबै म्हिए फिर आशिक युम्,
दिलेया खीजी बिब् आङिंबै म्हि नास तयाम्।
15 दुष्ट म्रुँइ ग्याल्स लमा ङ्हाँदुमैं झन ङ्हाँदु तम्,
छाबै म्रुँ ग्राँ-ग्राँ बिबै चें नेरो ह्वाखबै भलु धों तब् ग।
16 शासन चलेबै म्हि सैं सार मुँस्याँ आछ्याँब तम्,
दिलेया छलु म्हिलु लसि सै न्होर आखुबै म्हिए छ्ह ह्रिंब् तम्।
17 म्हि सैए सैं खोंयोंइ छिं आङ्हाँ;
छतसि चए छ्ह तिगोंन् च खैता-खैता तप्रम्;
दिलेया खाबज्यै चलाइ आल्होरिगे,
चए ख खाबज्यै आलरिगे।
18 छ्याँबै घ्याँर प्रबै म्हि जोगेब्मुँ,
आछ्याँबै घ्याँर प्रबै म्हि तिख्खेर क्हुरियाब्मुँ।
19 ह्रोंसए म्रों तासि रुइब्मैंने ल्हें चबै सै तब्मुँ,
दिलेया केर आफेबै ताँमैंए लिलि प्रब्मैं ङ्हाँदु तब्मुँ।
20 भर लल् खाँबै म्हिए फिर ल्हें आशिक युब्मुँ,
दिलेया युनन् प्लब् तदा ङ्हाँबै म्हिइ दण्ड योंब्मुँ।
21 म्हि ङ्ह्योसि फेलब छ्याँब आङिं,
दिलेया कोइ म्हिइ तिछोए ल्हागिर छाबै केमैं लम्।
22 पिंल् आचैबै म्हि प्ल्ब् तदा ङ्हाँमुँ,
दिलेया ङ्हाँदु तदै ह्याब चइ आसे।
23 स्युइट्टले पोंबै म्हिइ भन्दा
हौदिबै म्हिइ लिउँइ धन्यबाद योंम्।
24 ह्रोंसए आबा-आमाए मुइ लुडिसेया
“ङइ गल्ति आलइमुँ!” बिबै म्हि
नास लबै म्हिए थु ग।
25 लोबि म्हिइ प्होंगि लम्,
दिलेया याहवेहने भर थेंबै म्हिल बिब् धों तम्।
26 ह्रोंसए बुद्धिर मत्त्रे प्रबै म्हि आमादु ग,
दिलेया ह्रब्-सेब्मैंए अर्थिमैं किंबै म्हि जोगेब्मुँ।
27 ङ्हाँदुमैंलाइ पिंबै म्हिल तो सैरैया आयों-आख्युब तरिब् आरे,
ङ्हाँदुमैंलाइ आपिंबै म्हिए फिर सराप खब्मुँ।
28 दुष्ट म्हिमैंइ ग्याल्स लमा म्हिमैं लोयाम्,
दिलेया चमैं नास तमा ठिक के लब्मैं बडिम्।