49
याकूबइ ह्रोंसए च्युसे ङ्हिं च्हमैंए फिर आशिक पिंब
1 झाइले याकूबइ ह्रोंसए च्हमैं हुइसि बिइ, “क्हेमैं चुर खागु तद्। तारे पिरु क्हेमैंए फिर तो तखब्मुँ च ङइ बिमिंस्यो।
2 “ओ याकूबए च्हमैं खागु तसि
क्हेमैंए आबा इस्राएलइ बिब थेद्।
3 “रूबेन क्हि ङए च्ह थब ग, ङए भों मुँबै त्हेर्बै ओंसोंबै शक्ति
नेरो भोंए रो ग।
मान नेरो शक्तिर ताँन् भन्दा क्हि थेब ग।
4 दिलेया क्युए भेल धोंले छाइ माइ तब क्हि।
तलेबिस्याँ क्हिए आबाए खाडर क्हि क्रेसि
ङए खाडए आब्रु वाइ।
ङए क्ल्ह्योर क्हि क्रेइ!
छतसि क्हिए आब्रु टिरिब् आरे।
5 “शिमियोन नेरो लेबी आघें अलि ग,
चमैंइ सेलाँ ओलेम्।
6 ओ ङए सो, चमैंए म्हि च्होंर आखो,
चमैंने प्रब टिब आलद्,
तलेबिस्याँ चमैं ह्रिस खसि म्हिमैं सैवाइमुँ,
चमैंइ तो लदा ङ्हाँमुँ चन् लसि क्ल्यामैंए मुल च थोवाइमुँ।
7 चमैंए ह्रिस फिर सराप खरिगे, तलेबिस्याँ चने दयाम्हाँया आरे।
ङइ चमैंलाइ इस्राएल तिगोंन् प्हुँवाब्मुँ,
धै चमैंलाइ सग्याँ प्हुग्याँ लवाब्मुँ।
8 “ओ यहूदा, क्हिए आघें-अलिमैंइ क्हिए मान लब्मुँ।
क्हिए योइ क्हिए शत्तुरमैं ट्होसि चमैंए खरि क्हाब्मुँ।
छतसि क्हिए आबाए च्हमैं क्हिए ओंसों कुरब्मुँ।
9 ओ यहूदा क्हि भोंबै सिंह धों तब् ग।
ओ ङए च्ह हेउँइँले फो सैसि क्हि युइमुँ,
क्हि कुरमुँ धै सिंह धोंलेन् रोरिमुँ।
सिंह आमालाइ धोंले खाबज्यै क्हिलाइ रेबै आँट लरिब् आरे?
10 यहूदाए योउँइँले म्रुँए प्हरे स्योरिब् आरे,
चए क्ल्हे आखन् समा, ग्याल्स ओलेबै प्हरे चए प्हलेए प्हाँइले स्योरिब् आरे।
छतमा ह्रेंमैंइ चइ बिबै ताँ ङिंब्मुँ।
11 चए गधा अँगुरए धुँर च्युँइँब्मुँ,
धै गधाए प्हसेलाइ बेल्ले छ्याँबै हाँगर च्युँइँब्मुँ।
चइ ह्रोंसए क्वेंमैं अँगुरए प्हार ख्रुब्मुँ
धै खिबै क्वेंमैं अँगुरए खुगुर ख्रुब्मुँ।
12 चए मि अँगुरए प्हा भन्दा ओल्ग्या,
धै चए स ङ्हे भन्दा तार्ग्या तब्मुँ।
13 “जबूलूनए टिबै क्ल्ह्यो मा ङ्युँइए रेर तब्मुँ,
च क्यु झाजमैं टिबै क्ल्ह्यो तब्मुँ।
धै चए साँदा सिदोन समा तब्मुँ।
14 “इस्साखार भोंबै गधा ग,
च ति ङ्हिंए पोर रोरिम्।
15 ह्रोंसए भों न्हबै क्ल्ह्यो छ्याँब मुँना,
धै ताँ बिमिंबर ह्रोंसए ह्युल सैं तोंब मुँना बिब् सेसि
चइ ति नोबर ह्रोंसए प्हैंद तोब्मुँ।
धै केब्छैंइ धोंलेन् के लल् ङिंब्मुँ।
16 “इस्राएलर्बै कुलमैं घ्रि तसि
दानइ ह्रोंसए म्हिमैंए निसाफ लब्मुँ।
17 दान बिस्याँ घ्याँर्बै प्हुरि घ्रि
अथवा घ्याँर्बै बिष मुँबै प्हुरि तब्मुँ।
चइ गोडाए प्हले तिंजा चोब्मुँ
धै घोडाए फिर क्रेबै म्हि चए लिलि क्हुरिह्याम्।
18 “ओ याहवेह, क्हिजी जोगेमिंम् बिसि ङ पैंरिइमुँ।
19 “गाधए फिर टोलि घ्रिइ ह्वाखब्मुँ,
दिलेया चइ चमैंलाइ ल्हावाब्मुँ।
20 “आशेर ह्युलर रोबै म्ल्ह-नारिमैं छ्याँब तब्मुँ।
छतसि चइ म्रुँमैंए ल्हागिर लिं-लिंबै चबै सैमैं चुब्मुँ।
21 “नप्ताली पिवाबै फो ग,
चइ छ्याँ-छ्याँबै प्हसेमैं फिब्मुँ।
22 “योसेफ बेल्ले रो-रोबै झ्याल् घ्रि ग,
क्यु मुल ङाँर्बै रो रोबै झ्याल् ग।
चए हाँगमैं गाराए फिफि ख्ल्याँब्मुँ।
23 मेत्हँले प्रिंब्मैंइ चलाइ बेल्ले दुःख पिंब्मुँ।
चए फिर मेत्हँलेइ प्रिंसि चलाइ ल्हाब्मुँ।
24 दिलेया इस्राएल जोगेमिंबै पारा नेरो प्ह्रोंछैंउँइँले
याकूबइ म्हाँदिबै भोंबै परमेश्वरए योउँइँले
योसेफए त्हँले आकुरा,
धै चए यो भोंब तरिब्मुँ।
25 क्हिए आबाए परमेश्वरजीन् क्हि ल्होमिंम्।
तोन्दोंरि सै लल् खाँबै परमेश्वरजी क्हिए फिर आशिक पिंम्
ताइ स्वर्गर्बै आशिकमैं,
माइ क्रों न्होंर्बै आशिकमैं,
ल्हें ल्हें सन्तानमैं तबै आशिकमैं पिंम्।
26 क्हिए आबाइ योंबै आशिक
स्योंम्बै कोंमैंइ पिंबै आशिक भन्दा भोंब मुँ।
च ताँन् आशिक योसेफए क्र फिर तरिगे।
चए आघें-अलिमैं न्होंरि च चिब तइमुँ।
27 “बेन्यामीन रुएबै प्याँगु घ्रि ग।
न्हाँगर सैसि पखबै से चइ चम्,
धै ङेसर चइ लुडिबै सै चुम्।”
28 चुमैं ताँन् एस्राएलए च्युसे ङ्हिं कुलमैं ग। चमैंए आबाइ चमैं ताँनइ योंल् त्हुबै आशिक पिंसि बिबै ताँमैं चुन् ग।
याकूब सिब
29 झाइले याकूबइ चमैंने बिइ, “ङ ङए म्हिमैं ङाँर ह्याबर होंइमुँ। हिति एप्रोंनए म्रोंर्बै उर ङए खेमैंने बालु ङलाइ पाद्।
30 च कनान ह्युलर मम्रे ङाँर्बै मक्पेलार्बै म्रोंर मुँबै उर ङ पाद्। च उ म्रोंने बालुन् अब्राहामइ हित्ती एप्रोनउँइँले छगोंए ल्हागिर किंल।
31 चर्न चमैंइ अब्राहाम नेरो चए प्ह्रेंस्यो सारा पाल। धै इसहाक नेरो चए प्ह्रेंस्यो रिबेका या चर्न पाल। ङज्यै या लेआ चर्न पाइ।
32 च म्रों नेरो चर्बै उ हित्तीमैंउँइँले किंब् ग।”
33 च्हमैंने चु ताँ बिल् खाँबै लिउँइ याकूबइ ह्रोंसए प्हले क्ल्ह्योर स्योंसि सो पिंइ, धै ह्रोंसए खेमैंने त्होनेइ।